Francais

Tingali nakadungog na kamo ning maong pasiaw tali sa panagtagbo sa usa ka Briton ug usa ka Frances diin gipangutana sa nauwahi ang nauna: “Why is it that you English always go to war for wealth while we French go to war for pride?” Ug niani mitubag ang Briton og, “I guess we all fight for what we do not have.”

Ug hangtud karon nagpadayon pa gihapon ang mga Frances sa pakigaway alang sa garbo. Wa na nila kini gisulong sa pangubatan kon dili sa pag-arte. Ug sa France, diin giingong gasugod ang cinema, seryoso gihapong arte ang pelikula. Dili susama sa ubang bahin sa kalibutan nga kurat ug kilig na lang intawoy kanunay nga gi-endorse sa ilang mga sine.

Ug sugod karong Huwebes hangtud sa Sabado, mo-host na usab ang Ayala og usa ka French Film Festival.

(Apil sa mga pelikula nga di ko makalimtan ning tinuig nga pasundayag sa mga Frances mao ang “Perfume,” “L’Esquivel” [The Game of Love and Chance] ug ang “La vie en Rose.” Daghan pang mga eksina nga naa sa akong panumduman apan di ko na mahinumduman ang ilang mga title.)

Ang mga ipasundayag karong semanaha mao kining mga pelikula: “Un Poison Violent,” “Le Marquis,” “Les Enfants de Timplebach,” “Arthur and the Revenge of Maltazard” ug “Dans les Cordes.”

Ang “Le Marquis” usa ka comedy ug dinhi gi-shoot sa Cebu. Kabahin kini sa usa ka salesman nga napriso. Samtang sulod sa prisohan, nanghambog siya nga siya ang inilang kawatan para mutahud ang ubang piniriso kaniya. Ug tungod niani, dunay pundok sa mga kawatan nga midala niya sa Cebu para magpatabang kaniya pagpanulis og bangko.

Ang “Dans les Cordes” kabahin sa duha ka suod nga mga batan-ong babaye nga boxer nga magtagbo sa usa ka championship match. Samtang ang “Un Poison Violent” usa ka coming-of -age story o sa Tinagalog pa pagdadalaga sa usa Interna (boarding school girl). Samtang ang duha nga nahabilin, pang bata nga mga pelikula.

Murag libre kining maong mga pasundayag mao nga malagmit taas-taas ang pila niani. Mao nga kadtong mga way lingaw paniudto mog sayo para makasulod mos first showing karong Huwebes nga mao ang “Le Marquis.”