Dumaguete sketches
Nia ako nag-type sa usa ka Internetan nga kaniadto usa ka kapehan nga Scooby’s ang karatola. Atbang niani ang usa ka Cebuana Luhillier pawnshop nga niadto usa ka tindahan diin magpa Xerox o magpa photocopy kami.
Daw nausab and landscape pero murag motultul pa man og ilaha ang akong mga lakang.
Pagpadong ko ning Internetan nasugatan ko ang usa ka namaligyag ilaga-ilaga nga duwaan ug ang ang amang nga makilimos nga daw chancing ang kinablitan niini sa mga estudyanting dalaga.
Daghang character ang Dumaguete apan daw lisud sila tipunon ug ipasulod sa usa ka sugilanon. Kon may sugilanon ka man nga mahimo maurag luag ra kayo kini para ma nobela. Ug gubot kayo kon short story man gani ang imong tumong.
Tingali ang kon sine man gani ang imong himuon, tingali hybrid kini sa Manila by Night ug sa Jologs.
* * *
Gi-ilaila ko ni Budoy (ang Rastafarai sa PBB) kang Dodoy (nga ahenti) sa Lee Plaza sa Dumaguete ug nakurat ako sa kahayag sa kolor sa iyang gipangsul-ob apan mas nakurat ako nga nahibawo nga silingan ra diay mis Mambaling.
Ang kinabuhi ni Dodoy sa Dumaguete mao ang pagpunay nianig daug sa mga photo contest ug pag ibidibid sa mga beauty queen ning maong dakbayan. Apan kay mi-avail man siya sa early retirement plan sa insurance company nga iyang gitrabahuan, nabalik siya sa Cebu.
* * *
Samtang midimdim kos kape sa Dunkin’ Donuts atbang sa Lee Plaza nadunggan ko ang Ininglis nga “Lambada” ni Jennifer Lopez ug nahinumduman ko nga dinhi man ako pagsikat sa salidang “Lambada.” Nakahinumdom ako nga miingon pa ang inla nga manunulat nga si Cesar “Sawi Fox” Aquino nga buot siyang makat-on ning sayaw nga Lambada. Apan matud pa niya nga wa kunoy mayo nga motudlo sa sayaw sa lalake ning maong tokar. Ang kasagaran gong itudlo mao man ang steps para sa babaye.
Wa ko makasiguro kon tininuod ba kadto kang Sawi o basin buot lang siya mopa-cute niadtong estudyanting babaye nga nag practice og sayaw sa among atubangan. Kaila namo ang maong babae ug nakahinumdum ko nga niadtong panahauna nga nagsigue siyag practice ug Lambada nangita siyag paagi kon unsaon niya pagbuwag ang iyang uyab nga wa na siya ganahi.
* * *
Sa akong pagnahi karon, ang akong tumong mao ang pakigkita ning banggi-itang maniniyot nga si Ed Vergara. Buot kong makita ang iyang mga tiny homes for rent ug ingon man pagkuha sa iyang gisaad nako nga 50mm nga lente sa Nikon.
Si Ed mismo, nga usa ka engineer, ang ga desinyo sa ning iyang mga gagmay nga balay paabangan. Na-inspire siya sa concept sa tiny homes diin mahimo diay nga manimuyong hamugaway ang mga tao sulod sa gamay nga espasyo. Nalingaw siya sa challenge kon unsaon pagbahin kining gamay nga luna nga sa ingon dili mgakapangkapangka ang nanimuyo sa paghimo nila sa ilang adlawadlaw nga buluhaton.
Paghuman namog survey sa iyang tiny homes gipakita niya ako sa iyang collection sa mga camera diin naglaikp sa mga karaang kahon nga tagsa ka dangaw ang i-load nga film ug may mga tag-sa ray buto nga flash bulb.
* * *
Mao nga kon dunay mangutana kanako kon kumusta na ang Dumaguete dili ko makatubag kay wa man akoy general perspective. Puros man mga particular encounters ang akong maasoy.
