Thinspiration
Thinspiration. O nganong di pa ngisihon ang mga niwang sa Facebook. Labi na kon kini sikat.
Kon inila ka, niwang ug malipayong mipakita sa imong hitsura sa mga social network sites pagbantay kay usa kas initan sa mga thinspiration “thinspo” police o pro-anorexia “pro-ana” patrol.
Ang “thinspiration” gikan sa duha ka pulong sa Ininglis nga “hin” ug “inspiration.” Ang anorexia sa pro-ana usa ka psychological eating disorder nga kasagaran mahitabo sa mga teens nga gusto maapil sa uso sa paniwangay.
Tungod nianing eating disorder nga gipasangil sa media, Internet ug advertisers daghan nang nagbantay sa bisan unsa nga i-post nga daw modayeg ug moabiba sa mga niwang. Alang ning mga bag-ong censors tanang mopakita sa kanindot sa pagkaniwang suspect sa pagka thinspiration ug ila kining hasi-on hangtud nga moundang kini pagsibya sa ilang pagkaniwang.
Kining maong panghasi usa ka reaction batok sa mga niwang nga models ug celebrities ng kanunay ma cover sa mga magazines. Ug kon pananglitan man gani dili pa tantong niwang ang ilang ibutang sa cover ila pa gyud kining paniwangon pinaagi sa Photoshop.
Makasabot kita ning maong kalagot batok sa abnormal nga pagpaniwang sa tanang mga tao nga ilang ibutang sa cover. Apan sa laing bahin daw nasubraan ra usab ang ilang panghasi kay bisan kon wa kay gisulti o gipasabot basta niwang ka ug gipost nimo sa Internet ang imong pagkamalipayon sa imong pagkaniwang nakahatag kanag problema sa panglawas sa mga batan-on.
Matud pas usa ka manunulat sa awas nga kon niadto ang gibantayan mao ang bisag unsa nga maka pa-excite sa mga kalalakin-an, karon ang gitagaan og pagbanatay ang bisag unsa nga mosugyut nga maayo ang niwang.
Pero may usa ka psychologist nga misugyot nga ang eating disorder susama sa usa ka addiction nga mas musamot kon badlungon o hasi-on. Mahimo nga tinago nga kalihukan sa mga batan-on ang pagpaniwang kon hasi-on sila sa uban. Matud pa sa maong psychologist kinahanglan nga pasabton una sila nga dili maayo ang grabe pagkaniwang ug dayon sila kombinsihon.
Ang pagdili sa mga popular nga niwang pagpakita sa ilang pagkamalipayon sa ilang kahimtang usa ka pagbabag sa free speech. Kay ang buot ra gyud ipakita ning mga bag-ong censors mao ang kasakit ug kagul-anan sa mga niwang.
Aniay pipila ka linya gikan ni Max Surban sa iyang kanta nga Tambok ug Niwang:
“Mipili kog babaye nga tambok/kay sexy man siya ug bigot/kon ako siyang gakson/lawas murag pison/malipay gyud ako intawon
Apan wala gyud ko moangay/kay niwang ang gusto ni nanay/Kon ako nga gakson/ang lawas bukogon/basig mabungkag lang nuon
Ang tambok gisaway sa ako nga nanay/basig high blood kuno ug mamatay/maayo ang niwang kay ang lawas gaan/kong may gira kusog ng modagan
Apan daw nindut gyud pilion/ang tambok kay lumoy nga hikapon/kadtong babayeng niwang/nga gusto ni nanay/yagpis intawon ug hawang halugon.”
