Kun tinuod man, pagkahayahay sa nakalungkab ug nakakawat sa P1.7 milyones sulod sa Cebu City Sports Center.
Makaluya gyud kaayo sa mga organizers kining ingon ani nga panghitabo kay nasayod ko kun unsa ang paningkamot sa Sinulog Foundation nga makapangita og kuwarta alang sa dakung selebrasyon.
Si Ricky Ballesteros nga maoy executive director sa Sinulog Foundation nagtuo nga “inside job” ang panghitabo.
Kun “inside job” man, buot ipasabot nga sila tanan diha pulos suspetsado.
Nabalaka ko nga ang inosente maoy mapasanginlan nga kawatan.
Alang nako, mas maayong unahon pag-imbestigar kun tinuod ba nga dunay lungkab ug kawat nga nahitabo.
Kun tinuod man kini, kinsa may laing mga tawo gawas ni Ballesteros nga nasayod sa iyang gibutangan sa dakung kantidad?
Kinahanglang imbestigahon gyud ang tanang anggulo niini.
Unahon pagsubay kun tinuod ba nga dunay nahitabong pagpanglungkab.
Ikaduha, mas maayong sutaon kun wa ba magkabulilyaso ang gasto sa pagpangandam sa Sinulog nga maoy hinungdan nga napugos na lang pagpalutaw ning maong istorya sa lungkab.
Ikatulo, mas maayong tan-awon kun wa ba kini tuyua aron pakaulawan ang liderato ni Cebu City Mayor Michael Rama human sa malampuson nga Sinulog Grand Parade.
Ikaupat, mao kun wa bay plano si Mayor Rama nga limpyohan ang Sinulog Foundation Inc. agig pagpangandam sa iyang pulitikanhong interest?
Unsa ka suod ni Mayor Rama si Ballesteros kinsa kanhi sinaligan ni Vice Mayor Joy Austus Young?
* * *
Kaniadtong wa pa masugdi ang impeachment trial, nanawagan ko nga mas maayong mo-resign sa pwesto si Supreme Court Chief Justice Renato Corona aron pagsalbar sa imahen sa hudikatura.
Pero karon nga nakasugod na, mas maayong atubangon na lang niya kini. Puslan man nga nabasa maligo nalang og tarong.
Nakasabot na sab ko nga dili maapektohan ang kinatibuk-ang hudikatura kay si Corona dili maoy Korte Suprema ug ang Korte Suprema dili si Corona.
Ang maayo karon mao nga mo-indefinite leave si Corona kana kun may delicadeza siya.
Dili niya gamiton ang institution sa iyang personal nga krusada. Dili niya gamiton ang kwarta sa judiciary sa pagdepensa ug pagpangayam og mga supporters.
Kinahanglang hatagan sab siya og substantive due process aron dili na siya makareklamo kun ingkaso man nga siya ikonbikto sa mga articles of impeachment.
* * *
Si Metropolitan Trial Court in Cities Clerk of Court Rey Teves kinsa gisuspenso og unom ka buwan sa iyang paghubog-hubog, miingon nga biktima siya sa mga fabricated charges sa iyang huwes nga si Judge Rosabella Tormis.
Misaad siya nga mobawos kay duna siyay gipanghuptan nga mga dokumento batok sa huwes.
Nagtuo ko nga kini maoy sentro sa iduso nga motion for reconsideration ni Teves ngadto sa Korte Suprema.
Apan si Judge Tormis miingon nga lisud pag-reconsider ang silot ni Teves kay iya kining giangkon atul sa imbestigasyon.
Nakahinumdom ko nga miingon si Teves nga ang naghatag kaniya og ilimnong makahubog mao si Judge Tormis. Apan wa sab kini angkona sa huwes.
Kun unsa man kining mga ebidensya ni Teves siya ray nasayod. Magpaabot na lang ko kun unsay update ning ilang away sa huwes.
* * *
Karong Sabado atol sa among programang “Dialogue on the Air” sa dySS Super Raydo mangahas pagtuki sa reklamo sa mga sacristan batok sa kaparian sa lungsod sa Minglanilla.
Maglaum ko nga matubag nila ni Padre Scipio “Jojo” Deligero kining mga pasangil ilabina sa mga pari nga maoy gipang-akusahan nga mihimo og mga eskandalo.
Maglaum ko nga daghang mga parokyano ang makatambong atol sa maong programa aron makapadayag sa ilang mga sentimento.