When to wean and win?
Mga dekada nag tunga nga milabay dihang ang bata sa among silingan mitiyabaw gikan sa kilumkilum ngadtos banagnanag. Ambot mipadayon pa kadtog tiyabaw hangtud sa udto kay milakaw naman ako paghuman kog pamahaw.
Ang hinungdan sa pagtiyabaw? Gilutas ang maong bata sa iyang inahan. Wean o weaning maoy nahibaw-an kong Ininglis sa lutas.
Nahinumduman ko ang maong alingungog nga pagtiyabaw sa maong bata dihang nakit-an ko ang controversial nga cover sa Time magazine karong semanaha. Sa maong cover usa ka batan-ong inahan (26 years old) nga ga skinny jeans ug ga tank top gapatutoy sa iyang lalaking anak (hapit na mo 4 years old) nga gapatung og bangko ug nga daw duol na motupong kaniya. Ug ang text sa maong cover nagkanayog—”Are You Mom Enough?”
Duna bay malisya ang maong cover? Duna bay sexual innuendo? Unsa may buot kab-uton sa Time ning maong cover?
Mipadayon ang text—”Why attachment parenting drives some mothers to extremes—and how Dr. Bill Sears became their guru.”
Ang tibuok article kabahin sa attachment parenting nga naglakip sa extended breastfeeding. Mituki kini sa advantage ug benefits ning maong practice?
(Alang sa American Academy of Pediatrics ug sa World Health Organization, maayong paabuton unag 6 months ang pag beastfeed una ang bata i-introduce sa baby food.)
Daghang mga inahan nga miingong nainsulto sila sa hagit sa cover nga—Are You Mom Enough?
Murag ang stress sa Time mao ang pulong nga “extreme.” Ug ang ilang spokesperson miangkon nga ang ilang tinguha mao ang pagdakop sa attention sa mga makakita niani ug nga nagmalampuson kuno sila ning maong tumong.
Daw nauso man gud ni karong tuiga nga dunay pipila ka inila nga mga babaye (artista kasagaran) nga mapatutoy sa ilang anak sa mga publiko nga lugar nga way tabuntabon. Unya nasamutan kini dihang pipila kanila mipautoy sa ilang mga anak nga kapin nas 3 ka tuig ang panuigon.
Usa ning maong mga inahan mao ang kanhi child star sa America nga si Mayim Bialik. (“Blossom” ang ngan sa iyang programa sa TV ug karon apil siya sa cast sa “Big Bang Theory.) Ang inahan nga naa sa cover sa Time mao si Jamie Lynne Grumet nga usa ka lactation consultant, breastfeeding advocate, ug mother of two nga dunay blog sa I Am Not the Babysitter.
Miingon si Grumet sa Time Magazine og ,”I don’t consider breastfeeding immodest at all. I’m not shy about doing it in public.”
Ma-imagine ko lang kon dunay parehas ka maanyag ni Grumet nga makasakay nako sa jeepny nga mopatutoy sa iyang anak, mopa-atbang gyud tingali kog lingkud. Di lang ko motupad kay basig manakit akong liog pag liningi o di ba hinuon masikhan nako ang agtang sa bata.
