Pagkaluoy tawn sa mga Bacolod

Tan-awa ra kun unsa ka bulay-og ning atong gobyerno. Wa ko makasabot nganong ilang gitangtang sa coverage sa witness protection security and benefit program ang upat ka mga sakop sa pamilyang Bacolod nga salin intawon sa massacre sa sakop ni PBMA Supreme Master Ruben Ecleo Jr.

Wa pa gani mahuman ning kasong parricide ni Ecleo unya ila nang gilawg sa terong ang mga Bacolod.

Ipapatay og hurot  ni Justice Secretary Leila De Lima sila si Ricky, Niño, Chlea ug Ricarda Bacolod?

Wa gyud siya maghuna-huna nga risgo  pa gihapon  ang mga managsuon niining mga  panahuna ilabina nga gawasnon pa si Ecleo nga ilang brother-in-law?

Ambot lang kun wa ba gamiti  og  impluwensya  ni Kongresista Ecleo si Justice De Lima nga yano kaayong  mi-terminate sa programa sa mga Bacolod sugod niadtong June 1 nga way prior notice.

Gawas sa mga Bacolod, giwagtang usab sa programa si Gloria Navaja nga lig-ong testigo sa prosecution.

Si Niño Bacolod mitug-an kanako nga kun dili gyud sila mabalik sa programa, wa silay mahimo gawas lang sa pagpamalik og puyo  sa ilang gipuy-an kaniadto diha sa  dakbayan sa Mandaue diin didto sila gipangmasaker.

Naluoy kaayo ko ni  Niño kay automatic na silang dili makadawat og allowance nga tag singko  mil pesos.

Matud ni Niño,  mosamot ang ilang kalisud karon kay gawas nga way klarong trabaho, nagkasakit  pa gyud si Ricky.

Kun ingon ani ang paagi sa gobyerno nga dili na kahatag og proteksyon, manawagan na lang ko nga kun dunay laing piskal nga ma-ambush, wa na lay mobarug nga saksi kay gikan gamiton, pasagdan naman lang.

* * *

Nagka-init karon kining isyu bahin sa pag-convert  sa Osmeña Park ngadto na sa usa ka sementeryo nga nganlan og  Don Sergio  Osmeña  Sr. Memorial Park nga anaa nahimutang  duol sa eskwelahan sa CFI (Lyceum) diha sa barangay Kalunasan.

Ang maong lote nga mikabat og 4.2 ektarya gipanag-iya sa kagamahanan sa dakbayan sa Sugbo  apan gi-donate kini ni Kongresista   Tomas Osmeña atol sa iyang administrasyon ngadto sa Evangelical  Christian Coalition Inc. nga gi-representahan ni Rev. Romeo Borado.

Si kanhi Lahug barangay Captain Mary Ann Delos  Santos nga  karon sakop sa konseho sa iyang barangay  miingon nga ilang gi-kwestiyon  ang regularity sa “Deed of Donation” sanglit  na-execute kini niadtong May 4, 2010 kon unom ka adlaw sa wa pa ang miaging eleksyon.

Mipadayag si Delos Santos  atol sa among  programang “Dialogue on the Air” sa dySS Super Radyo niadtong Sabado  ug ingon man si incumbent barangay Captain Jovito “Dodong” Taborada nga ila gyung supakon ang  pag-establisar og sam-ang sa maong lugar.

Miklaro si Delos Santos  nga may personalidad silang mokwestyon kay ang intero Osmeña Park sakop gyud sa barangay Lahug basi sa 1965 Mapping ug sa Geographical Information System.

Samtang supak usab nga gam-ong sementeryo sila si Kalunasan barangay Captain Nunelon Monares ug ang kanhi kapitan nga si Francisco Pintor ug ang mayorya nga mga sakop sa konseho.

Gani nagpasar na gyud og resolusyon ang Kalunasan barangay council  nga nagsupak niini.

Ang mga residente mipadayag usab sa ilang  hugot nga  pagsupak tungod kay dunay pito ka mga tinubdan sa  tubig mainom ang  maapektahan ug hayan mosamot ka problema ang dagan sa trapiko.

Si Regional Sanitary Engineer Vivencio Ediza Jr. sa Department of Health  miladlad sa tanang mga requirements bahin sa application nga magtukod og sementeryo.

Sa linain nakong pakighinabi  ni  Pastor Augusto “Gus” Adlawan Board of Trustee sa Evangelical Christian  Coalition Inc. mipadayag nga nalipay gyud sila nga gihatag  ug gitugyan kanila  ni Kongresista Osmeña ang maong dapit nga nakasabot sa ilang kahimtang.

Matud ni Pastor Gus nga ilang paningkamutan nga mapadali ang pag-construct sa maong state-of-the art nga memorial park.

Iyang giklaro nga di sab maayo nga pasanginlan sila nga dunay political undertone ang pag-execute sa deed of donation.