Gisabotahe among programa sa Minglanilla
Haskang paita gyud sa among kahimtang niadtong Sabado sa hapon sa among programang “Dialogue on the Air” sa radio dySS didto sa lungsod sa Minglanilla kay hapit gyud nga dili mi makaprograma didto nga live.
Mitiabaw intawn ang akong mga technical staff kay gipaalarma sila sa kapulisan ug gipangayoan og permit gikan sa munisipyo samtang nag-set up na og nagpahimutang na sa among broadcast equipment diha sa ilang plaza ubos nga bahin sa ilang simbahan.
Si police officer Capangpangan sa Minglanilla police maoy mibadlong sa among mga staff nga dili ipahinayon ang pag-set up sa among mga equipment sa plaza kay duna kunoy nanawag kanila.
Mao nga akong giadto si kapitan Anabelle Simene sa barangay Ward 3 nga unang mitugot kanamo nga adto lang mi makapahimutang sa ilang barangay hall.
Apan kalit kaayong nausab ang baruganan sa kapitan ug dili na siya motugot kay mananghid pa siya sa iyang mga konsehales.
Gawas pa, miingon ang kapitan nga di sila mag-apil-apil sa problema kay dunay “separation of powers between the church and state.” Loslos gyud kaayo ning argumento sa kapitan kay duna siyay konsehal nga maoy nangunay pagsawom sa mga sacristan aron ipaatras ang ilang mga testimoniya.
Tungod sa kaapiki na sa panahon, wa nalang ko molalis sa kapitan sa iyang pagka-iresponsable ug way baruganan.
Nanawag nalang ko ni Senior Supt. Patrocenio Comendador, atong Provincial Police Director nga katugtan ming makapahimutang sa Minglanilla Police Station kay duol ra sab sa simbahan.
May gani wa maglangay, mihatag kanamo si Comendador og pagtugot mao nga didto mi nasun-ok sa among sibya sa buhatan sa kapulisan ug late mig 20 minutos sa programa.
Daku kog pagtuo nga ang kaparian sa Minglanilla nga gipangulohan ni Padre Jojo Deligero ug ang mga supporters maoy nagmaniobra aron pagsabotahe unta sa among programa kay daan na silang mipasidaan nga di gyud motambong ug di gyud sila mosugot nga adto sa Minglanilla ang venue sa programa.
Pero pasalamat lang sab ko nga dunay mga tawo nga lahi ang panglantaw nga maoy hinungdan nga milampos ko sa akong programa.
Sa isyu kun angayan bang hulipan ang tanang mga pari diha sa Minglanillam alang nako, kadto rang nakahatag og buling karong bag-o.
Maayong mamutos na sila si Padre Ladie Tangente ug Padre Hernani Bercede nga nakahimog eskandalo sa ilang mga law-ay nga binuhatan.
Sa testimoniya sa tulo ka mga sacristan niadtong Sabado, tataw pa sa klaro ang mga isyu batok sa duha ka mga pari. Panglayas namo oi! Ayaw mo pagpakaulaw!
Ang ako lang mensahe ngadto ni Padre Deligero nga maoy team moderator nga di siya magpasulabi og depensa sa mga kauban niyang badlongon ug di siya mag-onion-skinned kun gusto siyang magpabilin diha sa Minglanilla.
* * *
Misamot ang akong pagduda karon nga gihimo lang nga “sacrificial lamb” ang gwardya nga si Roselyndo Jabagat sa giingong paglungkab ug pagkawat sa dul-an P1.7 milyones diha sa Cebu City Sports Center human sa Sinulog Grand Parade 2012.
Ambot kun unsay gidalian sa kapolisan sa Theft and Robbery Section Cebu City Police Office pagkiha dayon kang Jabagat sa kasong qualified theft sa piskaliya nga unta angayan pa mang subayon og tarong kining tanan.
Dili ba salikwaot paminawon ang gihimo sa kapulisan nga samtang nag-una-una sila pagkiha sa guwardiya unya nagpadayon pa ang taga National Bureau of Investigation in Central Visayas pagsubay nilang Ricky Ballesteros, executive director sa Sinulog Foundation ug iyang mga gingsakpan kun kinsa ang namakak pinaagi sa polygraph examination?
Wa kahay gitapin-an niining tulin pas alas-kwatro nga aksyon sa kapulisan?
With all due respect ngadto kang Cebu City Assistant Prosecutor Ghandi Truya, unsa may ebidensya batok ni Jabagat kun iyang ipasaka sa korte ang kaso?
Makapakonbikto ba sa gwardya ang mga taphaw nga deklarasyon sa giingong mga testigo?
Nagduda ko sa ilang script nga wa magka-dimao!
* * *
Akong sublion nga wa gyuy sayop ang gobyerno sa Pilipinas ilabina ang atong kapulisan dinhi sa Sugbo pagdakop niadtong Norwegian national nga si Sven-Erik Berger ug sa uyab nga si Karen Esdrelon kaniadtu nga maoy unang gituhoan nga sila maoy responsable sa pagdagit ug pagpatay sa 7 anyos nga bata nga si Ellah Joy Pique sa Minglanilla.
Trabaho sa atong mga otoridad ilabina ni Police Senior Supt. Erson Digal isip kanhi Cebu Provincial Police director ang pagsubay sa kaso ug pagkuha og mga saksi sama niadtong mga bata nga maoy mitumbok nilang Berger ug Esdrelon nga maoy mga responsable.
Ang dakung sayop mao kun gitugtan nga makalarga ang mag-uyab paingon sa Hong Kong diha sa airport taliwa nga sila maoy gipangtumbok sa mga bata.
Klaro kaayo nga ang gihimo sa gobyerno ug sa kapolisan nahasubay sa prinsipyo sa “regularity in the performance of duty.”
Hinuon, katungod usab nila ni Berger ug Esdrelon ang pagkiha og pagpangayo ug $60 million damages batok sa Pilipinas pinangulohan ni Presidente Benigno Aquino III didto sa United Nations Human Rights Council–Office of the High Commissioner sa Geneva, Switzerland.
Katungod pag-kuwestyon ni bisan kinsa sa naapiki sa lehitimong aksiyon sa gobyerno apan tungason kaayo ang pag-proyba nga nalapas ang ilang mga katungod niadtong mga higayuna.
Wa pa gyud nila ikalipay ang gihimo sa Office of the Governor nga sakop sa gobyerno sa Pilipinas nga mihimo og nilain nga imbestigasyon sa kaso nga maoy naingnan sa sayo nilang pagkaabswelto sa kasong pagdagit ug pagpatay sa bata?
