Makapalagot kaayo ang tsunami scare
Natayming nga nagkaon ko sa among canteen sa GMA-7 Compound atol sa pag-igo sa kusog nga linog niadtong Lunes sa udto nga mirehistro og 6.9 magnitude sa Richter scale.
Ako gyung nabatyagan ang gikusgon tungod kay mituya ang lamesa unya medyo mibawod ang among salog.
Wa koy laing nahimo gawas sa pagpanguros ug pagpangayog pasaylo sa Kahitas-an ug pagpangaliya kay Siya ray nasayod sa tanan.
Wa maglangay nag-abot-abot ang mga text messages sa among mga tigpaminaw gikan sa lain-laing kalungsoran dinhi sa Sugbo, sa Negros, sa Bohol ug sa Leyte nga mihulagway sa gikusgon sa maong linog.
Gawas pa dunay mga text messages nga akong nadawat gikan sa mga nagpanic nga mga trabahante sa Kapitolyo, sa Palace of Justice, sa City Hall ug sa lain-laing mga establismento.
Nakasabot ko sa gibati sa uban nga nabalaka ug nahadlok tungod kay normal man gyud nga dunay mga aftershocks sa linog.
Akong giuna pagsubay ang kahimtang didto sa Kapitolyo ug sa Palace of Justice.
Nakit-an pa nako ang mga nangluspad nga mga dagway ug nagkalgag nga mga buhok sa atong mga opisyales ug mga kawani.
Tense gyud kaayo ang tanan nga maoy hinungdan nga gisuspenso dayon ni Metropolitan Trial Court in Cities Judge Executive Francisco Seville ang trabaho sa mga kawani kay anaa sila sa fourth floor sa building. Pero nalangay sa Regional Trial Court kay nananghid pa sa Court Administrator sa Supreme Court Manila.
Dunay mga subo nga sugilanon nga akong nakuha kay dunay mga nadakin-as ug nangatumba sa salog nga mga court personnel kay iyahay man og gawas sa edipisyo.
Duna say mga kataw-anan nga estorya kay dunay mga humba nga gituslok nag tinidor ang gibiyaan.
Practically wa gyud magamit ang fire ug earthquake drills sa mga trabahante.
Human napugos pagsuspenso sa mga klase ug trabaho human sa linog, akong gikuha akong mga anak.
Pero wa pa mahuman ang kalbaryo sa kahadlok sa mga tawo kay dunay mga iresponsable nga nagpakatap og estorya nga ang tubig sa dagat miabot na sa Carbon area.
Gisakyan gyud sa mga kanahan ang tsunami alert level 2 nga gipagawas sa Philippine Institute of Volcanology and Seismology.
Paspas gyud kaayo ang pagpakatap sa estorya kabahin sa tsunami scare.
Wa abti og sinko minutos naabot ang istorya nga ang tubig-dagat naabot na sa may JY Square Lahug.
Haskang paita gyud kay ang mga nailad sa istorya nagsininggitay ug na nga biyaan ang mga balay. Daghang nanaghilak.
Bisan among mga tiguwang nga sakop sa pamilya ug mga gagmayng bata pulos na nanaghilak ug mi-adto og mas tag-as nga lugar ilabina sa Busay.
Ngan nga anaa ta sa komunikasyon, akong gipakalma ug gipapaminaw nako sa among sibya nga di tinuod ang tanan.
Ako mismo nga migawas sa kalsada nakasaksi ko sa mga tawo nga naglumba ug padagan sa ilang mga sakyanan paingon sa bukid.
Ang uban lumba og bunlot sa ilang mga motor ug sibat paingon sa Busay.
Pwerteng paita gyud sa kahimtang. Grabeng traffic unya dunay mga sakyanan nga nagdumbolay nga wa na lay reklamohay kay lumba ug eskerda.
Sa nahitabo nganong nalangay man ang kapulisan, kabomberohan ug ang atong mga local nga mga opisyales pagpakgang sa tsunami scare? Asa man ang atong mga barangay kapitan? Naglumbag pangatug?
Mao sab ni ang nakadaut karon sa atong panahon nga high-tech untag ngan pero tungod sa ka-high tech sayon ra tang mailad.
Kun kinaraan alang sa uban ang pagdala og portable radio sets, mas maayo tingaleng i-upgrade ang atong mga cellular phones nga duna na gyuy AM radio ang tanang unit aron dali ra ang pagkuha ug tukmang impormasyon gikan sa mga responsableng magsisibya.
* * *
Salamat sa akong mga kaubanan sa dySS Super Radyo Basketball Team nga milampos kami pag-pilde sa Team B sa Mabolo Community Basketball Association (MCBA) niadtong Domingo diha sa Mabolo Gym.
Tungod sa maong kadaugan, kami maoy makigtigi sa kampiyonato karong adlawng Domingo batok sa MCBA Team A.
Maningkamot mi kutob sa among mahimo nga mapildi namo sa depensa, rebound ug pinuntosay ang mga higanteng player sa MCBA Team A.
