Nahulga sa iyang seguridad si Sheriff Caballes
Nanawag sa akoa kagahapon sa hapon si court sheriff El Cid Caballes samtang naghimo ko niining akong lindog sa Cebu Daily News ug mitug-an kanako nga dunay duha ka mga pulis dinhi sa dakbayan sa Sugbo nga nagsunod-sunod kaniya.
Daku ang iyang pagtuo nga lain og tumong ang duha ka mga pulis nga iyang nailhan ang mga dagway kay wa gyud gani makig-istorya kaniya kun unsay tuyo.
Matud ni Caballes, buntag pa nagsigeg paduol kaniya ang usa sa mga pulis hangtud nga iyang gilipat-lipat pagka-udto ug gisunod-sunoran gyud siya ug nagradyohay.
Gituhoan nga kini may kalambigitan sa demolition diha sa sitio San Miguel, barangay Apas, diin kagahapon gitakda unta ang pagbalik nila sa lugar human milampos ang mga politiko sa pagbabag niadtong Lunes pinaagi sa paghangyo kang Regional Trial Court Judge Soliver Peras nga iangan-angan.
Miingon ang sheriff nga iya nang gipahibawo si City Mayor Michael Rama ug iyang labaw nga si manlalaban Jeoffrey Joaquino ug naglaraw sa pagpa-blotter sa Fuente police station batok sa duha ka mga pulis.
Insakto si Sheriff Caballes nga di gyud mokompyansa kay ang sagad pahimungtan niini mao ang sheriff nga maoy moimplementar sa writ.
Kun tinarong pa ang tuyo ug pabor ngadto ni Caballes paghatag ug protection nganong di man moklaro ug moistorya?
Nahitabo na baya sa Davao nga wa gyuy nakatabang sa sheriff dihang gikulata ni Mayor Sarah Duterte nga nagimplementar sa writ of demolition.
Ako nakasabot nga medyo tensyonado gyud kun magsugod na sa pagpangguba sa Apas kay sagad sa mga apektado mga retirado ug aktibong sakop sa militar nga duna pay koneksyon kun magginamitay og kusog.
In fairness sa mga apektadong residente way nahimo kagahapon si court sheriff Caballes human mipagawas si RTC Judge Soliver Peras ug two-page order nga nagmando kaniya nga ipa-hold in abeyance ang implementation sa writ of demolition hangtud maresolbar ang tanang mga naka-pending nga issue sa kaso.
Pero ang ako ba, wa gyuy labot unta ang taga korte sa ingon ani nga away kay igo rang nagtuman sa mga lawful order.
Manghinaut lang sab ko nga di lang kutob sa istorya ang atong mga politiko paghatag og relocation site sa mga apektadong residente. Tinud-a intawon ninyo oi!
* * *
Salamat nga gi-revoke na ni Justice Secretary Leila de Lima ang balaod nga nagkolekta og mga legal fees sa mga kaso nga ipasaka sa katawhan sa mga prosecution offices.
Kaniadto pa gyud kini gireklamo sa mga litigante ug mga abogado kay nagpatuman ug filing fees ang atong mga buhatan sa piskaliya tibuok nasud gumikan sa Republic Act No. 9279.
Nagpasabot lang karong bag-o nga dili intawonnegosyo ang gisudlan nga trabaho sa atong mga piskal.
Niadtong wa pa ang Department Circular No. 025 ni De Lima nga nag-revoke sa RA No. 9279, mapugos intawon ug bayad ang mga kihante sa kasong qualified theft, estafa, illegal recruitment, carnapping, libel, anti-pilferage ug ubang kaso nga naglambigit og kwarta ug damage to property.
Si Cebu Provincial Prosecutor Pepita Jane Petralba mipasabot nga tungod niini libre na gyud ang tanan. Wa nay bayranan nga filing fee. Ug libre na sab ang pagpa-subscribe sa mga dokomento, pagnotaryo ug pagkuha og fiscal clearance.
* * *
Nakontrobersyal na sab karong bag-o si PO3 Cerelo Luage kinsa nadestino sa Mandaue City Police Office human giingong nagpataka og panumbag sa usa ka sakop sa Iglesia ni Cristo atol sa sunog nga miigo sa barangay Hipodromo niadtong Lunes sa udto.
Ang biktima nga si Julius Oruflo kinsa miembro usab sa Society of Communicators igo rang miresponde ug mitabang sa kauban sa INC nga si Lydie Luage kansang panimay nakan-an usab sa kayo.
Ang biktima nga may pagtugot sa tag-iya sa panimay misulod aron pagsuta kun duna pa bay laing tawo o ba kaha mga butang nga salbaronon.
Apan paggawas ni Oruflo gikulata sa pulis ug bisag nakaila ang pulis kaniya gipadakop siya ug gitumo-tumoan nga usa ka kawatan ug gipa-priso.
Nahibaw-an diay nga may kalagot nang daan si PO3 Luage ngadto sa biktima ug nakaako pa sa pagkiha sa kasong trespassing.
Ang kabanay sa biktima ug mga kauban sa Simbahan nag-andam na ug mga kiha batok kang PO3 Luage aron kini mataral ug matangtang sa serbisyo.
