Inahan gyud si anhing Bella Veloso
Alang nako, angayng hatagan og posthumous award si Bella Veloso kinsa namatay og apil sa palpak niyang pagluwas sa iyang anak nga si Jewel kinsa usa ka special child human nasunog ilang panimay sa Camella Homes sa barangay Pajac, dakbayan sa Lapu-Lapu niadtong Lunes sa buntag.
Bilib ko sa iyang kaisog ug gugma nga gipakita ngadto sa iyang anak nga bisag naglisod siya sa iyang kahimtang sa panglawas ug bisan og daku kaayong babaye iyang anak, mibalik pa gyud siya ug misuway sa pagtubos.
Ang kamatayon sa inahan ug anak simple kaayong mensahe nga gipasabot sa Ginoo nga maoy nagbuot sa tanan.
Gikompleto gyud ang mensahe sa tim-os nga gugma nga mao ang pag-inunongay ug way biyaay.
Nindot kaayo nga yukboan kini sa tanang mga ginikanan nga magpakaresponsable gyud diha sulod sa pamilya.
* * *
Taud-taud na kining estorya nga akong nasagap apan way igong kamatuoran nga si Ellah Joy Pique kinsa biktima sa kidnapping with murder, giunay og patay ni Renante Pique.
Niadtong Lunes sa buntag sa wa pa magsugod ang husay, dunay mihunghong kanako ug nagpahibawo nga gipatay gyud ang bata ni Renante sa ilang kusina.
Ang motibo mao nga naglagot si Renante, matud pa, sa bata kay dili tinuod niyang anak ug gani sigun sa istorya sa akong source nga karon di na maayo og relasyon si Renante sa iyang asawa nga inahan ni Ellah Joy.
Apan si Renante nga akong naistorya bahin ning maong pasangil kaniadto miingon nga klaro kaayong pagpangdaut kaniya ang maong isyu.
In fairness ni Renante Pique, kun gipatay man niya ang bata sulod sa ilang panimay sa kusina, wa untay mga silingan ug mga schoolmates sa Minglanilla nga mitestigo nga gidagit si Ellah Joy sa wa pa mapalgi ang iyang patayng lawas didto sa Barili.
* * *
Laing tinubdan ang mibutyag kanako nga di kuno si Msgr. Renren Beltran ang ipuli kang Fr. Henry Visitacion pagka-parish priest sa Holy Cross Parish sa barangay Basak Pardo.
Alang nako way problema kun si kinsa basta ang importante nga mahimutang na ug may kalinaw ang mayoriya sa mga parokyano diha sa Holy Cross Parish ug aron dili mosamot ang kontrobersiya sa Simbahan.
Medyo malangay matud pa ang paghulip ni Fr. Visitacion kay na-busy ang taga-Simbahan sa mga pagpangandam sa canonization ni Blessed Pedro Calungsod.
Pero kun seryoso ang mga kadagkuan sa Simbahan sa ilang desisyon sa pag-revamp sa mga pari, nganong di man ipatuman dayon?
Sa nahitabo sa Holy Cross, akong nahibaw-an nga gamay na lang ang nanimba ug gamay nalang ang amot nga madawat tungod kay di gyud masabtan ang batasan ni Padre Visitacion.
* * *
Nagkagidlay na gyud karon si kanhi presidente Gloria Macapagal-Arroyo ug iyang bana nga si kanhi first gentleman Mike Arroyo kay dunay laing warrant of arrest nga gi-isyu sa fourth division sa Sandiganbayan sa kasong anti-graft and corrupt practices act batok kanila nunot niadtong NBN-ZTE deal.
Sigurado ko nga mopyansa sila niini aron mahimong gawasnon dayon si Mike Arroyo. Pero si GMA magpabilin gyud sa prisohan tungod sa kasong electoral sabotage kay nonbailable ang kaso.
Mao na kini ang panahon sa tingpanudya sa ilang mga binuhatan kaniadto.
Ultimo’ng mga estuyante sa elementarya makiglalis na ug moinsister nga si GMA mas kurakot pa kang kanhi presidente Ferdinand Marcos.
* * *
Nakatawa lang ko sa usa sa mga abogado kagahapon nga nagtuki ug nakasaway niining pinakaunang paagi sa bar examinations sa Korte Suprema nga dunay tipik ug kabahin nga multiple choice kun pili-pili.
Matud niya, nga silang mga abogado mopagawas gyud ug insaktong katarungan ug opinion ug dili madala kanang pili-pili nga ang buot ipasabot niya nga mas importante gyud ang essay type nga eksaminasyon.
Miingon siya nga kun mao na kining kalakiha, moabot ang ponto nga ultimong objections sa mga testimoniya sa mga testigo pwede nang makademanda silang mga abogado ngadto sa huwes og kapilian nga makabarug ang ilang pag-object.
With all due respect, komedya ra gyud tong iya nga dalang hambug kay wa siya makatilaw sa multiple choice.
Pero manghinaut ko ngadto sa mga nakauna og kaabogado nga di magbugal-bugal nga kining mga bag-ong nakapasar, naabogado sa “butikaw-butikaw ikaw” kay lisud gihapon kaayo ang pagpasar.
