Sex drugs?

Nyor Gamay (NG): Sex drugs kuno Nyor…

Nyor Daku (ND): Ha? Unsa man na? Sex, Drugs and Rock n’ Roll?

NG: Undangi na gani nang imong pagka hippies Nyor kay nahurot nag kamatay ang mga hippies.

ND: Unsa man diay ning gi-ingon nimong sex drugs?

NG: Kani bang gi-akusar nila karon ni Gadafi sa Libya nga nanghatag kuno kini og sex drugs sa iyang mga tropa para mang rape silas mga babae sa pundok sa mga rebelde.

ND: Hahaha.

NG: Nganong nikatawa man ka Nyor?

ND: Nyor, wa pa matao si Kristo, wa pa matuli si Moses, naghimo pag kasing si Abraham, nangita nag sex drugs ang kalibutan apan hangtud karon wa pa gyud hipalgi ang instant pabiga sa tao. Gani duna na silay gipangan niani -aphrodisiac. Segunda lang tingali ang kahinam sa tao sa aphrodisiac sa kahinam niani sa fountain of youth. Suma, unsa may gihugonhugon nga aphrodisiac sa Cordova?

NG: Bakasi.

ND: Nakatilaw na ka niani?

NG: O, Nyor.

ND: Unya nang layog baka’g babaye paghuman nimo’g kaon niani?

NG: Wa sad tawon Nyor uy.

ND: Di ba nakatilaw naman sad ka aning putahing pangpagana kunohay nga gipilahan sa may Ramos? Unya gikabay-an ba nimong kahira pagpaningil niya?

NG: Kon mangabayo naman lang sad gani ko Nyor uy di sad diha sa Ramos kay duol ra kaayo sa pulis station. Pero unsa man diay ning gitawag nila’g Viagra ug Cialis? Di ba sex drugs man ni sila?

ND: Nyor kanang maong mga tambal o drugs dili pampamiga. Alang kani sila sa mga gabiga na apan di na makapatindug o maka pagahi sa ilang hinagiban. Ang buhaton sa maong mga tambal mao ang pagpabukad sa mga nikuo na nga ugat sa kianatao haron mokusog ang circulation o pagpadagan sa dugo sa maong parte sa lawas. Kon motumar ka niining maog mga tablitas unya wala ang biga sa imong panghunahuna og pamati ang mamatikdan mo lang mao ang pagkusog sa pitik sa imong kasingkasing nga maoy nangusog pagpadagan sa dugo sa imong mga kaugatan. Mao nga dili ipagamit kining maong mga tablita sa mga tao nga may sakit sa kasingkasing. Ang biga gud naa man manukad sa hunahuna. Sex is in the mind, matud pa. Ang problema lang sa uban kay sex just stays in the mind.

NG: Ang Marijuana, Nyor?

ND: Tungod tingali kay illegal man ang Marijuana Nyor mao nga daw na exotic kini. Apan kon di ka bigaon, Nyor, unya mag marijuana ka, magsigue ka la’g katawa di maghunahunag pakighilawas. Kadtong bigaon na daan unya mag Marijuana daw mas heighten ang ilang pamati sa ilang gibuhat, mas ma feel nila ang ilang gihimo. Pero dili maka pabiga ang Marijuana sa dili bigaon.

NG: Sa ato pa Nyor, wa diay sex drugs?

ND: Naa. Apan dili chemical.

NG: Wa ko ka “G” Nyor, dah. Unsa man diay ni sila?

ND: Sama sa una ang gada sa biga mao ang kwarta ug gahum.

NG: Mao ba Nyor?

ND: Kon duna kay daghang alahas nga ika gasa mahimong mapildi mo ang basketbolista sa pagkuha sa usa ka beauty queen.

NG: Yamat ra!

ND: Kon ikaw sundalo nga ni-apil pag raid sa usa ka balwarte ug nahurot mog patay ang mga kalakin-an didto ug naas imong poder ang mga batan-ong babaye, manginahanglan ka bag sex drug? Labi na kon gadagan pa ang imong pagka agrisibo gikan sa pagkigsangka. Dili tanang sundalo manyak apan ang gubat, nga dili normal nga padagan sa kinabuhi, makausab sa panan-aw sa kinabuhi. Dunay mga na war-shock nga nabayot, duna usay daghang nangabuang.

NG: Unya unsa man ning ilang pasangil nga nanghatag og sex drugs si Gadafi?

ND: Propaganda ra na Nyor. Ganahan man gud ning mga Westerners og hulagway sa yawa mao nang ila karong himuong yawa si Gadafi. Ug buot nilang ipaguwa nga bisan ang biga ug ka bangis sa Army sa Libya gikan kang Gadafi.