Sugod nag bukal ang kawa sa politika

Kun madayon ang Hilario Davide III ug Agnes Magpale tandem pagka-governor ug vice governor sa sunod piniliay, medyo panington gyud og bugbog ang kontra.

Way lalis lig-on si Davide sa habagatang bahin sa lalawigan sa Sugbo ug mangharos usab si  Magpale sa  amihanang bahin ilabina  diha sa kinto distrito.

Pun-an pa karon nga si Davide pinangga sa administrasyong Aquino.

Pero kun di madayon ang tandem nilang duha ug molampos ang kampo sa mga Garcia pagkonbinse kang Magpale nga mouban kanila,  magkamudmod sab ang kampo ni Junjun Davide.

Alang nako, mas nindot ang away  kun tulo ka tandem ang pilian sa mga botante.

Kun nakaporma na ang mga Garcia ug Davide, mas maayong magsamok-samok ang mga Osmeña nga ligdong sa politika  aron makita gyud ang katag.

* * *

Daku na gyud kaayo ug ikatabang ang teknolohiya karon  alang sa atong seguridad.

Sama sa nahitabo sa Gemmary Pawnshop and Jewellery sa barangay Lahug  niadtong  Domingo  nga wa matiwas ang paglungkab sa mga alahas ug kuwarta kay mitingog ang alarm system nga nakakonektar sa kapulisan.

Kun paltos pa ang alarm system, hutdan gyud unta ang maong pawnshop kay daku sab og puhunan ang grupo nga gitawag og “Acetylene Gang”   nga mga kanhi minero sa Benguet Province.

Nahurot akong bilib sa abilidad ning maong pundok kay maayo kaayong mohimo og tunnel paingon  sa ilang  target.

Maayong kuha-on ning  mga tawhana sa gobyerno aron sa panahon nga dunay lisud nga military operations o police operations sila maoy pakawoton og tunnel.

Pagkakuyaw kun kining mga tawhana  makigkonsabo sa mga gun- for-hire unya sila maoy tahasan aron pagsulod sa balay sa target nga  patyonon.

* * *

Lahi na ang estado karon sa taas og luag nga kalsada sa South Reclamation Project ug ingon man sa North Reclamation Project kay daghan nang  lungag  ug libaong.

Delikado na gyud kaayo alang sa mga motorista  ilabina niadtong magpasagad og patulin sa ilang mga sakyanan unya  dili suheto sa mga lugar kun asa dapita ang libaong.

Daghan nang mireklamo sa mga libaong kay maoy hinungdan sa mga disgrasya apan  medyo  gipasagdan  lang sa atong mga kadagkuan.

Unsa may  nahimo sa mga kadagkuan  sa Department of   Public Works and Highways ning maong problema? Asa man ang  kwarta sa maintenance niini?

Unsa man sab ang nahimo ni Cebu City Mayor Michael Rama sa problema sa habig diha sa SRP?

Sa habig ni Mayor Cortes sa Mandaue nagpabuta-bungol lang sa kahimtang sa North Reclamation Area?

Maglaum ko nga wa kini katulgi sa mga nagdumala karon sa Regional Development Council kon RDC.

* * *

Si Kapitan Narciso “Boy” Tablate sa Inayagan, Naga nanawag ug nagpahibawo nga dunay duha ka mga driver’s license ang gi-turnover sa ilang barangay hall.

Ila  ni Napoles,  Arnel Y Lamo  nga taga T. Padilla ning dakbayan diin ang maong lisensya  mo-expire  karon  pang tuig 2014 samtang ang ikaduha  iya kang  Pardillo,  Renato Jr  Y Aliganga  nga taga Sto. Niño Mainggat,  Toledo City diin mo-expire karong Mayo.

Giawhag kun kinsa ang nakaila sa duha pag-claim didto sa Inayagan Naga barangay hall.

* * *

Mga  residente  sa  Labogon dakbayan sa Mandaue nangreklamo kay  matud pa sobra na usa ka buwan way kuha-kuha ang ilang mga basura.

Ilang gipaabot ang maong problema kang kapitan Damaso Tumulak apan matud pa inutil  kay  guba ang garbage truck sa ilang barangay.

Mikomedya ang ubang molopyo nga tungod sa gidugayon nilang inantos  nalata nalang ang di  malata.

Maglaum ko nga paspasan nilang kapitan Tumulak ang  pagsulbad sa problema  ug  unta  tabangan  sab ni Mayor Cortes  kining giantos sa atong mga kaigsoonan diha sa Labogon dakbayan sa Mandaue.