Kun buot gyung dakpon si Ecleo makaya kaayo
Dakung sagpa kun dili makadakop pagbalik ang kapulisan kang Philippine Benevolent Missionaries Association supreme master Ruben Ecleo Jr. human nga nakonbikto na siya sa kasong parricide.
Sigurado ko nga ang kongresista kinsa gisilotan sa reclusion perpetua pagkapriso gikan sa 20 ngadto 40 ka tuig ug pabayron sa 26.1 million pesos nga damages ug P200,00000 nga attorneys fees basi sa desisyon ni Regional Trial Court Judge Soliver Peras niadtong Biyernes anaa ra gyud nagtago-tago sa iyang mansion sa San Jose Dinagat Island sa Surigao del Norte.
Akong klarohon way fugitive nga makasustiner kun agresibo gyud ang atong mga tigpatuman sa balaod bisag pila pa ka kinabuhi ang makalas sa pagginukod.
Kun nahimo kaniadto sa taga Criminal Investigation and Detection Group (CIDG-7) panahon ni Supt. Edwin Diocos way rason nga dili masubli sa taga-CIDG ug sa liderato karon ni PNP Chief Director Nicanor Bartolome.
Way kriminal sama kang Ecleo nga mas gamhanan pa sa gobyerno ug sa balaod.
Unsa man gud ka hari si Ecleo uban sa iyang mga ginsakpan? Ayaw kog ingna nga mas impluwensyado pa siya ikomparar nilang kanhi presidente Joseph Estrada ug kanhi presidente Gloria Macapagal-Arroyo?
Di ko motuo nga maghari ang dautan niining liderato ni Presidente Noynoy Aquino.
Kun di makadakop si Bartolome ni Ecleo sud ning buwana mas maayong mo-resign na lang siya.
* * *
Nahurot akong bilib ni RTC Judge Soliver Peras kay iyang gikonbikto si Ecleo.
Saludo ko sa iyang kaisog kay bisan nasayod siya sa risgo sa iyang pagkonbikto kang Ecleo apan gipatigbabaw gyud niya ang tinuod nga nahitabo ug ang balaod.
Kudos Judge! At least wa ka maapil sa listahan sa mga huwes nga bahag ikog.
Bisag na-engkuwentro namong mga sakop sa media kaniadto si Judge Peras tungod kay iyang gilisud-lisud sa pag-cover ning maong kaso apan in fairness wa gyud ko makadawat og estorya nga nangurakot ni siya sa mga kaso.
Maglaum ko nga daghan pang Judge Peras sa Pilipinas nga mobarug gyud sa kamatuoran.
* * *
Di na gyud kapugngan ang ipatuman nga increase sa tuition fee karong ting-abli sa klase sa Hunyo.
Atong mga kadagkuan sa Department of Education ug taga Commission on Higher Education sa Central Visayas miingon nga nakasabot sila sa lain-laing petition sa mga private learning institutions pagpa-usbaw sa matrikula.
Kay ang mas gihatagan og dakung bili mao ang increase usab sa sweldo sa mga teachings and non teaching personnel.
Sila si Director Carmelita Dulangon sa DepEd ug Dr. Eduardo Bacaltos mitug-an atol sa among programang “Dialogue On The Air” sa dySS Super Radyo niadtong Sabado nga miabot na tanan og 26 ka mga tunghaan sa Central Visayas ang miduso og petition alang sa tuition fee increase.
Ang DepEd maoy mo-oversee sa mga private pre-school, elementary ug secondary levels.
Sa talaan sa CHED mi-abot na og 22 ka mga colleges and universities ang nangayo og usbaw sigun pa ni Chief Education Program Specialist Candelario Aytona ug sa iyang kaubanan sa CHED nga sila si manlalaban Pacita Ysugan, administrative officer ug Mary Anne Mirabueno, education supervisor.
Ang DepEd ug CHED gikatakda pa nga mopagawas unya og insaktong listahan sa mga tunghaan nga mopausbaw sanglit under evaluation pa ang tanan.
Ang University of San Carlos pinaagi kang Fr. Generoso Rebayla Jr., Vice President for Finance, mikompirmar nga nangayo sila og increase sa upat ka campuses unya lain-lain ang percentage.
Sa South Campus nga nailang San Carlos Girls High moabot og 14.15 percent ang usbaw. Sa North Talamban Campus 11.75 percent. Montessori 10 percent samtang 8 percent sa main campus sa P. del Rosario.
Ang University of Cebu, gipasabot sa Student Affairs Director nga si Joseph Emerson Subong, nga wa sila mangayo og increase sa tanang karaang mga estudyante. Apan mangayo sila og usbaw alang sa freshmen.
Gipahibawo usab sa taga CHED nga nangayo usab og increase ang kontrobersyal nga Saint Theresa’s College ingon man ang University of San Jose-Recolletos (USJ-R).
Way problema ang Cebu Normal University (CNU) ug Cebu Technological University (CTU) kay way increase ngan nga subsidize sa gobyerno sumaa pa nila ni Dr. Evelyn Tradio sa CNU ug Joe Sisican sa CTU.
Usa sa mga importanteng rekisitos sa pagpangayo ug usbaw mao ang pagkonsulta ngadto sa mga ginikanan ug mga estudyante.
Si Wennie Badayos chairman sa Ama Sugbo Kilusang Mayo Uno mipasangil nga wa gyuy mahitabong consultation sa mga ginikanan.
Apan si Harvy Inoc presidente sa federation sa (PTCA) Parents Teachers Community Association nagkanayon nga sagad mahitabo sa consultation kadto rang mga opisyal sa PTCA nga maoy nagdala sa tingog sa mga ginikanan ang konsultahon alang sa pre-school, elementary ug high school. Apan sa kolehiyo kadto rang mga estudyante ang konsultahon.
Maglaum lang sab ko nga patas-an na ang sweldo namong mga yanong mamumuo aron maka-ambas-ambas sa mahal nga matrikula ug sa ubang mga gikinahanglan sa inadlaw-adlawng pagpakabuhi.
Manghinaut sab ko nga bisag daghan nang mamalhin sa mga pampublikong tunghaan gikan sa private schools makahatag gihapon og de kalidad nga edukasyon ang gobyerno ngadto sa tanang estudyante.
