Bella ug uyab nga Briton, priso?

Wa ko makasabot ni Cebu Acting Provincial Prosecutor Joseph England Berciles kun nganong iyang gitribukar kagahapon sa mga sakop sa media ang resolusyon sa three-man investigating team nga nag-rekomendar nga ipasaka sa korte ang kasong kidnapping with homicide batok nila ni Bella Ruby Santos ug sa uyab nga Briton nga si Ian Charles Griffiths nga maoy gipangtumbok isip mga suspetsado sa pagdagit ug pagpatay sa 6 anyos nga batang babaye nga si Ellah Joy Pique.

Dili ba kalapasan sa “confidentiality rules” sa Department of Justice ang premature disclosure ni Piskal Berciles?

Hinuon, iyang gipasalig nga ugma Huwebes duna na siyay final resolution sa maong kaso.

Practically duha ray kapaingnan sa kaso batok nilang Bella. Una mao nga aprobahan ni Piskal Berciles ang findings sa iyang mga sakop nga ipasaka sa husgado. Samtang ang ikaduha mao nga mohimo siya og milagro pagpadismiss sa kaso.

Nagpasabot ba nga ang pagtribukar ni Berciles usa ka direktang mensahe ngadto kang Bella nga mangandam na sa iyang kaugalingon nga mopuyo sa bilangguan?

Hinuon, kun ipasaka gyud sa korte kining maong kaso, daghan pag options si Bella sama sa pag-file og motion for reconsideration o ba kaha mo-apelar sa DOJ ug ang pagduso sa husgado og motion for reinvestigation.

Pero kun akoy abogado ni Bella, mas maayong atubangon na lang ang fullblown trial sa husgado aron makita gyud ang katag.

Puwede niyang hangyuon ang husgado nga paspasan ang husay.

* * *

Akoy nalooy sa mga vendors sa Tabunok Public Market diha sa dakbayan sa Talisay nga napakyas pagkuha og injunction sa sala ni RTC Judge Douglas Marigomen human gisalindot sa huwes ang hangyo sa mga vendors.

Nagpasabot kini nga madayon na gyud ang pagbalhin sa mga vendors ngadto sa bag-ong merkado nga anaa nahimutang sa may barangay Lagtang, Talisay, karong petsa 28 taliwa nga mobabag ang mga vendors.

Ang korte mihatag og dakung konsiderasyon sa panag-uyon nila ni Mayor Socrates Fernandez ug sa mga sakop sa konseho nga ipabalhin ang mga vendors.

Gawas pa sab, wa siya makombinse sa pasangil sa mga vendors nga wa sila konsultaha sa maong pagpasira sa Tabunok Public Market kay nakapakita og insaktong records sila si Mayor Fernandez sa mga consultations.

Pero tak-um ang baba sa korte sa isyu bahin sa alegasyon nga dili pulido ang pagkahimo sa bag-ong merkado ug sa isyu bahin sa kadaghang mga vendors ang dili na makatinda kay gamay ra ang bag-ong merkado.

Way plano ang kampo sa mga vendors nga moduso og reconsideration unya hangyuon si Judge Marigomen nga mo-conduct ug ocular inspection sa bag-ong merkado uban sa mga experto sa Department of Public Works and Highways aron maklaro kun lig-on ba o huyang ang edipisyo nga maghatag ug risgo?

Ngadto ni Brod Soc nga alagad sa Simbahan, maka-ako ba siya nga dunay daghang pamilya ang magutman ngan nga dili maka-accommodate sa tanan ang bag-ong merkado?

Wa siyay plano nga magbutang ug extension sa merkado paghatag og lugar niadtong way pwesto?

* * *

Pagkadali ra gyud sa panahon. Ugmang adlawa handumon sa pamilyang Vismanos ang ika-10 nga death anniversary ni Carmela Vismanos diha sa Winland Tower.

Sumaa pa ni Thelma Chiong, presidente sa Crusade Against Violence, ang banayng Vismanos ania karon dinhi sa Sugbo alang sa paghandom sa kalag sa dalaga diin dunay Santos nga Misa ug pagkahuman dunay candle lighting sa iyang gihagbaan diha sa Winland Tower.

Ang misteryosong kamatayon ni Carmela nagpabiling tanghaga kay hangtud karon, wa pa gyud masulbad ning maong kaso sa mga imbestigador sa National Bureau of Investigation (NBI).

Kaniadto diha toy giimbestigahan ug gani gipaubos sa lie detector test apan didto ra sab kutob.

Hingpit nang gibiyaan ning maong kaso sa taga-NBI kay impluwensyado gyud kaayo ang responsable?

Ang NBI nakahimo na og findings kaniadto nga dunay foul play ang kamatayon ni Vismanos.

* * *

Kinahanglang magbaton og respeto ang atong mga sakop sa konseho dinhi sa dakbayan sa Sugbo ngadto sa mga maapektahan sa pagatukuron nga cockpit arena nga iya ni Mr. Victoriano Chiongbian diha sa barangay Tejero.

Lisud kaayo na nga ang interest ra sa negosyante ug ang pag-income sa Siudad maoy atong tan-awon.

Susiha pud tawn ninyo ang epekto niini ngadto sa atong mga kabataan. Dili kaha mograbe pagdaghan ang tulisan ug kawatan diha sa Tejero kun maka-operate na ang buwangan?

Akong nadunggan ang sentimento atol sa among programang “Dialogue on the Air” niadtong Sabado diha sa Tejero nga wa mag-agi og proper consultation kining maong buwangan ni Chiongbian.

Ang lugar nga butangan sa buwangan nakaigo sa 500 meters radius sa Simbahan ug sa mga eskuwelahan.

Bisan ang taga-Blessed Sacrament nga mga representante ni Padre Willy Borces supak gyud.

Di sab makatugot sila si Pastor Jonathan Santamaria sa Risen Saviour Bible Baptist Church ingon man sila si Rev. Chuck Chua sa Evangel Family Church ug sa Evangel Futurekids Academy ug si Pastor Alan Estela sa Bible Believer Baptist sa Lorega nga duol ra sab sa buwangan.