Bahag ang ikog sa huwes?

With all due respect ni Regional Trial Court Judge Wilfredo Navarro, medyo mikakak ug nanalaw man hinuon batok sa taga-Saint Theresa’s College (STC).

Wa unta siya  mo-inhibit dayon.  Iya untang gipa-esplikar ang abogado sa (STC) nga si manlalaban Romeo Balili, ang school administration ug ingon man ang mga  gwardya nganong dili sila ipang-cite for contempt of court niadtong wa pagtuman sa  iyang kamanduan nga papasohon ang duha ka mga estudyante sa high school niadtong Biyernes.

Mas nagduda na gyud hinuon ko nga nadala si Judge Navarro sa iyang kaikog  sa  taga-STC ngan nga ang iyang duha ka mga anak gradwado sa maong tunghaan.

Kun tinguha niya nga mo-inhibit nganong wa man niya himoa niadtong sayo pa?

Ug mas nagduda na gyud hinuon ko nga kadtong iyang mando nga papasohon ang mga bata usa lang ka  pakonsoylo sa mga ginikanan kay gihatagan pa og higayon nga makapangatarungan ang taga-STC nga supakon ang iyang naisyu nga TRO.

Tabla ra nga nagpadala siya sa legal opinion ni Balili nga dili siya maka-contempt kay napakyas siya pagpabutang og kuwarta sa mga kihante isip bond nga maoy garantiya kun may danyos sa habig sa STC.

Hinuon dili ko ka kwestyon sa discretion sa huwes ilabina nga natayming kining isyu  panahon niining mga balaan nga mga adlaw pun-an pa sa pagpabor nila ni Cebu Archbishop Jose Palma ug ni Archbishop Emeritus Cardinal Ricardo Vidal ngadto sa STC.

* * *

Pwerteng nindota sa kinabuhi karon sa  taga-Oslob ug sa taga-Boljoon kay duna silay mga butandeng nga kalingawan  ug pwede nilang pahimuslan sa ilang pagpangwarta.

Karon nga daghan nang nasayod sa duha ka mga butandeng daghan nang mga local ug foreign tourists nga gustong  motan-aw sa mga higanteng mananap.
Maglaum lang ko nga dili nila pangabusohan ang mga hayupan.

Pero unsa ka tinuod nga gihiktan ang ikog sa usa sa mga butandeng dihang na-stranded sa habig sa Boljoon nga gikalingawan sa mga residente aron sakay-sakayan?

Ang napublikar dinhi sa Cebu Daily News niadtong Lunes insakto  na kaayong basehanan sa pag-imbestigar kun kinsa ang mga responsable ug ilhon aron pangsilotan.

In fairness hinuon sa batan-ong babaye nga  nakasakay, nangayo na og despensa sa iyang gihimo.

* * *

Niining panahon sa summer bintaha gyud nga atong hatagan og dakung higayon  ang atong mga anak nga maka-relax ang utok gikan sa pressure sa sigeg tuon sa mga  libro ug ubang obligasyon sa eskwelahan.

Kini aron inig dayong sugod sa klase sa Hunyo anaa ang kahimangod ug ganahan na sang motuon sa ilang mga  leksyon.

Alang nako, ang mas nindot nga apilan nga kalihukan sa mga batang  lalaki mao gyud ang paugnat  sa  kusog kun “sports” sama duwang  basketball, karate ug  swimming. Samtang sa babaye  mao ang dance sport, karate ug swimming.

Ako’ng anak nga si Karl Anthony misalmot na sa Sunsport Basketball Summer  Camp diha sa Sacred Heart Sports Club nga gisugdan niadtong Lunes.

Si Coach Jojo Romarate miingon nga bisan kun daghan nang  mga estudyante ang miapil sa training,  andam  gihapon silang modawat niadtong mga intresado.

Samtang ang lain nakong anak nga si Karen intresado sa swimming ug gymnastics aron mas sexy siyang tan-awon inig June.

Maayo kini kay sa magsigeg duwa sa computer nga way kapuslanan.

* * *

Mas garbo karong tuiga ang Sugat sa Guadalupe ikomparar sa mga miaging tuig  sumaa pa sa panghambug sa akong kauban sa dySS Super Radyo nga si Super Aljin Abaquita kinsa  maoy naandan nga stage play director.

Hinuon,basta si Super Aljin na  maoy magdala og mga kalihukan ug mga kalingawan, sulit gyud na ug wa gyuy  magmahay kun hisgutan ang Sugat kon Domingo sa Pagkabanhaw.

Matud niya nga daghang mga surpresa ilabina ang mga pasundayag nga naglambigit sa isyu sa  pamilya  ug  lain-laing personalidad nga kakuhaan ug panag-ingnan sa inadlaw nga panlimbasog sa panginabuhi nga moigo gyud sa panahon sa pamalandong.

Sa sulti pa daan ni Super Aljin makadani na kaayo ug makapaagni kanako nga akong dalhon ang tibuok pamilya aron  saksihan ang maong kalihukan nga puno sa pagtulun-an nga maghatag og giya sa usag-usa  kanato.

Maglaum na lang ko nga ning  panahon sa Semana Santa makapamalandong kita ug atong hugasan ang atong tagsa-tagsa ka mga kaugalingon aron ikahimuot sa atong Langitnong Amahan.