www.haw-askalisud.com
Indie times? Bag-o lang nahuman ang awarding sa Sinulog Short Film and Documentary contest, nangandam na ang akong higala nga si Januar Yap sa ilang Cine-U 2012 sa Cebu Normal University. Gani ga plano kong mokuhag usa sa ilang nindut kaayo nga T-shirt para sa maong kalihukan nga dunay tatak nga “People Make Movies.” Ug ganina lang udto ga press con ang Cinema One Originals para sa ilang Digital Film festival nga ipahigayon karong Pebrero 11 ngadto sa 16 sa Cinema 8 sa SM Cinemas. Tag 100 ang giingong pulta sa matag salida.
Dunay lima ka Binisaya nga pasundayag ang maong digital film fest. Naglakip kini sa “Ang Damgo ni Eluteria,” “Di Ingon Nato,” “My Paranormal Romance,” “Confessional,” nga puros gikan sa Cebu, ug ang “Imburnal,” nga gikan sa Mindanao.
Ang “Confessional” nga kabahin sa pagpatay sa usa ka politiko atol sa Sinulog napasalida na sa una sa SM. Ang atong amigo nga si Pubs Briones maoy nida sa maong politiko. Nakadawat siyag Best Supporting Actor sa iyang pagdala sa maong papel.
Intra usab si Pubs ning bag-ong salida nga “My Paranormal Romance.” Nominated siya pagka Best Actor ning maong salida apan wala siya makadaug. Dual role ang gidala ni Pubs diri. Siya ang midala sa kaluha nga babaye ug lalake. Matud pa ni Pubs, maglisud siya pagdaug kay ang papel sa iyang mga kabangga puros man mga purduy ug luoy kaayo ang mga roles. Pildi na siya daan sa sympathy votes.
Ang “My Paranormal Romance” kabahin sa usa ka babaye nga dunay third eye ug giunsa niya pagdawat ang maong gasa. Si Phoebe Kaye Fernadez sa ABS CBN Cebu maoy gada sa papel ni Merry, ang babaye nga dunay third eye.
Speaking of the paranormal, murag sadya kining salida sa lain natong amigo nga si Ivan Zaldarriaga. Kay kabahin man og mga Zombie sa usa ka baryo sa bukid sa Sugbo kining iyang pelikula nga “Di Ingon Nato.”
Ang multi awarded nga “Ang Damgo ni Eluteria” kabahin sa usa ka dalaga nga gitupo sa iyang katilingban ngadto sa usa ka German national nga ilang gituohan nga makahatag kaniya og maayong kahimtang sa kinabuhi. Current ug relevant kaayo kining topic sa maong pelikula. Gani makahinumdom man kos binuang sa akong mga kaila nga kadto kunong nangitag pamanhunon gikan sa gawas mo log on lang sa www.haw-askalisud.com ug adto manimpad.
