Salamat nga way dagkung hitabo ug way dagkung trahedya pagsugat sa Pasko niadtong petsa 25. Gamay ra sab ang biktima sa mga firecrackers.
Akong na-obserbahan nga daghan gyud kaayong Diosnon kay nagsugwak ang gidaghanon sa mga manimbahay gikan sa nueve ka kadlawon nga Misa de Gallo ug niadtong Misa de Aguinaldo.
Naglaum ko nga mag-inampingon ang tanan niining pagsugat sa bag-ong tuig karong Sabado sa gabii.
Atong hangpon ang tuig 2012 nga Year of the Dragon nga puno sa grasya, kalinaw ug pagtinabangay.
* * *
Alang nako mas maayong gub-on ug pulbuson na sa labing daling panahon ang entero building sa Gaisano South Capital aron malikayan ang laing trahedya.
Delikado gyud kaayo kun pasagdan kining magbarug kay tingalig mokalit lang paghulpa ang edipisyo ug makadisgrasya sa ubang kabtangan ug kinabuhi.
Kinahanglang paspasan ang pag-imbestigar sa mga imbestigador sa Bureau of Fire Protection ug sa insurance company aron sab makahuygo sila si Cebu City Mayor Michael Rama paghimo og konkretong lakang.
Pwerteng paita gyud kun madugay ang pagsira sa mga portion sa dalan Colon ug dalan Leon Kilat nga nagtuyok sa Gaisano South Capital nga mosamot kita ka problema sa traffic ilabina nga nagkaduol na Sinulog 2012.
* * *
Gipa-esplikar diay tawn si Cebu City Fire Marshal Aderson Comar sa iyang regional director sa Bureau of Fire Protection in Central Visayas nga si Ma. Luisa Hadjula tungod sa nanggawas nga istorya nga nagpagawong sila si Comar sa usa ka opisyal sa Gaisano nga maoy hinungdan nga wa sila makahimo og forcible entry pagsugod sa sunog niadtong Biyenes sa kadlawon.
Si Comar nga nahiubos ug way maayong relasyon sa iyang regional director mipadayag nga di gyud siya motubag.
Alang ni Comar nga gihasi-hasi gyud siya kay bisag nagsige pa sila og kumbate sa sunog gipadalhan siya niadtong Sabado sa buntag og memorandum nga siya paesplikahon sud sa 24 oras.
Mao kini ang nakaporke basta di magkasabot ang City Fire Marshal ug ang regional director kay dunay gamayng diperensya bikil dayon.
In fairness kang Comar miingon siya kanako nga tinuod dihay opisyal sa Gaisano South Capital nga mibabag sa ilang pagsulod apan way nahimo dihang iyang gipasabot sa ilang police power.
Iyang gipasabot nga milanat lang og 10 minutos ang ilang pag-delatar sa pagpatuman og forcible entry.
Akong nabasa nga magdaku ning away sa duha ka mga opisyal nga di makaayo kun magpirme.
Inay mag-away ning duha magtinabangay na lang unta sila aron mas molambo ang ilang panerbisyo ngadto sa katawhan.
* * *
Akoy naluoy sa 3 anyos nga batang lalake nga si Arvin Plando kinsa usa sa tulo ka mga bata nga gipang-hostage ni Allan Bolo didto sa dakbayan sa Toledo kay giputlan gyud sa iyang tuo nga bukton.
Ang pagka-inosente sa bata maoy nakapalugmaw sa luha sa mga tawo nga nagsud-ong kaniya.
Samtang nagpakahilom ang 3-anyos nga bata atubangan kang Gov. Gwendolyn Garcia apan nanulti siya nga ang iyang bukton gikawat kuno sa usa ka babaye.
Nagpasabot lang gyud kun unsa ka inosente ang batang biktima sa pagkahanggaw sa binuhatan niadtong napatay nga hostage taker.
* * *
Salamat kaayo sa tanan nga nakatabang sa “Operation Bayanihan” nga gipasiugdahan namo sa GMA-7 ug dySS.
Salamat sab kaayo sa among mga readers dinhi sa Cebu Daily News nga misuporta sa susamang kalihukan pagtabang sa mga biktima sa Bagyong Sendong ilabina sa Cagayan de Oro, Iligan ug Negros Oriental.
Bilib ko sa gipakitang suporta natong mga Sugbuanon ngadto sa mga biktima kay nagtinabangay gyud kita.
Maglaum lang sab ko nga ang tanang nahatag mapunta gyud sa mga nahingtungdang mga biktima ug wa nay manggawas nga istorya sama sa trahedya kaniadto sa Guinsaugon, Southern Leyte.