Diin ka dihang gitay-ug ang atong lugar sa magnitude 6.9 nga linog?
Matud pa sa Queen of Cebu nga si Bee Urgello nga natulog pa siya ug ang linog mao ang iyang wake-up call. Galabyug-labyog ang ilang chandelier.
Ang atong kauban sa Cebu Daily News nga si Abigail Caruana gapa-doktor sa iyang anak sa second floor sa CUPS. Ang MAC model nga si Joni Alburo ga-duty sa usa ka ospital isip nurse.
Didto sa Ayala, sulod sa Casa Verde ang beauty queen ug GMA-7 host nga si Ana Igpit, naniudto. Nanagan na kunos gawas ang uban niyang kadungan og kaon apan iyang gitiwas ang iyang paniudto ug nangayo pa siyag additional rice. Tingali gilamian si Ana sa sud-an sa Casa Verde o di ba hinuon salig kaayo siya sa structure sa Ayala.
Samtang sa SM, misuroy sa Exposure, usa ka photo shop sa fourth level, ang atong higalang photographer nga si Cesar Ledesma.
Ang performance artist nga si Chai Fonacier didto pa sa airort sa Cagayan de Oro paglinog dinhi. Pag-abot niyas Lahug maoy iyang nakita ang mga tawo nga nagkaguliyag dagan tungod sa tsunami scare.
Samtang ang resident graphic artist sa Dalaguete nga si Mark Luzano, ga-Facebook samtang ga-edit sa audio-visual production para sa usa ka pasundayag sa gabii. Gasige kuno siyag ampo og, “Lord help me, help us, please.”
Matud pas designer nga si Lemuel Rosos, mi-panic kuno siyag apil paglinog. Ug paghuman sa linog may nakit-an kuno siyang “crack” sa luyo sa iyang shop. Samtang ang lain natong kailang designer nga si Ren Manabat diha sa sulod sa iyang sakyanan nga mihunong sa may stoplight. Abi niyag giuyog kini gikan sa luyo apan wa siyay tawo nga nakit-an. Dihang may mga nanggawas gikan sa building diha pa siya kaamgo nga dihay linog. Nakuyawan kuno siyag kadiyot apan nikalma siya dihang nadunggan na niya ang taho sa radyo.
Sa among eskwelahan sa Cebu Technological University, ang beauty titlist nga maestra nga si Marigold Lebumfacil gaklase sulod sa usa ka tent. Sa ato pa di kaayo kuyaw ang iyang pagkabutang kay tent ra may mahugno kaniya ug dili man concrete. Ang estudyante nga si Grace Tancawan diha na sa ground pero nakakita gihapon siya sa kagubot sa mga tawo sa campus.
Ug karon samtang gasuwat ako ning maong lindog duna pay mga aftershock nga mouyog sa akong lamesa.