Mushroom. Ohong. Gikan sa ihi sa iro sa natumbang kahoy gipabutho kuno kini sa liti. Pero aduna may uban nga motubo gikan sa tae sa baka. Dunay makahilo, dunay makaon, duna say maka-high.
Gitan-aw kini sa uban isip phallic symbol. Ang uban usab mitan-aw niini sip balay sa dwende. Pero kun balay kinis dwende wala may sala, kusina o banyo ang ilawom sa uhong. Tingali mas duol kun tawgon ta na lang kining waiting shed o pasinganan sa duende. Apan kadaghan na usab kita makakita og mga hulagway nga gilingkuran kini sa mga gagmay nga tawo. Mao nga mahimo ta usab kining isipon nga stool.
Usa ka matang sa fungus ang mushroom. Daw paryente ra kini sila sa molds sa lens, molds sa pan, ap-ap, kaspa ug uban pang fungal infection.
Sa “This Could be Big” segment sa ABC News dunay nahisgutan nga mga ohong nga makatabang pagsulbad sa problema sa plastic. Dunay usa ka mushroom nga mokaon og plastic ug dunay element sa mushroom nga mahimo o makahimo og Styrofoam. Maayo kini nga development sa pagbatok sa petroleum ug sa mga kadaut nga dala ning maong produkto sa oil.
Kining ohong nga mokaon og plastic gitawag og pestalotiopsis microspora ug didto kini nakaplagan sa lasang sa Ecuador. Mga researchers gikan sa Yale ang nakakaplag niini. Mabuhi kini ilawom sa usa ka landfill diin walay hayag sa adlaw og nga polyurethane ray konsumo niini.
Ang polyurethane ug Styrofoam puros non-biodegradable o dili malata.
Ang laing discovery nga pangkontra-plastic gikan sa ohong mao ang mycelium nga usa ka pilitpilit nga substance gikan sa ilawom sa ohong nga mahimong glue nga kun isagol sa mga salin sa umahan makahimo og Styrofoam. Tingali tinuod ang mga dwende. Tingali sila ang tighimo og ohong. Ug nakabantay tingali ang mga dwende nga hapit na malumos ang atong kalibutan sa plastic. Mao nga gahimo silag ohong nga mokaon og plastic ug lain nga mahimong Styrofoam. Tawgon ta lang kining mga ohong og magic mushrooms.