Pagkabastos sa mga batan-ong Koreano
Niadtong Biyernes sa gabii, ako ug ang akong kapikas naglingaw-lingaw diha sa usa sa mga establisimento sa I.T. Park gikan nga nangaon, naminaw sa mga nindot nga kanta sa live band sa maong establisimento.
Ngan lagi nga nagkinahanglan kita og relaxation panalagsa gikan sa tibuok semana nga bugno sa panginabuhi, miinom ko og beer.
Samtang nagkalawm nang gabii, dihay bag-ong niabot nga mag-uyab nga mga Koreano ug mi-share sa among lamesa.
Sa sinugdanan sa ilang inom, okay pa kaayo silang duha. Pero dangtan ug usa ka oras, nagpakita na gyud sa ilang pagkabastos.
Kaming ubang mga customers nanaglumba lang sab og tan-aw sa duha ka mga binuhat nga kun wa pay sinina, paingon na nga magtagik sa kalipay atubangan kanamo.
Ang ako ba, nagpakita lang gyud nga wa na silay respeto. Maayo unta kun motel pa kadtong maong establisimento kay makasabot ra ko nila.
Miingon ang mga personnel sa maong kan-anan ug imnanan nga naanad na sila sa duha nga ilang suki. Buot ipasabot nga di sila kabadlong ingon man ang ilang mga gwardya.
Pero dihay Sugbuanon nga lalaki nga naghukas sa iyang T-shirt diha sa kalsada sa I.T Park apan gibadlong ug gikasab-an sa gwardya kay bastos kuno ang paghukas.
Unya kadtong hapit na magtagay sa kalipay nga mga Koreano desente pa to? Estrikto lang ang mga gwardya basta Sugbuanon ang magbinastos?
Report nga akong nadawat sobra na gyud ka bastos ug liberated na kaayo ang mga Koreano nga anaa karon dinhi sa Sugbo.
Unsa may gihimo sa atong gobyerno ini nila? Di kabadlong ang mga kadagkuan sa ilang association sa mga law-ay nga binuhatan atubangan sa publiko?
* * *
Dakung hagit sa atong mga opisyales dinhi sa dakbayan ug sa ubang mga lugar ang kampanya batok sa mga internet cafe nga nag-abli og mga pornographic sites.
Grabe na gyud kaayo karon ang mga batan-on. Mas experto pa kay kanatong mga dagku nga mo-abli sa mga bastos ug law-ay nga mga websites.
Ang ubang estudyante, dili na manulod sa klase kay adto na magyampungad sa mga Internet cafe.
Nakadayeg ko sa mga lakang nga himuon sa taga Cebu City Anti-Indecency Board (CCAIB) pinangulohan ni Dr. Lucille Mercado nga mopahigayon og surprise ocular inspection dala ang ilang mga information technology experts.
Subayon nila kun gipang-lock ba ang mga porno sites. Usa sa ilang tinguha mao ang pakig-abag sa mga opisyales sa barangay nga maoy nasuweto sa mga internet cafe.
Maayo unta nga magmalampuson sila si Dr. Mercado niining ilang kampanya. Pero mangambot lang ko kun maka-lock ba gyud sa tanang porno sites ang tagdumala sa internet cafe ug ang taga CCAIB.
Kagahapon lang, misuway ko og abli sa usa ka porno site sa internet cafe samtang naghimo ko niining akong lindog, apan naka-abli man gihapon ko.
Ang nagbantay mitug-an nga na-inspection na sa taga CCAIB ang ilang internet cafe ug gipang-lock ang mga porno sites apan hangtud karon, duna pa gihapoy maka-abli.
Matud sa nagbantay nga ang ilang himuon mao ra gyud ang pagbadlong niadtong mo-abli og mga bastos nga sites o ba kaha i-automatic shut down nila ang computer.
Giangkon usab sa nagbantay nga di tanang units nila ang gipangputlan sa mga law-ay nga mga sites.
* * *
Mitiabaw ang mga residente sa Cabancalan 2 Mandaue sa kabaho sa dul-an 50 ka mga iro.
Si Mary Jane Adolfo nanawag kanako niadtong Sabado kay di na gyud nila makaya ang maong problema pun-an pa nga way aksyon ang ilang barangay kapitan nga si Coregidor Cosedo.
Gani mipaabot na sila og petisyon ngadto sa barangay batok sa tag-iya ug mga caretaker apan giingong nawala ang ilang papel.
Nanawagan sila nga mabalhin ang mga hayupan nga mga mahalon nga igbalaligya kay sukad gibutang ang mga iro, lain-laing sakit ang ilang natagamtaman.
Naglaum ko nga di mapasagdan kining balido nga reklamo. Kun nagtugtog sa pansitan ang kapitan, mas maayong ipaabot kining reklamo sa mga apektadong residente ngadto sa Department of Health kay sigurado ko nga aksyunan kini ni Director Susana Madarieta.
