Gitaktak na ang seminarian nga kiriwan
Magpasalamat ko sa mga kadagkuan sa Simbahang Katoliko ug sa mga nagdumala sa San Carlos Seminary College kay gipahamtangan na og silot nga expulsion kadtong seminarian nga mikawat makaduha ka higayon og mga mahalong laptop computer sa iyang duha ka mga kauban sulod sa ilang klase sa miaging tuig.
May na lang kay giaksyonan na gyud bisag langay kaayo.
Si Fr. William Ybañez among parish priest sa Santa Monica Parish Church nga anaa nahimutang sa barangay Cawayan, Dalaguete mitug-an kanako niadtong Domingo nga nawala na sa seminaryo ang maong tinun-an.
Si Fr. Ybañez uyuan sa usa sa mga biktima nga seminarian, wa maka-antos nga hilomon ang problema kay bisan iyang gihatod kaniadto ang isyu ni Cardinal Vidal, nataligam-an lang sa opisyal kay hapit na siya pulihi ni Archbishop Jose Palma ug gawas pa, wa gyud tagda sa rector nga si Msgr. Rogelio Fuentes ug medyo matud pa, buot pa nga mo-cover-up sa nahitabo.
Bisan ako natinga kun nganong wa dayon taktaka ang tinun-an nga gani kaniadto diha say nakasulti kanako nga dunay lima ka mga seminarians ang gipalagpot dayon bisan gamay ra kaayo og mga sala. Ang sala mao ra gyud ang kapakyas paghatud ug pagpasakay sa ilang bisita.
Ang istorya nga akong nahibaw-an mao nga nagpangikog ang taga seminaryo sa mga ginikanan sa suspect ngan nga mga impluwensyadong pamilya ug dagku kaayog hinatagan.
Magpasalamat ko ni Padre Ybañez nga may kaisog siyang mi-expose sa media sa maong isyu kay kun wa pa, pagka-delikado nga makabaton kitag laing pari nga badlungon.
In fairness hinuon sa seminarian nga suspetsado, kaniadto pa kining mipakita sa iyang mga ginikanan nga di gyud gustong magpari kay dili iyang bokasyon.
Gipugos lang sa ginikanan pagsulod kay gustong usbon ang imahen sa pagkabarumbado sa ilang komunidad.
Na-igo kini sa panultihon nga mapugos nimo ug bira ang kabaw paingon sa tuna-an apan di ka kapugos kaniya pagpa-inom sa tubig.
* * *
Nagduda ko ni Cordova Mayor Adelino Sitoy kun nganong misugilon siya sa akong mga kauban sa media nga wa siyay nahibaw-an sa problema sa cyber sex diha sa iyang lungsod nga unta gipahibaw na man siya niadtong buwan pa sa Setyembre sa miaging tuig sa maong isyu sa taga-Provincial Women’s Commission.
Nagmika siya o ba kaha iya lang gi-tolerate ang mga law-ay nga binuhatan sa iyang tagilungsod?
In fairness ngadto ni Mayor Sitoy, ambot kun gihatag ba sab ang tibuok detalye kaniadto sa operation sa magtiayon nga mi-exploit sa ilang lima ka mga anak ug usa ka pag-umangkon pagpahubo atubangan sa web cam nga pabayran sa mga manan-aw sa gawas?
Kun seryoso ang Provincial Women’s Commission ning maong alegasyon batok sa mayor sa Cordova, nganong di man nila ikiha si Mayor Sitoy sa iyang pagka-inutil nining seryoso nga krimen?
* * *
Unsay buot ipasabot sa pasalig ni Cebu City Mayor Michael Rama nga dili matangtang sa iyang administrasyon kadtong dili corrupt ug dili tapulan nga mga casual ug job order employees sa City Hall?
Nagpasabot ba kini nga nang-hire sila kaniadto uban ni Kongresista Tomas Osmeña ug ang BO-PK sa mga corrupt ug mga tapulan nga mga kawani? Pila man ka corrupt ug tapulan ang anaa karon sa City Hall?
Ang ubang mga trabahante nga nakaserbisyo na og sobra sa 20 ka tuig mireklamo niining paagi karon ni Mayor Rama nga mo-reapply sila sa ilang mga katungdanan.
Pastilan baya kun ang nakaserbisyo na og 20 ka tuig kapin maoy giigo niining mga gibuhiang mga adjectives ni Rama. Pagkataas ra sa higayon nga gihatag sa BO-PK sa mga matang nga kawani kun tinuod man.
Alang nako, mas maayo tingali nga pang-imbestigahon ni Mayor Rama kun kinsa kining mga kurakot ug mga tapulan.
Maglaum ko nga seryoso kining mga pasalig ni Vice Mayor Joy Augustus Young nga magpabilin ang ilang suporta sa konseho ngadto kang Mayor Rama ilabina sa mga proyekto nga maka-ayo dinhi sa dakbayan sa Sugbo.
* * *
Dili ko makabasol ni Cebu City Councilor Joey Daluz nga misugot kini nga mahimong usa sa mga abogado ni Mr. Wilfredo Wagas opisyal sa Department of Labor and Employment (DOLE) nga gidakop sa entrapment operations sa kapulisan tungod sa giingong pagpangilkil ug usa ka negosyante.
Katungod ni Mr. Wagas pag-hire og abogado nga iyang kasandigan ug may kompyansa nga siya kaprotektahan.
Sayod ko nga di sab makatalikod si Daluz sa mga Wagas sa Compostela tungod kay ang iyang inahan kaniadto nga beteranang radio broadcaster nga si anhing Inday Nita Cortez Daluz suod sa mga Wagas.
