Nyor Gamay (NG): Giganahan ra ka anang slogan sa Department of Tourism nga “It’s more fun in the Philippines”?
Nyor Daku (ND): Okay ra baya, Nyor, kay daghan kang mahimong variation.
NG: Mao ba, Nyor? Sama sa unsa, Nyor?
ND: Sama sa, “It’s more fun to get a tan in Ginatilan.”
NG: Maldito ka, Nyor, imong gi-rhyme.
ND: Gusto pa ka og lain?
NG: Be, unsa pa man?
ND: It’s more fun when it thunders in Santander.
NG: Binuang na man nang imo, Nyor.
ND: Unsay binuang? Paghimo sad og imo.
NG: Kini, Nyor. “It’s more fun to drink latte in Southern Leyte.”
ND: Di mada, Nyor. Lahi ra og sound ang “latte” ug “Leyte.”
NG: Aw bitaw, Nyor, no. A, kini. “It’s more fun to take your tea in Dumaguete.”
ND: Pwede, Nyor. Ako nasad. “It’s more fun if you run around Parian.”
NG: Morag di kaayo swak ang syllabic count.
ND: Bitaw, Nyor. Be, Ikaw na sab.
NG: “It’s more fun under the sun in Aluginsan.”
ND: Nindot, Nyor. Pero morag gigamit na na ni Boboi Costas.
NG: Mao ba, Nyor? Gigamit na diay nis atong amigo.
ND: Sagdi lang, Nyor. Di ra man tingali masuko si Boboi, Nyor. Naunhan sad bitaw ang atong DOTC sa tourism sa Switzerland nga niadto kunong 1951 diha nay “It’s more fun in Switzerland.”
NG: Nangopya ra diay ta, Nyor?
ND: Wa sad, Nyor, uy! Grabe sang kadugay nahumag kopya, Nyor, 60 anyos nga kinopyahay unya tulo ra ka pulong. “It’s,” “more” ug “fun.”
NG: Nganong giganahan man sang DOT aning “It’s more fun”?
ND: Matud pa nila, Nyor, ang pulong nga “fun” may kalabutan sa human interaction, sa ato pa dili lang ang lugar maoy angay susihon sa mga bisita. Ang makasadya sa ilang pag-anhi mao ang mga Pinoy nga moabi-abi ug molingaw kanila. Kay ang pulong nga “fun” nanginahanglan man og interaction.
NG: Sama sa interaction nga gipanghambug sa pipila ka taxi driver nga nakasuway kuno silag Koreana?
ND: Aw apil nasad na, Nyor.
NG: Aw, wa ra diay ta mangopya, Nyor. Padayon ta, Nyor. “More fun to drop your oar in Siquijor.”
ND: Morag surrender nako, Nyor, maglisud nakog rhyme. Ang-ang man sag moingon kog “More fun with Mary Anne in Kamagayan.” Istrikto na ra ba sila ron kontra trafficking.
NG: Surrender naka ha? Ok! daug ko.