“What I see from Jeremy and what I hear in his interviews is he appreciates everything. He pursues his dream. His attitude is so peaceful, but there is strength to him. It is not a violent strength like fire or something aggressive. It is like the ocean, very peaceful, very quiet when you look at it. But you can never underestimate the power that is in there.” —Yao Ming on Jeremy Lin.
Ang unang mihisgut kanako kabahin ni Jeremy Lin mao ang akong higala nga si Joseph Arado sa IT department ning maong pamantalaan. Nanghinaot si Joseph nga makuha sa Lakers si Lin kay usa ka batan-on ug paspas molihok nga point guard sama kang Lin maoy gikinahanglan sa among favorite team nga Los Angeles Lakers. Gipakita ko ni Joseph og usa ka clip sa Youtube diin gilabhan ni Lin ang top draft pick niadtong panahuna nga si John Wall.
Apan daw mas maayo moareglo ang Houston Rockets kay sila may unang nakakuha ni Lin. Interesado ang Rockets ni Lin kay niadtung tungora gatuo pa ang team nga makabalik pas Yao Ming, ang ilang higante gikan sa China, pagduwa kanila. Tingali diha silay damgo sa usa ka Yao-Lin tandem. Apan wala na makabalik si Yao Ming ug nga nanubra na ang ilang point guard nga wa na silay playing time nga ikahatag ni Lin. Ug tungod niani, ila nalang gipada si Lin sa Golden State Warriors.
Apan daw may pagduda sa shooting ability ni Lin ang Golden State mao nga gipada nila siya sa ilang farm team. Ug dihang wa mawagtang ang ilang pagduda ila na lang gipada si Lin sa New York Knicks nga nawagtangan og point guard dihang mibiya kanila si Chauncey Billops kay mibalhin kini ngadto sa Los Angeles Clippers.
Wala say playing time nga ikahatag ni Lin ang New York ug ila sa kining gipada sa ilang farm team. Didto nang haros si Lin sa iyang mga triple double. Ug dihang na out of order ang mga stars sa New York nga sila ni Carmelo Anthony ug Amare Stoudemire, ilang gipabalik sa line-up si Lin ug ilang gipalingkud sa bangko. Ug dihang naluya na ang ilang starting point guard, ilang gipasud si Lin.
The rest is history. Mi score og 25 points, 5 rebounds ug 7 assists sa duwa diin gipilidi sa New York ang New Jersey. Human niadto na starter na si Lin ug midaug og seven straight games ang New York. Si Lin mikuhag 28 points batok Utah, 23 points batok Washington, 38 points batok sa Lakers ni Kobe Bryant, 20 points batok sa Minnesota ni Ricky Rubio. Suma total mi-score siya 136 points sa iyang unang lima ka duwa isip starter. Mao na kuno kini pinakadaku nga score sa lima ka duwa sa usa ka starter sukad pag merge sa NBA ug ABA niadtong 1977.
Nahimong hater niya si Mayweather apan nahimo niyang fan si Obama. Tungod kaniya makasapi na pud ang NBA sa China. Nganong wa man kabantay ang ubang team ni Lin. Stereotype minds rest with the status quo. Para kanila ang insik nga player gikan sa Harvard bright apan dili athletic. Tingali nakalimut sila ni Bruce lee.