Nagsakit akong dughan nga naminaw sa akong kababayan nga taga-Lanao, Dalaguete nga si Josesimo Alcaraz nga miasoy kanako nga siya gitaktak pagka-driver ni Cebu Archbishop Jose Palma.
Ang iyang sala mao ra gyud kadtong nakadasmag siyag babaye nga mikalit og labang diin nakagasto ang simbahan sa ospital ug P50,000 kapin.
Ang nakaporke pa gyud kay gipildi siya ni Labor Arbiter Maria Ada Aniceto Veloso sa iyang gipasaka nga kasong illegal dismissal sa National Labor Relations Commission (NLRC).
Sa hukom sa NLRC, igo ra siyang bayran sa kantidad nga P3,500 sa 12 ka tuig niyang serbisyo.
Ang iyang abogado nga si Franklin Mancing nga wa sab malipay sa desisyon mihimo na og apelasyon.
Ang taga-Simbahan nagmakuli na sa pagtubag sa maong isyu sumaa pa ni Bexmae Jumao-as, among kauban sa GMA-7 Balitang Bisdak.
Salikwaot gyud kaayo kining isyuha kay samtang ang Simbahan nagbalik-balik kanunay sa pagpahimangno sa doktrina sa pagpinasayloay ug pagbaton og gugma apan dinhi mipatigbabaw ang gahum ni Satanas.
* * *
Naklaro niadtong Sabado atol sa among programang “Dialogue On the Air” sa dySS Super Radyo ang mga isyu batok sa management sa Metro Cebu Water District kon MCWD.
Salamat ni MCWD general manager Armando Paredes nga nagpadala siya og mga tawo nga direktang nanubag sa mga isyu sama nila ni Ernie Delco, assistant general manager for Operations; Edgar Donoso, assistant general Manager for finance; Wawa Teñedo, manager for corporate planning and development; engineer Raul Tabasa, Manager sa engineering department ug Charmaine Rodriguez, manager sa public affairs department.
Gitin-aw sa maong mga opisyales nga di gyud tinuod kining mga alegasyon nila ni Aaron Pedrosa sa Freedom from Debt Coalition (FDC) ug sa MCWD Employees Union ug ubang pundok nga mangutang sila ug P800 milyones sa Asian Development Bank (ADB).
Ilang giklaro nga ang P2 milyones nga grant gikan sa ADB alang sa MCWD ug sa Water District sa dakbayan sa Davao usa lang ka hinabang aron pagtuon ug mga programa sa pagpalambo sa panerbisyo ug di kini pagpugos sa MCWD nga mangutang sa ADB.
Ang mga kadagkuan sa MCWD mibutyag nga samtang duna pa silay utang sa Development Bank of the Philippines di sila magpataka og pangutang nga maoy makapabangkaruta sa panudlanan.
Pero alang kanila, way problema kun mangutang ang MCWD basta kaya nga bayran ug alang sa pagpalambo sa water district.
Ilang gipasabot nga ang mga kabalaka nga i-privatize layo ra gyud kini kay sila mismo supak gyud kay seguradong maapektahan ang ilang pagpang-empleyo.
Si Pedrosa sa iyang bahin miinsister nga namakak gyud ang taga-MCWD ug nakasaway pag-ayo kay matud pa way transparency.
Iyang giinsister nga ang website sa ADB nga nagbutyag sa proposed loan sa MCWD usa ka dakung sukaranan sa ilang pagtuo nga seryoso gyud ang taga-MCWD nga mangutang hangtud nga ang mga konsumidor maoy magpas-an sa problema.
Apan gihagit siya ni Charmaine Rodriquez sa pag-produce sa loan contract o loan package. Matud ni Charmaine nga pulos lang speculations ang gihimo nila ni Pedrosa.
Ang naka-alegre atul sa maong programa kay wa gyud kalikayi ang pagpangugat ni Charmaine ug nakapadayag nga kining pagsigeg tagawtaw nila ni Pedrosa klaro kaayo nga dunay “ill motive” ngan nga mga walhon.
Apan si Pedrosa mipahimangno nga di lang sila hinganlan og mga walhon ug miklaro nga kining ilang kawsa karon di sa ingon nga mangayo sila og funding gikan sa gawas.
Giangkon usab ni Teñedo nga duna silay pending petition niadtong miaging Nobyembre ngadto sa Local Water Utilities Administration nga pasakaan ang singil sa tubig.
Wa siyay gitug-an nga figure basta ang iyang gipasabot nga mga formula lang ang ilang gipresentar sa LWUA apan matugkad lang kini atol unya sa public hearing sa walo ka mga Local Government Units nga gisebisyohan sa MCWD ug kini gilangkuban sa Cebu City, Mandaue, Lapu-lapu, Talisay, Cordova, Consolacion, Lilo-an ug Compostela.
Matud niya nga kun supakon ang ilang gipangayo nga water rates increase mag-agad ra sila sa LWUA kun hatagan ba gyud sila ug pagtugot.
Gipasabot sa mga kadagkuan sa MCWD nga gikinahanglan na gyud nga dunay usbaw sa bayranan sa tubig kay taud-taud na silang wa mangayo ug niadto pang 2006 ang katapusan nilang pagpasaka.
Gawas pa nagmahal na ang tanan ug apektado usab sa inflation rate.
Daku silag pagtuo nga dili supakon ang ilang gipangayo nga usbaw kay ang tumong niini mao nga aron mas mosamot sila ka epektibo sa ilang serbisyo sa 140 mil ka mga customers pagkakaron.
Si Donoso miingon nga samtang mo-gross income ang MCWD og P100 million matag buwan apan molimpyo lang sila gikan P6 milyones ngadto sa P10 milyones tungod sa mga maintenance ug mga bayranan.
In fairness sa taga-MCWD nga kun mangutang man sila o mopatuman og usbaw segurohon gyud nga mobalik ra gihapon kanatong mga konsumidor sama sa paghatag ug maayong serbisyo.