Mga pulis nangomisyon ug patay

Mitiyabaw intawon akong amigo nga negosyante ug patay (funeral services) kay pirmeng pangayu-an sa kapolisan ning dakbayan ug pang-gasolina ug “for the boys.”

Matud pa sa akong amigo nga garapal kaayo kini’ng ubang mga pulis kay mosaka ug moadto pa sa ilang panimay ug modemanda gyud sa ilang bahin sa patay nga ilang ma-report sa funeral services nga gidumala sa akong amigo.

Sentro sa reklamo mao ang Homicide Section sa Cebu City Police Office.

Unsa may action niini ni Cebu City Police Director Melvin Buenafe?

Duna ko’y pangan sa pulis nga gireklamo apan unya na nako kini itribukar sa insaktong panahon.

Asa man diay ang budget sa gasolina sa atong mga sakyanan sa kapolisan? Gipanghatag o gipangkawat?

Imbistigaha baya intawon ninyo kini kay nagpaka-ulaw lang. Basig nalimot na sila nga sila mga tinugyanan sa balaud.

* * *

Kumusta naman si Bella Ruby Santos ning mga higayuna? Asa naman siya nagpuyo human gibaligya ang iyang panimay sa dakbayan sa Naga?

Kinsa may nakapalit sa iyang sakyanan nga Pajero? Way abogado niya nga nang-interest niadto?

Unsa man tuod ka seryoso kadtong iyang pasalig ug sa iyang abogado nga si attorney Rameses Villagonzalo nga di mosibat si Bella sa kaso?

Niadtong Lunes pakyas na gani si attorney Ram pagdala ni Bella sa Provincial Prosecutor’s Office aron maoy mangunay pagtunol sa iyang motion for reconsideration.

Manghinaut lang ko nga tumanon ni Bella iyang mga saad nga atubangon niya ang kasong kidnapping with homicide.

Ang kampo nila ni attorney Dela Cerna miduso na ug opposition sa motion for reconsideration sa Provincial Prosecutor’s Office ug ilang gihangyo nga ipaduso na sa korte ang information sa kaso batok nilang Bella ug sa uyab nga Briton nga si Ian Charles Griffiths aron ma-isyuhan sa korte ug warrant of arrest .

Maayo kay makama’ong maminaw si Renante Pique, amahan ni Ellah Joy Pique, sa mga sugyot nga kinahanglang kuha-on si attorney Inocencio dela Cerna, abogado sa Criminal Investigation and Detection Group (CIDG) isip miembro sa prosecution panel.

Ngan nga si attorney Dela Cerna maoy nakasugod sa kaso kinahanglang di sila magduha-duha sa pagkuha niini kauban sa mga abogado sa Children’s Legal Bureau.

Bisan si Regional State Prosecutor Fernando Gubalane andam mo-create ug prosecution team nga langkuban sa iyang mga piskal nga dekalidad aron paglig-on sa kaso.

* * *

Karong Biyernes mo-deliver na sa iyang unang State of the City Address (Soca) si Cebu City Mayor Michael Rama.

Daghan ang mga butang nga hisgutan sa mayor atul sa maong okasyon uban sa iyang mga dinapit nga mga bisita.

Segurado ko nga hisgutan sa mayor ang iyang mga nahimo’ng proyektu, mga kalambuan, mga panghambug ug mga saad sa damlag.

Lakip nga iyang hisgutan mao ang dagan sa patigayon dinhi sa dakbayan sa Sugbu nga maoy makapalambo sa ekonomiya.

Dili malikayan ang paghisgot sa peace and order situation ug ang problema karon sa mga batang libud-suroy.

* * *

In fairness ngadto kang Presidente Noynoy Aquino sayo pa gyud kaayo siya’ng husgaan sa iyang liderato.

Tinuud dunay mga paltos ang presidente apan timan-i baya nga kanang mga palpak sa liderato mao kanay hagit ug sinugdanan sa kalampusan.

Kinsa man gud ang nadirekta sa pagka-maestra kun wa mag-agi sa pagka-tinun-an?