Nyor Daku (ND): Nganong duko-duko man ka diha, Nyor? Hangad! Ngisi! 2012 na.
Nyor Gamay (NG): Murag gikulbaan ko, Nyor. Kini na kuno ang katapusang tuig sa kalibutan.
ND: Kadto ning sa Mayan calendar maoy imong gihuna-huna?
NG: O, Nyor.
ND: Para di ka mabalaka, Nyor, huna-hunaa lang nga si Christine Reyes imong gipulihan ni Solenn Heussaff.
NG: Ha? Unswa?
ND: Kadto gung kalendaryo sa tribo nga Maya, dili langgam ha ug dili sad bayot, matapos karong petsa 21 sa December rong tuiga. Kun ang atong kalendaryo dunay 365 days, ang ila dunay 144,000 ka adlaw. Tinuod matapos ang ilang kalendaryo karong December apan 12 na kahigayon kini nga natapos. Mao nga inig kahuman ning ika-13 nga higayon nga matapos ang ilang kalendaryo, sugdan na usab ang ika-14.
NG: Mao ba, Nyor? Pero nganong magdungan man kining katapusang adlaw sa ilang kalendaryo sa pag-align o paglinya sa mga planeta?
ND: Sumas akong nabasahan sa Yahoo, Nyor, miingon ang mga astronomer sa National Aeronautics and Space Administration nga way mahitabong planetary alignment sa maong pitsa ug duna man gani, dili kini makatandog kanato kay layo ra kaayo sa kalibutan ang ubang planeta.
NG: Unsa man ning planet Nibiru?
ND: Fiction. Mao tingali na ang planet sa pelikulang “Melancholia” nga mibangga ug migunaw sa kalibutan. Imbento ra kanang Nibiru sa mga mga Unidentified Flying Object ug Alien fanatics.
NG: Unya kining solar storms, Nyor?
ND: Kun ang mga scientist pasultion, Nyor, layo ra ang kadaut nga mahatag ana kun itandi sa kadaut nga nahatag ni Sendong. Kay mahimo niaing solar storm kanimo mao ra man ang pagka pawong sa signal sa imong cell phone tungod kay posibleng makatandug kini sa mga satellite signals.
NG: Kaning hugon nga magbaylog pwesto ang north pole ug south pole?
ND: Ngano gud tawon? Posible man kunong magkabayluay silag pwesto pero hinay-hinay ang ilang lihok dili kinalit-kalit nga sa ingong magbinayluay lang dayun sila inig Dec. 21.
NG: Walay mga comet o asteroids nga modagsa inig Dec. 21, 2012?
ND: Kon dinagko nga impact maoy imong gipasabot, wala. Walay nakit-ang higanteng meteor nga nagpadung sa atong kalibutan ang telescopio sa Nasa. Kun duna man gani mga dagkong katalagman nga maaguman ang atong kalibutan rong tuiga, wala kini magagikan sa kahitas-an. Kay kun duna man gani, malagmit magagikan kini sa binuhatan sa tawo. Ayawg kabalaka, Nyor, kay murag gamay rag posibilidad nga di matapos ni Solenn ang tuig sa iyang pagserbisyo sa imong bongbong.