Ayaw kompyansa sa hulga, Judge

Tugoti nga akong ipublikar pagbalik dinhi sa akong lindog ang nadawat nga death threat ni Regional Trial Court Judge Raphael Yrastorza gikan sa usa ka (Ka Jerry) kinsa nagpasumbingay nga siya usa ka rebelde ug sakop sa Communist Party of the Philippines New People’s Army.

“Judge, naabot sa pandungog sa kalihokan nga sobra ang imong pagdaugdaug sa mga akusado ug pagyatak sa ilang katungod kabahin sa pagpyansa.

“Ang among kalihokan dili buot nga mga kabusug akusado pagadaugdaugon ug pagayatakan ang katungod.

“Sa among nasabtan ang pyansa kausa da hangtud matapos ang kaso ug dili subli-sublion.

“Sa among tigom, gikahukman ka nga pahamtangan sa silot nga kamatayon. Hatagan ka namo og higayon sa pag-usab sa imong batasan. Ug ayaw abusahi ang imong pagka-judge sugod karong tuiga.

Bilib lang sab ko ni Judge Yrastorza kay isog gyud ug mihagit siya sa nagsuwat nga ipatinuod ang bahad. Wa siyay gikahadlokan nga tawo ug ang bugtong gikahadlukan niya mao ra gyud ang Ginoo.

Daku siyag pagtuo nga dili rebelde ang nagpadala kaniya og suwat sa pagpanghulga.

Mas daku siyag pagduda nga ang responsable mao ang usa ka akusado nga ni-expire na ang surety bond. Akong nahibaw-an nga ubay-ubay na sa mga akusado ang gi-isyuhan og bench warrant sa huwes human napakyas pagpresentar og certification nga naka-renew na sa accreditation didto sa Korte Suprema ang bonding company nga nagpyansa kanila.

Ako sang nahibaw-an nga moduwa sab ang mga bonding company sa ilang gipyansahan pinaagi sa dili paghatag og certification o bisan kopya na lang aron sab mapugos og bayad sa obligasyon kada tuig sa ilang renewal.

In fairness ni Judge Yrastorza akong na-obserbahan nga usa ni siya sa mga huwes nga tarong ug ligdong.

Wa ko makadawat og istorya nga nangurakot ni siya ug wa ko makadungog nga namaligya siya og mga kaso.

Apan ang ako lang ni Judge Yrastorza mas maayong dili niya ipakagamay kining mga hulga nga ingon niini.

Mas maayo nga iya kining ipasubay ug kinahanglang hugtan ang iyang seguridad.

* * *

Nagkaabot ug nagtinubagay sa among programang “Dialogue on the Air” sa dySS Super Radyo niadtong Sabado sila si Chief Insp. Romeo Santander ug ang iyang gikiha nga giingong responsable sa tsunami scare nga radio blocktimer nga si Danilo Cogtas.

Miprangka si Cogtas ngadto kang Santander nga nagmahay gyud siya kun nganong siya ray gikiha nga unta dili man siya maoy nag-una-una sa pagpakatap sa false alarm nga tsunami niadtong Lunes, Pebrero 6 sa hapon.

Apan gipasabot ni Santander si Cogtas nga walang personalan ang tanan. Matud sa opisyal nga wa siyay mahimo tungod kay dunay mga nakasaksi ni Cogtas.

Si Cogtas sa iyang bahin miangkon nga niadtong higayuna diha siya duol sa Pasil Fish Port nga nagsakay sa iyang motor.

Iyang giangkon nga nakasinggit siya makatulo ka higayon nga miabot na ang tsunami apan ang iyang pag-istorya dili alang sa mga tawo kun dili ngadto sa iyang anak nga si Godrain pinaagi sa telepono nga atua sa ilang opisina sa Tabang Sugbo sa Lawaan, Talisay.

Miangkon usab siya nga usa siya sa mga nalisang niadtong higayuna dihang nagkaguliyang na ang mga tawo ug mimando siya sa iyang anak nga pabakwiton sa bukid.

Si Cebu City Mayor Michael Rama nga nakatunga sab sa maong tulumanon mipadayag nga kinahanglang mataral gyud ang responsable sa sayop nga istorya.

Miprangka siya ngadto kang Cogtas nga atubangon na lang ang kaso ug mipahimangno siya nga di mabalaka kay mag-agi ang tanan sa insaktong proseso.

Apan ang nakadaot ni Cogtas ngan nga taga-radyo naningkamot gyud unta siya pagsubay sa baybayon sa Pasil kun tinuod ba nga dunay tsunami. Unsaon nga mipaturatoy man sab hinuon paingon sa Kalunasan.

Ang akong nabalak-an sa tsunami scare mao ang epekto sa mgabatang gagmay kinsa nalisang sab niadtong higayuna nga wa nila ikauban ang ilang mga ginikanan.

Si professor Tata Hernani kinsa usa ka psychologist mipadayag nga duna gyuy epekto kadto bisan sa mga dagkung tawo. Gani molanat pa kini og mga unom ka buwan nga mopakita ang mga timailhan sa epekto.

Magpasalamat lang sab ko sa uban nakong mga bisita nga sila si Supt. Elmer Lim sa Cebu Provincial Police Office, enginner Ver Neil Balaba sa Office of the Civil Defense, City Councilor Michael Ralota sa Association of Barangay Councils ug Basak Pardo barangay captain Dave Tumulak kinsa mituki usab sa ubang mga pagpangandam kun dunay mga kalamidad nga motumaw.

Maglaum lang sab ko ni City Mayor Rama nga duna siyay political will pagpabalhin sa mga nagpuyo kilid sa creek ug sa atong kasapaan dinhi sa dakbayan sa Sugbo aron dili mamiligro ang ilang kinabuhi.