Blangko pa gyud ang Liloan Police Station kay wa pa mailhi ang mga responsable ug wa pa gyud matumbok kun unsay motibo sa pag-ambush-patay kang Senior Jail Officer 1 Leo Labata niadtong Lunes sa hapon duol sa ilang pinuy-anan sa lungsod sa Liloan.
Ang biktima sakop sa Bureau of Jail Management and Penology ug anaa nadestino sa New Cebu City Jail-Bagong Buhay Rehabilitation Center Kalunasan.
Manghud siya ni Cebu City Assistant Prosecutor Simaco Labata.
Dunay mga nanggawas nga istorya nga estriktong klaseng gwardya si Labata ug gani nakadawat kini ug mga pasidungog makaduha ka higayon dihang nakasakmit og shabu nga buot ipalusot sa prisohan.
Kun shabu man ang hinungdan sa iyang kamatayon, posible ba nga dunay kalambigitan ang uban niyang mga kauban sa BJMP nga kakonsabo sa palusot sa mga kontrabando nga nasilo sa iyang kaligdong?
Pagkatinoud lang, mas migrabe karon ang mga pagduda nga may kalambigitan ang mga gwardya sa palusot ug shabu alang sa mga binilanggo tungod kay wa gyud mibahar ug wa gyud masulbad kining maong problema sa mga bilangguan.
Gani, mao kini ang hinungdan kaniadto nga nagbutang ang Cebu city government og mga sakop sa Barangay Intelligence Network (BIN) sa maong jail facility.
Sa pagkakomplikado ning maong krime,n mas maayong moapil sa imbestigasyon ang National Bureau of Investigation (NBI). Kun mahimo mag-umol na lang og “Task Force Labata” ang kapulisan uban sa taga-NBI aron matutokan kini og tarong.
Akoy naluoy ug nakasimpatiya kagahapon kang piskal Labata nga maguwang sa biktima kay puwerteng hilak dihang akong naistorya.
Iyang gipadayag ang iyang pagmahay sa mga responsable sa krimen ug nanawagan siya sa kapulisan nga imbistigahon og tarong.
Daku siyag pagtuo nga “job related” gyud ang nahitabo sa iyang manghud kay way kontra sa ilang mga silingan.
Makaluluoy gyud ang pamilya ni Jail Officer Labata kay gagmay pa iyang mga anak.
Gani matud pa ni piskal Labata nga practical na lang ang ilang pamilya ug anha lang sa ilang gipuy-an sa Lilo-an ang haya ug mangita pa sila og kalubngan nga kaya sa ilang bulsa.
* * *
Wa gyud mapan-os akong istorya ug komentaryo sa kasong qualified theft batok kang Joselyndo Jabagat gwardya sa GDS Security Agency nga nadestino sa Cebu City Sports Complex nga maoy gikasohan sa giingong pagkawagtang sa P1.6 milyones sa Sinulog Foundation human sa Sinulog Grand Parade 2012.
Way kalainan ang akong pagbasa sa kaso sa resolusyon nila ni piskal Gandhi Truya ug City Prosecutor Nicolas Sellon nga angayang i-dismiss ang kaso batok sa gwardya tungod kay wa gyuy testigo nga mitumbok nga siya maoy nagkawat sa kwarta.
Mensahe kini sa atong kapulisan nga dili lamo-lamuon ang pag-imbestigar sa kaso.
Kinahanglang himuon ang ilang trabaho sa pagsubay og tarong sa kaso kay wa pa maigo sa law on double jeopardy.
Sama sa akong giingon kaniadto pa nga wa ko moingon nga inosente na ang gwardya nga si Jabagat apan nagkinahanglan kita og konkretong ebidensya.
Kumusta na man tuod ang imbestigasyon sa NBI sa giingong kawat sa P1.6 milyones? Tinuod ba gyud nga dunay kawat? O gipasiatab lang nga dunay kawat nga nahitabo aron pagtabon sa corruption sa pundo sa Sinulog Foundation?
* * *
Mangayo na lang ko ug dispensa ni Regional Trial Court Judge Ester Veloso ug sa iyang mga staff nga nag-alburoto gyud pag-ayo dihang ilang nakit-an ang napublikar nga hulagway sa huwes sa publication kagahapon dinhi sa Cebu Daily News sa husay niadtong Lunes sa buntag sa kaso ni Bella Ruby Santos.
Ang ilang nabalak-an mao ang security sa huwes tungod sa kadaghang mga dagkung kaso nga gipanggunitan.
Nakasabot ko sa ilang gibati kay gawas nga babaye ilang huwes, wa say escort si Judge Veloso sa mga panahon nga molakaw kini.
Isipon na lang nga tipik ug kabahin sa risgo sa mga huwes nga sila mailhan sa publiko.
Maglaum lang ko nga taliwa niini, dili mopatuman og media ban si Judge Veloso sa panahon nga bistahon ang kasong pagdagit ug pagpatay sa bata nga si Ellah Joy Pique.
Unsa ka tinuod nga nadakpan nag balik si Ian Charles Griffiths, ang uyab ni Bella?
Kun nadakpan na, kinahanglang dalhon si Griffiths dinhi sa Sugbo aron itaral sa maong kaso.