Mirisi ni Senator Santiago

Alang nako, makiangayon lang sab ang gihimo ni private prosecutor Vitaliano Aguirre nga misampong sa iyang mga dunggan aron pagpatagam ug pag-insulto gyud ni Sen. Miriam Defensor-Santiago.

With all due respect, ang pagpanginsulto  ni Aguirre ngadto ni Senadora Santiago way labot ang kinatibuk-ang impeachment court.

Alang ra gyud to  ni Senator-Judge Miriam.

Nagtoo siguro si Miriam nga siya ray makamao nga mopakauwaw sa nagpadayong impeachment trial batok kang Supreme Court Chief Justice Renato Corona.

Sobra ra sab kaayo ang iyang pagpang-insulto ngadto sa prosecution panel nga iyang gipanghinganlan nga mga gago unya naka-broadcast live sa mga television networks.

Insulto kaayo sa legal profession ang iyang gihimo.  Kun palpak ang prosecution di siya mangasaba ug ingon ato oy! Adto  niya kasab-an sa papel inig pagawas nila og desisyon.

Way lalis nga mangasaba  ang mga huwes sa mga regular courts ngadto sa mga abogado kun dunay mga kasaypanan apan  way  katungod ang mga huwes nga mogamit og mga foul languages nga makainsulto  sa pagkatawo sa mga abogado.

Daghan nang mga huwes nga gipangdisisplina sa Korte Suprema tungod sa pagkaarogante. Daghan na sang mga huwes nga  gipanghagit ug sinumbagay sa mga abogado. Gani duna gyuy huwes nga nasumbagan sa abogado.

Ngan nga tawo ra ang mga abogado sama ni Aguirre matandog gyud ang garbo. Katungod ang pagprotihir sa kredibilidad ug kadungganan ni bisan kinsa.

Kun ilang silotan si Aguirre, haum lang sab siguro nga silotan ug  disiplinahon si Senador Santiago.

Balik kita  sa panultihon nga kun gusto ka magparespetar sa imong isig kaingon pagbaton sab og respeto sa uban.

Sa mga nanggungis sa law practice dinhi sa ato nga akong naistorya  nakasaway gyud sa senadora.

Gani ang pipila  kanila  sama  nila ni manlalaban Democrito Barcenas, Loreto Durano ug Benjamin Cabrido  mosuporta sa ipalabang nga resolusyon sa IBP Cebu City Chapter nga magpadayag sa ilang sentimento batok kang Senador Miriam  ug manawagan  nga moobserve sa judicial ethics.

Respeto lang, madam Senator! Maglaum ko nga di mauwawan ang Pilipinas sa iyang pagka-international judge.

* * *

Kun di man makasohan ang mga batan-on nga nagbugoy-bugoy ug nagbinagsik nga maoy responsable sa  pagkalumos-patay sa 7 anyos  nga si Joshua Veloso maayo  tingaleng kasohan ang mga ginikanan ubos sa lagda sa Republic Act 7610.

Kun intresado ang mga ginikanan sa biktima pwede silang  makadangop sa korte sa  pag-pangayo ug civil damages batok sa mga ginikanan.

Di na gyud ko mobilib ni Police S/Supt. Rey Lyndon Lawas Lapu-Lapu City Police director kun mapakyas sila pag-establisar  sa insaktong hitabo.

Atong ibutang nga way foul play sigun sa autopsy ngadto sa batang biktima, apan ang pagpamaligra sa napulo ka mga bata ug paglabay og bukong maoy hinungdan nga ang batang biktima nahadlok ug  nahug sa dagat  ug  nalumos.

Kinahanglang manubag sab gyud ang mga ginikanan niining mga bataa nga wa na mangeskwela ug nagbugoy-bugoy na lang ug nag-apil-apil og gang.

Maglaum ko nga niining nagkaduol na ang summer vacation  ipatuman na sa mga barangay ug kapulisan ang curfew ordinance aron di makaporma kining mga hambugero sa kadalanan.

Samtang dunay paltos ang mga ginikanan ug mga tigpatuman sa balaod sa pagdesiplina, nainutil sab gyud kining mga kadagkuan sa Department of Education (DepEd) pinangulohan kang  Director Recaredo Borgonia  pagpatuman sa lagda alang sa kaayohan sa ilang  mga tinun-an sa mga pampublikong tunghaan.

Kun way mahitabong krimen nga naglambigit  sa mga estudyante   di gyud maalarma ang mga kadagkuan sa DepEd ug di gyud magpakabana.

Karon nga nahitabo ang  kamatayon niining  7 anyos nga batang lalaki nga tinun-an sa grade 1 nga si Joshua Veloso  sa dakbayan sa Lapu-Lapu una pa sila magkara-kara ug  magkisi-kisi sa paghimog mga lakang.

Akong nahibaw-an nga ang  biktima  nakagawas sa eskwelahan  nga way kuyog nga ginikanan.

Asa naman kadtong ilang paagi  nga way mga batang gagmay nga papaulion  ug pagawson sa gate sa eskwelahan kun way mga ginikanan o mga dagku ang mokuha human nabiktima sa kidnapping sa Ellah Joy Pique?

Wa pa gyud sila motagam sa nahitabo ni Ellah Joy?

Makaingon ko nga nag-ayo lang ang taga DepEd sa estorya kay human nahitabo si Ellah Joy nakasagop ko ug tinun-an sa grade1 sa Lahug Elementary School nga naghilak nga naglakaw kay gitugtan nga gipalakaw  bisag wala pa maabot ang inahan.

Unsa may problema sa mga school principals ug mga school administrators nganong di man kapatuman sa mga sayon kaayong lagda?

Way abag gikan sa mga barangay officials?