Nindot gyud nga mag-toga atong mga estudyante

Alang nako, mas maayong mag-toga gyud ang mga tinun-an sa mga pampublikong tunghaan nga mogradwar sa elementarya  ug  high school.
Mas desente man gyud ug taas ang atong pagtan-aw sa mga estudyante nga mag-toga nga mopaso sa stage nga modawat sa ilang diploma.
Kining direktiba sa  Department of Education nga nag-discourage sa pagsul-ob og toga alang sa mga graduating students salikwaot gyud kaayong paminawon tungod kay sa akong obserbasyon supak kini sa kabubut-on sa mayoriya sa mga ginikanan ug opisyales sa DepEd.
Gawas pa sab mas practical ang toga kay barato ra  man ang abang.
Di na sab ko motuo nga dunay mga ginikanan nga mangreklamo pa gyud sa tag-P50 nga abang sa toga.
Ang uban mangasuko sa toga pero magsigeg hubog-hubog. Ang uban supak sa toga apan wa usiki sa pagsigeg sugal sa masyaw ug lotto.
Sakit igasto sa ubang iresponsableng ginikanan ang pag-abang og toga kay  makuhaan ang budget sa load sa cellular phone, panigarilyo ug ubang bisyo. Maayo kaha ni?
Niadtong Sabado atol sa among programang  “Dialogue on the Air” giklaro sa mga kadagkuan sa DepEd nga ang gitugot nilang collection mobalor lang og P150 matag tinun-an  apil na dinhi ang toga, venue, decorations, sound systems ug uban pa.
Unya ang nakanindot sa ubang pundok sa mga ginikanan nga gitawag og Parents Teachers Association mihimo og paagi nga makahatag ug libre’ng abang sa toga sama sa dakbayan sa Lapu-lapu basi sa gipahibawo ni Dr.  Erotida Jumao-as. Maayo unta nga sundon kini sa uban.
Nahugyaw ang tanang mitambong sa among programa niadtong pangutana kun angay ba gyuyng pakan-on ang mga bisita sa graduation rites.
Alang nako medyo maot sab kaayong paminawon nga di kita makapakaon sa bisita. Anaa sa atong tradisyon ang pagka-hospitable kon pagkamaabi-abihon.
Kun sakit sa ubang ginikanan nga mo-contribute aron ipakaon sa mga bisita di na lang mo-amot.
In fairness makaya man sab siguro sa mga principal ug mga magtutudlo nga makapakaon og lima ngadto sa 10 ka mga bisita.
Akong sublion akong mga pasalamat sa tanang mitambong sa among programa niadtong Sabado diha sa Cebu City School Division’s Office pinangulohan ni Supt. Rhea Mar Angtud ug sa iyang assistant nga Dr. Salustiano Jimenez.
Ingon man nila ni DepEd regional supervisors Dr. Clara Rebecca Falconi ug Leah Apao, Dr. Virginia Zapanta, school superintendent sa Mandaue City Division, Supt. Woodrow Denuyo sa Talisay City Division ug ingon man nila Mr. Harvy Inoc, presidente sa PTCA ug iyang mga sakop ug mga school principals.
* * *
Medyo init gyud ang diskusyon kun hisgutan ang kwarta alang sa Maintenance Operating and Other Expenses kon MOOE nga madawat sa mga School Principal  isip budget matag tinun-an sa elementary ug high school.
Niadtong Sabado, daghang text ang akong nadawat bahin sa MOOE kay matud pa way transparency ang mga principal ngadto sa mga naglingkod sa PTCA.
Mangasuko pa ang mga principal nga pangayoan og kwentada kun asa paingon nga maoy hinungdan nga di gyud  mohatag og kopya sa ilang liquidation ug  financial report sa MOOE.
Sama sa akong gipadayag niadtong Sabado nga mas maayo gyud nga ang tanan mga principal mohatag gyud og katin-awan ngadto sa pundok sa mga ginikanan aron kun unsay kuwang, andam motabang ang mga ginikanan.
Di ko makabasol sa ubang  mga ginikanan nga may pagka-critical og huna-huna nga magduda na gyud hinuon nga gigamit sa principal ang kuwarta kun magsige kitag tago-tago.
Gani mismo  si OIC DepEd Regional Director Carmelita Dulangon mi-subscribe sa akong huna-huna nga mopatuman gyud ang mga principal og transparency sa MOOE.
In fairness sab sa mga principal di pud tingali sila mag-diki-diki og pakita ngadto sa mga sakop ug mga opisyales sa PTCA kun asa paingon ang kuwarta kun tarungon lang sab og estorya ug pasabot.
* * *
Nakabasa ko sa kompletong  lineup  pagka-konsehal dinhi sa dakbayan sa Sugbo ubos sa tandem nila ni Cebu City Mayor Michael Rama  ug City Councilor Edgardo Labella sa sunod tuig nga eleksyon.
Pipila nga akong nahinumduman mao ang mga pangan nila ni City Traffic Operations Management Chairman Sylvan Jack Jakosalem, Busay barangay captain Eliodoro “Yody” Sanchez, Apas barangay captain Ramil Ayuman, Lahug barangay councilor Mary Ann Delos Santos ug si  magpapatigayon Jonathan “Atan” Guardo.
Matud pa sa akong  tinubdan nga anaa na sa 70 percent ang kahigayunan nga mao na kini ang tukmang lineup nga makigsakbang sa “buy one take one” nilang Kongresista Tomas Osmeña ug Vice Mayor Joy Young.
Pagkakaron medyo lig-on na ang grupo nilang Rama ug Labella tandem pero ngan nga layo pa ang piniliay posible nga duna pay daghang mahitabo niini.