Maayo unta nga daghan pang Blessed Pedro

Karon nga hapit na i-canonize pagkasantos sa Rome, Italy, si Blessed Pedro Calungsod, daghan na kong  nadunggan  nga dunay mga lugar nga nangangkon  ni Calungsod.

Ngan  lagi  nga kining apilyedoha common kaayo sa Kabisay-an ug Mindanao.

Dinhi sa ato sa Sugbo baga ang mga Calungsod sa Ginatilan ug gani gituhoan nga kagikan gyud siya sa maong lungsod.

Bisan ang taga-Mindanao interesado sab ni Blessed Pedro. Duna sab koy nasagap  nga daghang mga Calungsod  didto sa isla sa Guimaras duol sa Iloilo.

Ambot kun makiangayon ba gyud nga  hinganlan siya ug San Pedro de Cebu human unya sa canonization. Di ba unya hinuon kini makamugna  ug disunity sa Kabisay-an ug Mindanao.

Dunay sugyot  sa  uban nga mas maayong nganlan lang  siya ug San Pedro Calungsod aron way lalis.

Si kanhi Cebu Archbishop Ricardo Cardinal J. Vidal mihimog katin-awan nga hinganlan siya og San Pedro de Cebu tungod kay kaniadto ang Cebu Diocese daku kaayo ug jurisdiction.

Sakop niya ang tibuok Sugbo, Kabisay-an, Mindanao, Guam ug ang Marianas Island sigun pa ni Kapusong Albert Aballe nga suod ni Cardinal Vidal.

Hinoon alang nako titulo ra ang paghingan og San Pedro de Cebu  ni Blessed Pedro.

Ang importante nga daghan pa untang matakdan ni Blessed Pedro.

* * *

Dili ko makabasol ni Jake Anthony Anga nga nakadesisyon  nga  dili na mokiha kang PO1 Venerando Bacalso  nga  maoy  nanuntok kaniya,  mipusas ug  mihingan kaniya og  kawatan samtang gibira siya paingon sa sa Minglanilla police.

Ang among papel sa media igo ra  gyung  migiya  kaniya  kun asa siya paingon batok sa pulis nga iya rang  paryente kinsa naghilas-hilas  pag-interbiner sa away nilang  mag-live-in.

Si Jake miingon nga dihang gitagbo sila ni Chief Insp. Bonifacio Garciano niadtong Lunes sa hapon diha sa Cebu City Police Office,  nangayo kaniya og pasaylo si PO1 Bacalso  ug  mi-angkon sa mga sala.

Wa sab talikdi ni Jake ang kamatuoran nga suod nga paryente ilang mga ginikanan.

Pero iyang gipasabot  nga  andam pa siyang  motestigo batok kang PO1 Bacalso sa panahon nga tawgon siya alang sa formal  investigation sa kasong  administratiba sa pulis.

Kining ingon ani nga sitwasyon  alang nako kuli  nang  motunga si Jake  ilabina  nga usa sa iyang katarungan nga gusto siyag kalinaw unya  di siya gusto nga  mabalda sa iyang trabaho.

Kun seryoso gyud  si Chief Supt. Marcelo Garbo, director sa Police Regional Office in Central Visayas,  nga modisiplina sa iyang abusadong pulis unya wa nay interest ang biktima,  available  ang “ Tape-On-Air” sa Super Radyo dySS.

Si Jake nga akong natawgan  niadtong Lunes sa gabii nga mipasabot sa  iyang pag-atras, mi-authenticate  nga wa siya mamakak sa kahinganan sa pagpangabuso ni PO1 Bacalso ngadto sa iyang  pagkatawo niadtong petsa 10 didto sa Mang Inasal sa Gaisano Minglanilla.

* * *

Akong nabasa nga modayon si Cebu Gov. Gwendolyn Garcia nga molansar  pagkasenador  karong 2013 elections tungod kay daghan na ang nag-endorso kaniya.

Bisan ang usa sa mga respetado sa natad sa pulitika sa Sugbo  nga si kanhi governor Lito Osmeña  nipadayag na ug kaandam nga mosuporta.

Bisan si kanhi congressman Raul del Mar nga akong  nahinabi  miingon nga silang mga Del Mar andam  mosuporta  ug taga Sugbo nga magsenador.

Alang nako mas maayong sutaon gyud ni Governor Gwen  kun unsa ka seryoso  kining mga gipadayag nga mga suporta sa ubang mga pulitiko nga di taga-Sugbo kay basig  kutob ra kini sa istorya.

* * *

Grabe  gyud ka law-ay ug bastos kaayo ang mga gipangpublikar sa usa ka tabloid nga “Bagong Toro” gikan sa Manila nga giingong napasad dinhi sa Sugbo.

Usa ka Jaime “James”  Malinao nga taga-Lahug ning dakbayan ang nagsuwat ni Sir Bobby Nalzaro bahin sa malisyoso kaayo nga  publications.

Alang nako angay gyung  subayon sa mga naglangkub sa Cebu Anti-Indecency Board (CAIB) ilabina ni Piskal Aida Sanchez ug ingon man sa grupo nila ni Vice Gov. Agnes  Magpale.

Wa  ra sa kumingking ang kalaw-ay sa mga publications sa Sun.Star Superbalita ug sa Banat News sa The Freeman.

Bold gyud kaayo kay gi-mention gyud ang mga binisayang termino sa kinatawo sa babaye ug lalaki.

Maglaum ko nga di selective ang CAIB ug ubang mga ahensya paglutos sa mga tawong bastos.