World Peace tests your love

“I just want to be talked about in a bad way,” giingnan ni Ron Artest ang usa ka interviewer. Apan human lang sa pipila kagutlo, mi-cambio si Artest og miingog, “I just want to be talked about.”

Maingon tang mabaw og lubot o kuwang sa pagtagad kining si Ron Artest. Sa Tinagalog pa, KSP o kulang sa pansin.

Ug tuod man human sa maong interview, mi-intra og team sa dodgeball si Artest (diin dali kaayo siyang maigo tungod sa iyang gidak-on). Mi drive siya og go-kart sa downtown Los Angeles diin gibadlong siya sa pulis apan gidayeg kay gasul-ob siyag helmet.

Dayon ang iyang championship ring sa NBA iyang gipa raffle og iyang gihatag ang abot niani sa usa ka foundation nga miatiman sa mental health awareness.

Apan wa madugay mibutho na usab ang Mr. Hyde sa iyang Dr. Jekyll ug iyang gilaparo sa usa ka tamparos si J.J. Barea.

Ug sa pagsugod sa delayed nga NBA season karong tuiga, nakurat ang tanan kon kinsa kining bag-ong player sa Lakers nga si Metta World Peace. Kini ang bag-ong ngan ni Ron Artest. Mura kinig binading nga ug bugal-bugal sa mga international beauty contest diin ang topic sa world peace maoy kanunay iyawit sa mga kandidata nga way alamag. Apan matud pa sa kanhing Artest, ang ngalang Metta World Peace mo highlight sa positive virtues nga iyang gituohan.

Ug tungod ning kahanggaw ni Ron Artest, misamot akog ka fan sa Los Angeles Lakers diin ang club mo stand for 1/2 great basketball and 1/2 good soap opera. Sama ning Mang Gary sa Mara Clara nga nabuang sa iyang gugma alang kang Alvira, si Ron Artest nagsalimuang sa iyang gibating kakuwang sa pagtagad nga gihatag sa kalibutan kaniya.

Ug karon lang bag-o gi-awardan napud og suspenso si Metta World Peace tungod sa iyang pagsiko sa bungotong James Harden.

Sa Internet ko lang nakit-an ang maong pagsiko sa luyo sa dunggan ni Harden. Wa ako makakita sa tibuok duwa. Apan may nabasahan ako nga nasikhan kuno ang ilong ni World Peace sa center sa Oklahoma nga si Perkins. Giluom lang kuno kini ni World Peace. Ug dihang nakabawos na siya pinaagi sa usa ka breakaway dunk, nagwild kini sa kalipay og naniko. Naatlan nga dihas tungod si Harden ug naigo kini ug nalukapa.

Ug mao karon sugdan sa Lakers ang ilang soap opera sa playoffs nga wa si Ron Artest. Kon makasulod ang Lakers sa division championship, malagmit makaduwa na og balik si World Peace ug laing variation na usab sa drama ang atong makit-an. Abangan.