Nagminaro ang mga abogado ni Ecleo

Daghang rason nga akong nabasa nganong mikalit pag-withdraw isip mga  abogado sila si manlalaban Orlando Salatandre ug Giovanni Mata isip mga abogado ni kongresista ug Philippine Benevolent Missionaries Association supreme master Ruben Ecleo Jr.

Una, ang konbiktado nilang  kliyente maoy unang makabenipisyo  niining ilang pag-undang kay wa nay kahatagan ug mga notices ug mga court orders samtang padayong magtago-tago si Ecleo.

Ning puntoha makarason na si Ecleo nga wa siya hatagi og substantive due process kay wa na siyay mga kasayuran sa mga panghitabo human mi-withdraw ang iyang mga piniling abogado human siya gikonbikto.

Ikaduha, maka-ikyas na ang mga abogado sa ilang responsibilidad ug makaundang na silag pamakak sa publiko kinsa kanunayng gipangitaan sa ilang kliyente kinsa kaniadto nagsigeg pasalig nga dili moeskapo sa mga obligasyon.

Klaro kaayo nga kining ilang gihimo pag-insulto ug pagyama-yama gyud sa hustisya ilabina nga way  consent kun way pagtugot ni Ecleo ang ilang pag-withdraw.

Ikatulo, makaayo usab kini kang Salatandre kinsa nangambisyon sukad kaniadtu nga mag-senador. Alanganin siya kun mga sakop ra sa PBMA ang saligan.

Nagtuo ko nga nagtuo si Salantandre nga mosimpatiya na niya ang katawhan sa Pilipinas niining ilang pag-withdraw isip abogado ni Ecleo nga ang tanan drama lang.

* * *

Haskang paita na gyud kun di madakpan si Ecleo ug ubang mga pinangita sa balaud kun way cash reward nga i-offer.

Magsalig na gyud kanunay sa  reward system ang tanan natong mga law enforcement agency.

Si Justice Secretary Leila de Lima nga mi-anhi sa Sugbo niadtong Lunes misanong sa sugyot nga mohatag og cash reward niadtong makahatag og  impormasyon kun asa madakpan si Ecleo kun tan-aw nga kini maoy mas epektibo nga paagi.

Alang nako way gamit ang cash reward sa kang Ecleo kay ang labing siguradong lugar nga gitaguan niya mao ra gyud sa ilang mansion sa San Jose  Dinagat Island sa Surigao del Norte.

Naa pa kahay makaako og budhi sa iyang mga sakop?

Usa ray sulbad niining tawo nga idlas sa balaud ug kini mao ang “shoot to kill.”

* * *

Paingon nang mahilot ang  kaso nga gipasaka sa unang kihante nga tinun-an sa high school batok sa mga tagdumala sa Saint Theresa’s College (STC).

Kagahapon pinaagi kang manlalaban Romeo Balili legal counsel sa STC mihatag kanako og kopya sa compromise agreement nga pirmado sa doktora nga ginikanan sa bata nga wa  papasoha ingon man sa ilang legal counsel nga si Enrique Lacerna.

Pirmado usab sa taga STC ang maong dokumento pinanguluhan  ni Fr. Ernesto Javier chairman of the board of trustees sa STC ingon man sa mga respondents ug sa mga abogado nga sila si Balili ug Joan Largo.

Tugoti nga akong kopyahon ang importanteng unod sa maong compromise agreement nga naduso na sa korte:

“Parties are desirous of putting an end to litigation. Upon the request of her minor child, petitioner no longer wishes to go on with the case and moves to be permitted to withdraw the same. Respondents, on the other hand, agree to waive their counterclaim, in the spirit of Christian reconciliation.

“Not being contrary to law, morals and public policy, parties and counsel pray for the approval of this Compromise Agreement.”

Mao ni ang nakanindot nga gikan sa dakung away karon magkauliay ra gyud gihapon.

Way plano ang ubang eskuwelahan nga mosunod sama sa South Western University ug Talisay  City College nga miirok usab sa ilang mga tinun-an?

* * *

Simbako intawon labngon og pito ka lawod mahitabo diha sa sitio San Miguel Apas ang dugoong hitabo  didto sa Silverio Compound sa Sucat  Parañaque niadtong Lunes nga duna  gyuy patay ug daghang mga samaran dihang gipatuman ang demolition.

Karong May 7, adlawng Lunes,  maoy bag-ong  schedule sa demolition  diha sa barangay Apas.

Ang nahitabo  sa Parañaque resulta sa kakuwang sa pagpakabana  sa mga politiko ilabina sa ilang mayor nga si Florencio Bernabe Jr.

Tinuod nakita nako sa mga video footages ang abuso sa kapulisan sa Special Weapons and Tactics group, sama sa pagpabuto sa ilang mga armas nga gipunting sa mga nag-rally ug mga residente apan nakasabot ko sa mga tinugyanan sa balaod nga naupos na sa pasensya.

Kanang paghatag og maximum tolerance sa mga otoridad angay lang na kun way pagpanglabay og mga bato ug wa mogamit ug Indian pana.

Pero ngan nga namiligro ang kinabuhi sa mga otoridad ug nakahimo nag kadaut sa mga propedad sa gobyerno angay lang sang patilawon.

Maglaum lang sab ko nga kadtong gipangdakop ug gipangbukbok maoy mga responsable sa kagubot nga nakapasakit sa kapulisan.

Konbinsido ko sa hepe sa kapulisan sa Parañaqe nga si Senior Supt. Billy Beltran nga mga blangko nga bala ang ilang gigamit sa pagpamusil kay kun di pa blangko puwerte kahang daghana sa mga namatay.

Wa kaha to patya ang biktima sa iya ra sang silingan nga daan nang  may pagdumot ug gitayming lang ang  paghimo sa krimen atol sa lamok-lamok?