Di magsilbi ang total ban sa mga pabuto

Kung palpak ang taga-Department of Health sa ilang anti-firecrackers campaign, di sab siguro angayang ipatuman sa nasud ang total ban sa mga pabuto.

Kun ipatuman ang total ban, makulban intawon sa kaldero ang liboan ka mga trabahante ug mga manufacturer sa Bocaue, Bulacan, ug ingon man diha sa barangay Babag, dakbayan sa Lapu-Lapu.

Alang nako, mas nindot ug kompleto  gyud ang pagsugat kun anaa pa gihapon ang mga matang sa pabuto.

Ang pagka-iresponsable sa tawo maoy angay natong basolon. Wa magkuwang ang DOH sa ilang massive information sa kadaut sa mga pabuto.

Daku kaayo ang papel sa mga ginikanan nga mabantayan ug makapahimangno ngadto sa ilang mga anak sa dili pa moduslit.

Sa uwahing figures sa DOH, misaka ngadto sa 739 ang gidaghanon sa mga biktima ug sagad mga bata. Piccolo maoy nag-una nga responsable.  Gisundan sa kwitis, fountain, five star ug luces.

In fairness sa DOH, mikunhod ang gidaghanon sa mga biktima ikomparar niadtong mga nangaging katuigan nga huyang pa ang ilang kampanya.

* * *

Pwerteng paita gyud niining pagka-iresponsable sa ubang naghupot og mga armas. Hangtud karon, daghan pang trigger- happy.

Ambot kanus-a makonsensya ning ubang mga pulis, sundawo, mga  gwardya ug mga sibilyan.

Dinhi lang sa ato, walo ka mga biktima sa mga saag nga bala. Samtang didto sa Manila, duna gyuy batang babaye ang napatay sa stray bullet.

Akong sublion nga useless kining pagtaptap sa sumbohan sa mga service firearms sa atong mga pulis kay ang tinuod, daghang mga pulis nga nagtiner og illegal nga armas nga maoy ilang pabuthon sa pagsugat sa bag-ong tuig. Makonsensya unta  mo!

* * *

Ngisli ug hamos kaayong tan-awon nga gibutangan karon og portable toilets ang Fuente Osmeña Rotunda.

Di gyud maayong  butangan diha ug labayanan sa hugaw sa tawo kay manglisbo ang baho unya anaa pa gyud sa sulod sa oval.

Alang nako, insakto na kaayo  kadtong setup sa miaging  tuig nga diha gipahimutang duol ug kilid sa kanhi Fuente Police Station kay medyo tago ug dili dayag sa atong mga bisita.

Gawas pa sab, nasukwahi kini sa tinguha sa pamunuan ni Cebu City Mayor Michael Rama nga panindoton ang Fuente Osmeña Oval.

* * *

Di maayong paundayunan  ni Mayor Michael  Rama ang hulhog sa ubang mga sipsip sa iyang administrasyon diha sa Cebu City Hall, ilabina ang pagpili sa mga trabahante nga angayng i-renew.

Kun ako si Mayor Rama, di nako gukdon ang mga tawo ni kanhi mayor ug karon kongresista Tomas Osmeña.

Mas maayo nga hatagan niya og renewal ang tanang sobra sa 100 ka mga kawani  kun pagpalig-on sa iyang kandidatura ang katuyuan.

Sa makonsensya lang sa panahon nga siya  buko-bukohon. Labing tinuod,  kining padayong evaluation karon sa mga kawani sa City Hall usa lang kini ka loyalty check ug pagpahinumdom nga siya maoy haring  gangis.

* * *

Wa sab ko makauyon niining tinguha  nila ni Kongresista  Tomas Osmeña ug Sen. Serge Osmeña III pag-withdraw sa ilang tinuig nga financial assistance nga balig P12 milyones alang sa mga kabus nga taga-dakbayan nga ma-admit diha sa Cebu City Medical Center.

Ilang ibalhin  ngadto sa Vicente Sotto Memorial Medical Center ang cash assistance aron adto na ipaadmit ang ilang mga konstituwente.

Tungod ba lang sa pagkakuti-kutihan ni Mayor Rama moputol na sila sa tabang sa CCMC? Maayo ra ba unta kun ilang kwarta personal.

Sayon ra man gud nila ang pag-ingon nga adto sa VSMMC kay di man sila pirmi didto nga dili makatan-aw kun unsa ka daghan na sa mga pasyente nga taga-probinsya.