Judge Peras mo-inhibit sa kaso sa Apas?
Way mahitabong pagpangguba sa mga panimay karong adlawa ug sa mga mosunod nga mga adlaw diha sa sitio San Miguel, barangay Apas kay medyo alanganin si Regional Trial Court Judge Soliver Peras nga ipatuman ang na-isyu nga writ of demolition alang sa 168 ka mga panimay.
Sa among kukabildo niadtong Biyernes sa hapon, naghisgot si Judge Peras nga posibleng mo-inhibit siya sa kaso kay usa siya sa maapektohan kun mangguba sanglit dunay parte sa Central Command nga maigo diin anaa siya nagpuyo pagkakaron sa kampo.
Apan iyang gi-estudyuhan ang pagpa-disqualify sa iyang kaugalingon kay dili siya maoy presiding judge sa maong kaso ug nahitabo lang nga on-leave pa si Judge James Himalaluan nga maoy huwes sa kaso.
Isip iyang ka pairing judge maoy hinungdan nga siya karon ang nagbista sa mga incidental motions.
Nakasabot ko ni Judge Peras nga nagplano pag-inhibit sa kaso kay laksot sab kaayong tan-awon nga di siya kaproteher sa interest sa Central Command nga anaa siya nagpasilong.
Si court sheriff El Cid Caballes miingon nga di gyud siya makaguba karong buntag kay iyang nahibaw-an nga mi-schedule og hearing si Judge Peras sa urgent motion sa Office of the Solicitor General nga ipauktaba ang demolition tungod sa giingong bag-ong ebidensiya nga nadiskubrehan nga nagmatuod nga ang lote gipanag-iya sa gobyerno ug dili iya ni Mr. Mariano Godinez.
Nindot kun mamatud-an nga gipanag-iya sa gobyerno ang luna aron dili madisturbo ang mga nagpuyo.
Samtang didto sa dakbayan sa Talisay, nagmadaugon sab temporaryo ang pipila ka mga nagpuyo sa kontrobersyal nga lote ni manlalaban Raul Sesbreño diha sa barangay Lawaan kay dunay bag-ong kamanduan si RTC Judge Gilbert Moises nga ipalibkas ang on-going demolition kay dunay managlahing court action nga pending pa.
Sa akong ihap-ihap, mi-abot og 17 ka bay nga di ipaguba sa huwes.
Gisalikway sab ni Judge Moises ang hangyo ni Sesbreño nga gamitan og bulldozer o ba kaha payloader ang pagguba sa mga panimay.
* * *
Sa dili pa mo-estrikto ang mga tigdakop sa mga mag-motor nga magsul-ob sa mga dili prescribed nga crash helmet mas maayong unahon pag-confiscate sa taga gobyerno kadtong mga gipangbaligya nga mga helmet nga di kapasar sa standard nga gipang-display sa mga tindahan.
Bisan si Cebu City Vice Mayor Joy Augustus Young naka-obserbar nga dunay mga helmet gikan sa China ang anaa karon dinhi sa ato nga may tatak nga “PS” ug “ICC” nga pwerteng huyanga.
Kinahanglang subayon sab nila kun duna bay insaktong supply sa mga prescribed nga helmet.
Apilon sab nila pagbawi kadtong mga helmet nga gipangsul-ob nga di gyud lig-on ug di pulido.
Aron pagpakita gyud nga seryoso na sila sa implementasyon sa unang semana sa Agusto segurohon nga ang tanang mga pulis ug mga traffic enforcers nga mag-motor bag-ohan og prescribed helmet.
Ako kining gituyo kay ako mismo nakasaksi sa ubang mga tinugyanan sa balaod nga maoy mga violators. In fairness hinuon sa ubang mga enforcers parehas ug estado sa mga ordinaryong tawo nga di gyud makapalit sa mahalon nga helmet.
Suma pa ni Director Raul Aguilos sa Land Transportation Office nga ang pinakabarato karon nga prescribed helmet nibalor ug P500. Kining kantidara bug-at na gyud niadtong trabahante nga daghang gipakaon unya ang sweldo wa makaabot sa minimum unya napuno na sa utang.
Ambot lang sab kun mo-consistent ba gyud ang mga tinugyanan sa balaud nga manakop unya. Ang ako ra bang naobserbahan nag-ayo lang gyud ni sila sa bag-o pa.
* * *
Nalingaw ko sa among programang “Dialogue On the Air” sa dySS Super Radyo niadtong Sabado kay prangka gyud ug vocal kaayo si Winnie Badayos sa Ama Sugbo KMU nga mihingan og inutil sa taga Regional Tripartite Wages and Productivity Board kon (RTWPB) bisag natung-an siya sa duha ka representante niini nga sila si Glen Tabon, Attorney IV sa RTWPB ug Grace Carreon, board secretary sa RTWPB.
Sila si Badayos ug Jaime Paglinawan sa Bayan Central Visayas nagkahiusa sa ilang kawsa sa pag-abolish sa RTWPB kay wa gyud kini mopabor sa mga mamumuo sukad pa kaniadto ug ilang nabantayan nga nagpagawong sa mga employer ug mga negosyante.
Si Tabon mitubag nga dili intawon sila mga inutil ug igo ra silang nagpadayon sa trabaho sigun sa balaod nga magtan-aw sa kaangayan sa labor ug sa management.
Si Director Edmund Mirasol sa National Conciliation Mediation Board kon (NCMB) midason sa punto nila ni Badayos ug Paglinawan nga wa gyuy balaud nga nagproteher sa trabahante nga taktakon sa panahon nga magpasiugda og union.
Mitunga usab si Dr. Silvano Maranga sa Filipino-Cebuano Business Club pundok sa mga gagmayng negosyante ug miprangka nga di gyud sila makahatag og increase sa ilang mga trabahante tungod kay gamay ra gyud kaayo silag kita tungod sa kagamay sa puhonan.
Mihatag hinuon siya og giya alang sa alternatibong panginabuhian niadtong mga trabahante nga naglisud gyud sama sa pag-practice og organic farming apil na ang practical kaayong pagpamuhi og mga hayupan nga di gasto ug sulit pa og produkto.
