Wa ko makasabot sa atong mga kadagkuan sa Philippine National PoliceCamp Crame nga napakyas gihapon hangtud karon sa paghatag og security escorts alang ni Regional Trial Court Judge Soliver Peras nga maoy naghusay sa kasong parricide batok kang Philippine Benevolent Missionaries Association Supreme Master Ruben Ecleo Jr.
Si Judge Peras nagkinahanglan kaayo og suporta sa kapulisan ilabina nga 13 na lang ka adlaw sa di pa ipakanaug ang desisyon batok ni Ecleo karong Abril 3 nga Martes Santo sa hapon.
Si Judge Peras taud-taud na nga mihangyo sa mga kadagkuan sa kapolisan nga ipabalik kaniya ang duha ka mga nadestino nga mga pulis kaniadtu nga matud niya gikuha ni Cebu Provincial Police Director Patrocinio Comendador.
Unya naba manglihok ang atong mga kadagkuan sa PNP sa panahon nga dunay dautang mahitabo ni Judge Peras simbako labngon pito ka lawod?
Ambot lang kun usa ba kini sa timailhan sa pagka- impluwensyado sa mga Ecleo sa atong kagamhanan?
Makapaduda kaayo ang PNP kay wa gyud makadakop og balik kang Ecleo nga dunay mga pending warrants of arrest.
Kun mitagam ang kapulisan ilabina ang taga-Criminal Investigation and Detection Group (CIDG) nga unang nakiggubat sa mga tawo ni Ecleo sa San Jose, Dinagat Island kaniadto ug takulahaw lang nga gitugtan nga makapyansa, apan katungdanan gihapon sa kapulisan ang pag-aresto kay dunay lawful order.
Ingon ani na ba ang pagkatalawan sa atong mga otoridad? Nagtuo ko nga isog ning atong PNP in Central Visayas Regional Director nga si Chief Supt. Marcelo Garbo.
Maglaum ko nga mapresentar nila si Ecelo sa publiko sa dili pa ang promulgation. Wa man kahay idlas sa balaod?
* * *
Kinahanglang magbinantayon gyud ang tanang mga ginikanan, kapulisan ug mga opisyales sa barangay sa mga kalihukan sa mga batan-on samtang maglulinghayaw niining panahon sa summer.
Sa level sa kapulisan ug sa barangay, kinahanglang mopatuman gyud sa curfew ordinance aron limitahan kining mga laag og lakwatsa sa mga batan-on nga way klarong direksyon ug mosud sa mga gang ug fraternities.
Kinahanglang magpaka-responsable sab ang mga kadagkuan sa fraternities ug di magpasagad sa pagpang-recruit ug pagpahigayon og mga initiation rites ngadto sa mga batan-on.
Maglaum ko nga dili haguka ang lain-laing Sangguniang Kabataan matag barangay ug unta naka-line-up na ang mga sports activities ug mga maayong programa alang sa kabatan-onan paglikay sa bisyo ug sa mga butang nga way hinungdan.
Ngadto sa mga ginikanan, di gyud mokompyansa sa mga lakaw sa mga anak ug sigurohon gyud ang kaluwasan sud sa panimay.
Di pasagdan ang mga bata nga sila-sila ra sa balay kay tingalig mabutang sa risgo.
* * *
Mangahas na sab mi karong Sabado sa among programang “Dialogue On The Air” nga makigkukabildo sa nakontrobersyal nga pari nga si Fr. Jonathan Lao sa Poblacion Compostela.
Maayo unta nga motubag si Padre sa alegasyon sa iyang mga parokyano nga nahiubos kaniya ilabina kadtong mga katigulangan nga wa na makasabot kaniya human migamit sa mga Santos nga Misa nga dili na motuo ni Señor Sto. Niño, ni Mama Mary ug sa mga rebulto sa mga Santos.
In fairness ni Padre dili dayon nato siya hukman kay basig di kini tinuod ug basig komedya lang ang iyaha ug iyang gisukod kun unsa gyud ang pagtuo sa mga parokyano isip mga sakop sa Simbahang Romano Katoliko.
Apan kun tinuod man mas maayong mobalhin na lang ang pari ug laing tinuohan kay sa magpabilin siya nga mag-Misa nga supak sa iyang pagtuo ug ang pagpa-ambit sa pagtulun-an sa naandan natong relihiyon.
* * *
Hingpit nga kalipay ug daku nang garbo sa mga ginikanan sama nako nga maapil ilang mga anak sa top 10 niining panahon sa graduation, closing ug recognition day.
Di lalim ang pagkab-ot niining mga butanga kay sakripisyo gyud kaayo sama sa pagdisiplina sa pagtoon.
Salamat nga nahimo gihapong mga consistent honor students akong duha ka mga anak nga sila si Karl Anthony (3rd honors) ug Karen (4th honors) sa ilang tagsa-tagsa ka mga klase atol sa ilang closing and recognition day kagahapong adlawa nga gipahigayon sa ECOTECH Center sa Sudlon Lahug.
At least miresulta ilang mga kahago ug paningkamot sa matag adlawng tanan sa ilang pag-eskuwela diha sa Lahug Christian School.
Maayo nalang kini nga makahatag og giya sa mga bata nga magbaton gyud sa ilang mga katungdanan ug responsibilidad.
Ang sekreto ra gyud niining tanan alang sa mga ginikanan mao nga magpaka-responsable gyud ngadto sa mga anak.
Congrats to Karl and Karen! Keep up the good job mga anak!