Di ko motuo nga apektado ang academics kun pasayawon

Di gyud angayng putlon ang tradition sa pagpa-participate sa mga tinun-an sa tinuig nga Sinulog Grand Parade. Sayaw lang, maapektahan na ang academic? Pagkataphaw!

Di ba mas masibot na hinuon pag-ayo ang mga bata nga motuon og tarong ug makiglambigit sa mga dagkung kalihukan sa tunghaan kun anaa kining mga ingon ani nga extra-curricular activities?

Dili sayaw maoy makadaut sa academics, kun dili mao ang adis-adis, bisyo, igat-igat ug ang  pagkairesponsable sa mga ginikanan.

Akong nakita nga dili sab intawon mga bulay-og  ang mga estudyante ug mga magtutudlo nga irisgo na lang ang aspeto sa academics sa mga bata nga maoy importante kaayo.

Niadtong Sabado nga nagcover mi sa Sinulog sa Kabataan sa Lalawigan  didto sa Cebu City Sports Complex,  giklaro  ni Dr. Vivian Ginete,  chairperson sa Committee on Arts and Culture sa Department of Education in Central Visayas (DepEd-7),  nga di gyud maapektuhan ang academics sa mga estudyante.

Iyang gipasabot nga way insayo nga nahitabo niadtong mga buwan sa August, September, October ug November.

Gani, matud sa opisyal nga natigayon ang mga practice sa sayaw  sa Sinulog niadtong miaging Christmas break/vacation.

Wa sab hikalimti pagtuki ni Dr. Ginete nga kun magkuwang ang adlaw sa pagtungha,  mopatuman sila ug mga special classes.

Maglaum lang ko nga kahatagan gyud nila ni DepEd-7 director Recaredo Borgonia ang tanang mga bata og insaktong higayon nga makacover-up  sa tanan nilang mga  subjects aron di gyud madehado sa leksyon.

* * *

Wa koy  nakitang  problema  sa security preparations sa atong mga tinugyanan sa ipahigayon nga Fluvial Procession, Solemn Foot Procession karong Sabado ug Sinulog Grand Parade karong Domingo.

Ang akong nabalak-an mao ang external security measures nga gipatuman sa atong mga otoridad.

Unsa ka luwas ang mga establismento ug katawhan  nga  layo ra sa parade  route  nga wa nay  presensya sa atong  kapulisan?

Unsa ka organisado? Unsa ka abtik ug unsa ka igmat ang atong mga barangay tanod ug ubang mga crime volunteers  nga magbantay sa ilang tagsa-tagsa ka mga barangay ug sa ilang tagsa-tagsa ka area of jurisdiction?

Prangka lang nga pagkaistorya, di gyud  makaya sa atong kapulisan kun sila ra atong pasagdan. Tabang ta nila!

* * *

Maglaum lang sab ko nga ang kainit sa atong pagyukbo, pagtamod ug pagmahal sa imahen ni Señor Sto Niño  di maparehas  sa selebrasyon niadtong Lunes sa Kapistahan sa Black Nazarene didto sa kauluhan nga daghang nangaangol tungod sa  pagka-panatiko.

Sama sa akong giingon kaniadto pa, ang replica ni Señor Sto. Niño ug sa Black Nazarene  way  kalainan sa atong mga images nga anaa sa atong tagsa-tagsa  ka kaugalingon ug anaa  sa atong mga simbahan ug mga chapel.

Di na kinahanglang mokatkat kita sa karo nga makapaalaut sa uban aron lang makapahid ug makahikap.

Sa tinuod lang, wa gyud ko kasabot kun nganong  gitugot gihapon didto sa Manila ang pagkatkat  sa giluwanan sa Black Nazarene.

* * *

Bantog ra nga wa na ko makakita ni Reynaldo Teves, ang clerk of court  sa Metropolitan Trial Court in Cities Branch 4, kay   gipahamtangan na diay siya og six months suspension without pay tungod sa paghubog-hubog  sulod sa ilang opisina nga oras pa sa tingtrabaho.

Mismo iyang  huwes nga si Judge Rosabella Tormis maoy mireklamo kaniadto  ni Teves.  Apan si Teves namasangil  sa huwes nga maoy  naghatag  kaniadto og ilimnon kaniya.

Sayod ko kun unsa kainit ang away sa duha.

Sukwahi kaayo ang working atmosphere diha sa MTCC Branch 4 kay sa ubang sala  kay anaa ang maayong relasyon ug koordinasyon sa presiding  judge ug sa iyang clerk of court.

Maayo gyud nga buwagon na lang sila aron mag-iyahay na og concentrate sa trabaho.

* * *

Ubay-ubay  na sa mga motorista ang  nangreklamo niining mga trisikad  driver nga moagi  sa super highway  sa South Road Properties (SRP) nga kini klaro gyung kalapasan.

Di sa ingon nga pangkulban sa kaldero ning atong mga kaigsoonan nga nanginabuhi sa trisikad apan  kinahanglang badlungon ni sila aron paglikay sa disgrasya.

Usa sa gihimug-atan pag-ayo kining dalan sa SRP gikan sa Cansojong, Talisay, hangtud sa Laray, Inayawan Cebu City.

Ang nakaporke pa gyud kay way pili sa oras kining mga mag-trisikad.

Akong gitawag ang atensyon ni kapitan Nick Hermosa sa Cansojong, Talisay, ug Inayawan, Cebu City barangay captain Rustom  Ignacio nga mohimo sila og lakang batok sa ilang mga malapason nga mga konstituwente.

Maayo  sab unta nga sulbaron kining maong problema sa Talisay Traffic Management Board kay ang mga nangreklamo miingon nga sagad sa mga  malapason mga residente diha sa Talisay.