Kinahanglang patilawon ang STC og contempt
Dakung insulto sa entire judiciary ang gihimo sa administration sa Saint Theresa’s College (STC) sa wa pagtuman sa kamanduan ni Regional Trial Court Judge Wilfredo Navarro nga papasohon og apil atol sa graduation rites niadtong Biyernes sa hapon ang ilang duha ka mga estudyante nga nagpahulagway nga nagbikini ug napublikar sa ilang Facebook account.
Anhi makita ang katag kun makamao ba si Judge Navarro nga moproteher sa iyang pagkahuwes ug sa institution nga iyang gialagaran.
Anhi sab makita ang katag kun unsaon pag-insulto ang legal counsel sa STC nga si Romeo Balili nga unang namahayag nga way basehanan ang pagpa-contempt kanila tungod sa kapakyas sa huwes pagmando sa mga kihante sa pagbutang ug kuwarta isip bond nga maoy gamiton sa pagproteher kun may kadaot man o danyos ngadto sa STC nga papasohon ang mga bata.
Unsang matang sa danyos nga gihisgutan ni Balili nga maoy maani sa STC kun gitugtan pa nga makapaso ang mga tinun-an?
Makamugna ba ug danyos sa STC kun gitugtan nga makapaso? O makapugong hinuon sa collateral damage sa ilang gihimong pagpakaulaw sa mga minor de edad?
* * *
Pagka wa gyuy palabra de honor ni Balili abogado sa STC kay wa niya tumana ang iyang gisulti sa akoa niadtong Huwebes sa buntag diha sa RTC Library nga andam nilang hangpon ug motuman kun momando si Judge Navarro nga papasohon ang duha ka mga tinun-an sa STC.
Gani mipasalig pa siya sa akong interview nga way mahitabong harassment ug dili nila lisud-lisuron ang mga bata. Ang akong nakuha niyang pakighinabi maoy akong gibalita sa among “Flash Bulletin” sa GMA-7 niadtong buntaga.
Sa maong kukabildo namo sa abogado miingon pa siya nga kun siya maoy pahukmon mas maayong katugtan kaming mga sakop sa media nga maka-cover sa graduation ceremony apan ngan nga dili siya apil sa administration dili siya maoy modesisyon.
Sa samang pakighinabi nako sa abogado mitubag pa siya ug miklaro nga wa siyay nadawat bisan gamay sa minilyong nabulsa sa pamilyang Balili sa “Balili property” nga napalit sa Provincial Government agig tubag sa gipasupot nga mga text messages sa mga tigpaminaw batok sa abogado nga dili siya magminaot ug magpakaaron-ingnong tarong ug sa panawagan nga iuli niya ang kwarta sa Balili.
Makaingon ko nga may pagkabakakon gyud diay si Balili.
* * *
Maglaum ko nga di matinuod kadtong mikalat nga balita pagka-Biyernes sa gabii nga misuway paghikog ang usa sa lima ka mga estudyante sa 4th year sa STC human wa tugti nga makapaso og apil.
Daku kaayo ang papel sa mga ginikanan ug ubang sakop sa panimay niining mga bataa aron magpabilin silang lig-on sa pagpanglimbasog.
Unsay matampo sa taga-Department of Social Welfare and Development sa mga apektadong mga bata?
Bisan si Cebu City Councilor Joey Daluz kinsa usa sa mga ginikanan sa usa sa mga apektadong tinun-an miprangka nga nabalaka siya sa iyang anak.
Iyang gitug-an nga mipasaka na sila og kasong child abuse ubos sa Republic Act 7610 batok sa taga STC ug ilang kumbatihon ang pagpangayo og danyos ug ang pagpa-contempt.
Ang konsehal nga amahan kinsa usa ka abogado mipadayag sa iyang kahiubos kay wa gyud sila ipatawag isip mga ginikanan. Alang niya sobra ra sab kadaku ang silot sa ilang mga bata.
Sama sa akong giingon nga ang commensurate nga silot mao nga ipaubos sa rehabilitation ang mga tinun-an ug ipaubos sa seminar sa value formation.
* * *
Mityabaw intawon ang mga maguuma ug mga residente didto sa amo sa lungsod sa Dalaguete sa barangay Manlapay ug Maluray kay inutil kaayo ang taga 4th Engineering District sa Department of Public Works and Highways (DPWH) pag-ayo sa kalsada didto.
Gitawgan intawon ko sa mga maguuma kay risgo gyud kaayo ang kalsada nga maoy agianan nila kay dunay mihulpa didto nga portion unya lawom kayo ang ubos.
Maglaum ko nga tagdon intawon kini sa mga kadagkuan sa DPWH in Central Visayas kay kining mga utanon nga komprahon diha sa Mantalongon Dalaguete gikan ang uban niini sa nahisgutang mga barangay.
Manghinaut ko nga usa kini sa unahon pagtagad ni Gov. Gwen Garcia kay usa kini sa atong farm to market roads.
* * *
Wa nay makapugong ni Gilbert Bargayo sa pagpalansang sa krus karong Biyernes Santo diha sa barangay Duljo Fatima ning dakbayan.
Niadtong Sabado atol sa among programang “Dialogue On The Air” si Bargayo mipasabot nga dili intawon negosyo ug dili intawon iyang panginabuhi kining pagpalansang.
Kun dili usa kini sa paagi sa iyang paghigugma sa pagpenetensya ug pagsakripisyo. Alang ni Gilbert nga matag palansang niya mas mawala ang mga sakit sa iyang lawas ug iyang giklaro nga maalim ang iyang samad human sa upat ka adlaw.
Apan sila si Pastor Joseph Navales sa Evangelical Free Church ug Pastor Benjamin Montera sa Mormons nagkanayon nga sayop gyud kining pagpalansang kay wa magsugo ang bibliya nga magsakit-sakit gyud sa lawas.
Ang ilang mensahe sama sa mga kadagkuan sa Simbahang Katoliko nga ang pagtabang sa mga nanginahanglan ug pagkamapinasayloon maoy maayong sakripisyo nga himoon sa tawo panahon ning mga balaang mga adlaw.
