‘Environmentalists gigamit pag-ban sa mga PUJ?’

Natagbaw gyud ko sa mga punto sa mga bisita sa among programang “Dialogue On The Air” sa dySS Super Radyo niadtong Sabado diha sa Fuente Oval nga nagtuki kabahin sa proposal nga sirad-an matag Domingo ang Osmeña Boulevard gikan sa Provincial Capitol paingon sa Plaza Independencia.

Si Winnie Badayos chairman sa Ama-Sugbo-KMU mipadayag og grabeng pagsupak sa maong sugyot  kay numero unong apektado ang panginabuhi sa mga mamumuo nga nag-duty sa adlawng Domingo kay mag-plite og daku kay magbalhin-balhin og kasakyan.

Gawas niini, mawagtangan sa income ang atong mga drivers sa PUJ ug gani, matud pa ni  Badayos, nga hangtud karon wa pa maka-impas sa datahan ang mga drivers ngadto sa ilang mga operators sa pag-sirado sa kalsada niadtong Hunyo 12.

Miingon si Badayos nga sayop gyud kun motugot ang taga gobyerno sa  pagpasirado sa Osmeña Boulevard kay dili  gihapon makasulbad  ang pag-minus sa air pollution sanglit mao ra gihapon ang gidaghanon sa mga sakyanan ang padaganon apan igo rang gi-divert ang mga agi-anan nga kun buot sabton, susama ra ang matampo nga kadaut sa kalikupan.

Matud pa usab ni Badayos nga   gamay  ra kaayo ang gidaghanon sa mga PUJ  nga nagdagan sa kadalanan itandi sa mga pribadong sakyanan.

Nagtuo siya nga ang  mga  lain-laing pundok nga  nagpakabana sa kalikupan  igo  rang gigamit  sa gobyerno pag-phase out sa mga PUJ nga  nagtinguha nga ilisan sa mass transit system.

Apan sila si Vince Cinches ug manlalaban Tara Rama nga mga coordinator sa Road Revolution miingon  nga wa sila gamita sa gobyerno  aron pagpapas sa mga PUJ.

Nalipay  lang sila kay  abli na ang  katawhan sa paghisgot alang sa kaayuhan sa atong  kalikupan.

Bisan si Carlo Dugaduga, tigpamaba  sa City Hall, miingon nga siya  ug si Mayor Michael Rama uyon sa proposal nga sirad-an sa mga  sakyanan ang Osmeña Boulevard matag Domingo  kay nakita  ang kaayuhan ug kamaya sa katawhan nga magbaktas.

Apan si Dr. Pete Mancao nga nag-representar sa Cebu Doctor’s Hospital misugyot nga kun mahimo,  duha ra ka oras sirad-an  og gikan sa alas-5 sa buntag hangtud sa alas-7 sa buntag aron way mahasol.

Iyang gipadayag nga  niadtong Hunyo 12, nakabalda  gyud kaayo kaniya ang pagpa-sirado sa Osmeña Boulevard  gumikan sa traffic.

Matud niya nga naglisud silang mga doktor  pagbalhin-balhin og mga hospital  sa ilang  mga pasyente.

Midugang si Dr. Mancao  nga niadtong higayuna, wa gyuy gamit ang pagsira sa dalan kay  ang nanglakaw  mao ra gihapong mga tawhana ang  makit-an kada adlaw.

Si Eduardo Geolin sa NADSU ug PISTON nga supak  sab sa maong plano mipadayag nga ang kalsada gihimo sa gobyerno aron dunay  ka-agi-an ang mga sakyanan ug dili kay himoong  plaza sa mga tawo nga  mag-bisikleta, mag-skate board ug magdala sa mga  buhi.

Samtang si  Allan Salazar  presidente sa Tindak Bisdak Cebu Folding Bike Society ug Carlo Rodriquez sa Cebu Longboarders ug mga kaubanan, miingon nga mas maayong limitahan ang paggamit og mga sakyanan.

Sila nga nagsalig sa biseklita ug skateboard miingon nga makaayo na sa panglawas ang pagtindak unya wa pay gasto sa gasoline nga makadaut sa kinaiyahan.

Si Eddie Llamedo tigpamaba sa DENR  mitug-an  nga anaa pa sa tolerable limit ang kahugaw sa hangin. Apan matud niya nga di kita angayng  magpaabot  nga mo-grabe ang problema.

* * *

Naghago-hago ra  gyud diay tawon ang ubang misalmot  niadtong Sabado sa kadlawon sa programang “Run 2 Plant 4 Greenin’ Philippines”  didto sa Barangay Jaclupan, Talisay kay daghan ang wa makatanom kay nahutdan sa seedlings.

Sayang ang pagbangon og sayo unya way nahimo. Frustrating  kaayo alang niadtong mga intresado nga motanom nga way natanom.

Niprangka pa ang taga Department of Agriculture ug ang taga RAFI nga ma-short sila sa seedlings. May pag  gipa-andam na lang ang mga participants  og ilang kaugalingon nga seedlings.

* * *

Pwerteng luoya  gyud ni  Nang Gloria Navaja ang usa sa lig-ong testigo sa  kasong  parricide batok kang PBMA Supreme Master Ruben Ecleo Jr. nga gitangtang sa witness protection program sa Department of Justice.

Mipadayag sa akong radio program sa dySS Super Radyo (Radyo GMA-7)  si Nang Gloria nga mas maayo pa siyang  namatay na lang nung kang gipaantos sa iyang kahimtang karon.

Matud niya  nga sukad mitestigo siya sa kaso pabor kang anhing Alona Bacolod Ecleo nahimong miserable ang iyang kinabuhi  ug sa tibuok niyang pamilya kay nabalaka gyud kaayo sa ilang siguridad.

Mi-complicate ang iyang sakit ug gani  dili na siya kasaligan kun biyaan sa iyang mga anak.

Matud niya  nga mas maayo gyud unta nga  nagpabilin sa programa sa DOJ kay makadawat siya og financial assistance nga idugang sa iyang pagpalit og mga tambal nga iyang gimintinar pagkakaron.

Nakasabot ko ni Nang Gloria ug sa tibuok banay nga mipadayag  og mga kasagmuyo tungod kay dili gyud lalim ang ilang kahimtang karon.

Parehas siya sa nahiaguman sa mga nahibiing sakop sa pamilyang Bacolod.

Maayo kay mismo si Regional State Prosecutor Fernando Gubalane parehas sa akong  komentaryo nga delikado gyud kaayo sa mga Bacolod ug ni Nang Gloria bisag mahuman pa unya kining maong kaso.

Maglaum lang ko nga di  pasagdan kining maong problema  nila nila ni Gubalane ug ni State Prosecutor Llena Ypong  nga maoy in-charge ning maong  programa sa  DOJ.

Ang buot nakong ipasabot nga di lang sila kutob nga mopadayag og kaluoy kun di  mohimo sila og mga tukmang lakang aron gyud mapaubos og balik sa DOJ witness protection program ang mga Bacolod ug si Nang Gloria.