Salary increase maoy importante karon

Hapit na magtulo ka tuig  ang termino sa Malacañang ni Presidente Benigno Simeon “Noynoy” Aquino III apan wa ko makabatyag  nga dunay alibyo ang pagpuyo sa mga yanong  trabahante.

Hangtud karon, nagpabiling gamay  ang sweldo sa mga empleyado  ug misamot ang problema sa unemployment.

Sa kainutil ni Presidente Aquino pulos misaka ang presyo sa mga nag-unang  palaliton.

Wa koy nakita nga adunay konkretong lakang ang Presidente pagsulbad sa kawad-on sa iyang mga konstituwente. Pagarpar ray nagdaku!

Mangambot  lang ko kun duna bay mga  kaayohan  nga makuha ang mga  trabahante ugmang adlawa atol sa Labor Day celebration.

Nagtuo ko nga ang pagka-ulog-ulogan ug ang hiyas sa pagkabakakon sa Malacañang maoy mopatigbabaw sa adlaw natong mga mamumuo ugma.

* * *

Kun seryoso sila si Vice President Jejomar  Binay,  kanhi presidente Joseph Estrada, Sen. Ferdinand “Bongbong” Marcos, Sen. Aquilino Pimentel  III ug  ubang mga dagkung  politiko  sa Luzon ug sa Mindanao  nga mosuporta, dakug kahigayunan  nga  molampos si  Cebu Gov. Gwen Garcia  sa  iyang  ambisyon nga  magsenador.

Makaingon ko nga mayoriya sa mga Bisaya  mosuporta  ni Gwen ngan nga siya Bisaya ug Sugboanon.

Naandan na sab nga kitang mga Bisaya  mosuporta gyud ug taga-ato basta makamao ug kwalipikado  lang sab.

Pero sama sa akong tambag niadto ni Governor Gwen nga  kinahanglang subayon niya  og tarong  kun wa ba siya ibutang sa laang ning  ubang mga politiko.

Samtang kabahin niining tinguha ni 3rd District Rep. Pablo John Garcia nga mag-governor, medyo tungasonon  pa kaayo ning bahina kay dili pa siya exposed sa tibuok probinsya sa Sugbo.

Di susama  sa iyang  amahan nga si kanhi governor Pabling  Garcia nga acceptable sa kinabag-an kay  nakatilaw na sa  iyang serbisyo ug mapinanggaon sa katawhan.

Hinuon di lisud nga kat-onon ni Pablo John ang  mga hiyas sa iyang  amahan kay parehas silang  mga maayong laki ug pulos topnotcher sa bar examinations.

* * *

Pagkadakung balita karong adlawa kun mo-surrender si PBMA supreme master ug  kongresista  Ruben Ecleo Jr.

Alang sa prosecution panel  pinaagi kang manlalaban Fritz Quiñanola nga mapugos  pag-surrender  si  Ecleo sanglit karong  adlawa  maoy katapusan sa iyang 15 days reglementary period pag-esplikar kun nganong  pakyas  siya  pagtunga  atol sa  promulgation niadtong petsa 13.

Ang epekto kun di siya motunga  mahug  na nga final and executory ang  iyang  conviction sa  pagpatay sa iyang asawa nga si  Alona Bacolod Ecleo.

Sa balaod nga gi-invoke sa prosecution wa na gyuy legal  personality si Ecleo nga  mangayo og reconsideration o ba  kaha  apelasyon sa  iyang  conviction sa kasong parricide tungod sa iyang pagkaidlas ug  kun di siya mosurrender karon.

Niadtong Biyernes akong nahibaw-an nga naka-file na og notice of appeal with entry of appearance ang kampo ni Ecleo.

Ang iyang mga bag-ong abogado nga sila si former justice secretary Silvestre Bello III, mga manlalaban Lucas Carpio Jr.  ug Jose Ventura Aspiras nagkanayon nga “contrary to the facts and the laws and jurisprudence” ang conviction sa ilang kliyente.

Unya ang notice of appeal pirmado  usab ni Ecleo.

Nagpasabot lang nga anaa ra gyud sa nasud si Ecleo unya gilipat-lipat  lang ang kapulisan.

* * *

Dunay usa  ka  bata nga taga-Kinatarcan, Santa Fe, Bantayan Island, Cebu ang  gitaho sa iyang  mga kabanay nga missing human  giingong wa pasakya og eroplano diha sa Mactan Cebu International  Airport  (MCIAA) niadtong Biyernes paingon sa Palawan kay way identification card (ID).

Ang nakaporke kay ang gikuyugan dili igbaho sa bata kay igsoon ra sa  ina-ina sa bata.

Ang mga kabanay sa bata  nga anaa  dinhi nagpuyo  sa dakbayan sa  Sugbo  nabalaw karon sa pagpangita  kay giingong gipasakay  lang og taxi human nga wa makakuyog  sa Palawan.

Kung kinsa man ang gidangpan sa bata manawagan ko nga ipadala lang dinhi sa Cebu Daily News (CDN) o ba kaha sa among sibyaanan sa dySS Super Radyo aron makatabang kita sa kabanay nga nabalaka  na  pag-ayo.

Ang pangan sa bata mao si Romeo Montolo 12 ngadto 13 anyos, itom og  pamanit, singkit ogmata, bugaw og  buhok.

Nagduda ko nga gi-hold ang bata sa Task Force on Human Trafficking nga  nagbasi sa airport tungod kay  istrikto karon ang  patakaran bahin niining  pagdala og  mga bata sa mga tawo nga dili nila  paryente.

Akong gitawgan ang over-all chairman sa Task Force kagahapon nga mao si Regional State Prosecutor Fernando Gubalane aron makatabang  sa  pagpangita sa bata ug mipasalig nga iya  kining ipasubay.

Kung gipugngan nila ang bata nga si Romeo sigurado ko nga makatug og tarong ang  pamilya. Pero  kung  gipalakaw mao  ni ang dakung problema.

Akong giteksan si Cebu City Asst. Prosecutor Liceria Lofranco Rabillas kinsa maoy in-charge sa airport sa MCIAA apan wa ko makadawat  og reply gikan kaniya  kun anaa ba sa ilang kustodiya ang bata.

Kun estrikto gyud ang airport management ug ang task force nganong gitugtan man nga nakabiyahe ang nagdala sa bata nga klaro man nga dili paryente sa bata?