Sayang nga mi-resign si Judge Paredes
Nakugang nalang ko sa balita nga misugat kanako niadtong Lunes sa hapon nga mi-anunsiyo sa iyang resignation si RTC Judge Meinrado Paredes pagka-Executive Judge sugod niadtong miaging Biyernes.
Bisan iyang mga kauban sa judiciary ug mga court personnel natinga nalang sa maong balita.
In fairness ni Judge Paredes, nakasabot na ko sa iyang rason nganong kalit kaayo ang iyang desisyon.
Bisag kinsa tingali mahiubos gyud nga deretsohon ka’g pamolta ug P10,000.
Bisan unsa ka gamay nga penalty ngan nga dili kahatagan sa insaktong higayon nga maka-depensa makapahiubos gyud kay wa kahatagi sa gitawag ug substantive due process.
Ingon ani ka iresponsable ang mga kadagkuan sa Korte Suprema nga mopahamtang ug silot ngadto sa ilang mga sakop nga maoy front liners sa paghatag ug pag-implementar sa gitawag ug hustisya sa mga linupigan?
May ra ba unta kun si Judge Paredes ug si Judge Bienvinido Saniel mga “hoodlums in robes” kay mopakpak ta sa Korte Suprema.
Alang nako daku gyud kaayong alkanse ang Korte Suprema niining resignation ni Judge Paredes kay maghatag kini ug negatibong imahin sa judiciary.
Mangambot lang ko sa mosunod nga Executive Judge nga itudlo sa Korte Suprema kun parehas ba siya ni Judge Paredes nga transparent kaayo sa media ug sa katawhan?
Mangambot lang sab ko sa mopuli kun duna bay insaktong kredibilidad sama sa ka ligdong ni Judge Paredes?
Mangambot lang sab ko kun ang sunod nga Executive Judge andam ba’ng mosakripisyo pagtrabaho batok niining mga bilyako sa Palace of Justice nga maoy mga responsable sa palusot sama sa paggama ug mga fake decisions ug marriage scam?
* * *
Misamot ang akong kalooy sa mga nahibiling sakop sa pamilyang Bacolod nga salin sa masaker sa sakop ni PBMA Supreme Master Ruben Ecleo Jr. ug sa ilang testigo nga si nang Gloria Navaja.
Pagkakaron wa na silay mga klarong katulog human giputol sila sa coverage sa witness protection program sa Department of Justice.
Miigon si Angelito “Niño” Bacolod nga sila-sila nalang karon ang mangita ug kabalhinan nga panimay nga barato gyud kaayo. Sukwahi niadtong mga nangagi nga daghang armado ang mi-escort kanila.
Matud pa sab niya nga mangita pa siya ug dugang kuwarta nga pang-down ug pang-advance.
Gawas kang Ricky Bacolod nga nagkasakit akong nahibaw-an nga di na sab diay tawon makabarug si nang Gloria Navaja. Na-complicate iyang sakit human siya nadakin-as.
Si Niño mitug-an nga kun siyay pabut-on dili na siya ganahan nga mopuyo pagbalik didto sa dakbayan sa Mandaue diin didto sila gi-masaker. Apan kun di gyud siya maka-kita ug abangan nga makaya nilang abangan andam silang mobalik ug dawaton kun unsay mahitabo sa ilang kinabuhi.
Maglaum ko nga may konsensiya pa si Justice Secretary Leila de Lima nga mobati sa kalisdanan sa mga Bacolod.
Siyaro sab kun wa pa mo-abot ngadto kang Presidente Noynoy Aquino kining maong problemaha.
* * *
Dili sulbad ang pakig-gubat sa nasud sa China ug labaw na’ng dili sulbad ang sugyot nga i-ban ang pagpasulod sa mga produkto gikan sa China dinhi sa ato pagpakita sa atong protesta bahin sa isyu sa Spratly Islands.
Ang maayong himoon aron masulbad kini’ng kasungi-an sa panag-ilogay sa Spratly Islands mao ang pagpaabot niining maong isyu ngadto sa United Nations.
Kun ang Pilipinas makig-gubat sa China, wa ra gyud ta sa kumingking sa ilang puwersa ug sa ilang mga kagamitan. Mangahagsa raman gani ug kalit ang atong mga abyon nga ig-gugubat bisag nindot kaayo ang tiempo unsa kahag tirahan sa rocket sa China.
Nahug bitaw ni sa komedya nga sayon ra kaayong patyon sa lunop ang Pilipinas pinaagi sa pagdagsa sa kinatibuk-ang population sa China dinhi sa ato unya mag-dungan ug pangihi. Hehehehe.
In fairness, tungod sa ka barato sa mga produkto gikan sa China daghan kanato ang mamalit.
Gawas niini daghan sa atong mga batan-on karon ang nakatrabaho sa mga bay patigayon tungod niining pagdagsa sa mga produkto gikan sa China.
