Ang policeman ug policewoman sa Naga police station nga giingong nalambigit sa sex scandal sulod sa ilang buhatan buot unta’ng makig-kita kanako sa GMA-7 complex niadtong miaging semana aron mohatag ug katin-awan sa akong napublikar dinhi sa akong lindog sa Cebu Daily News.
Tayming lang nga wa ko didto sa among complex. Apan ang policeman nga minyo ug ang policewoman nga dalaga miklaro sa akong mga kaubanan ug sa among mga guwardiya nga di gyud tinuud ang nanggawas nga estorya.
Alang nila nga intriga lang ug pangdaut ngadto kanila ang isyu. Miingon ang duha nga wa gyud sila’y relasyon.
Nagbilin sila ug estorya nga ang mireklamo igo ra’ng mibawos kanila kay naalkanse sa kasong pagpanglogos.
Nasagmuyo ang duha kay drastic kaayo ang action sa ilang mga kadagkuan kay ibuwag sila ug mga lagyo’ng mga lugar.
In fairness sa duha kinahanglang imbestigahon sila ug tarong kay basig tinuod sab ang ilang version nga igo ra’ng giinitan.
Apan kun tinuod man sab ang isyu batok kanila, kinahanglan sab silang silotan kay wa silay mga batasan.
* * *
Ang kaso niadtong kontrobersiyal nga uyo-an nga gitoho-ang ungo nga taga Tabuelan nga mipatay sa iyang 6 anyos nga pag-umangkon ug mikaon sa internal organ atua nadestino ni Toledo RTC Judge Ruben Altubar sa Branch 29.
Si Judge Altubar nga akong na-interview sa telepono miingon nga mopatawag pa siya ug arraignment sa akusado nga si Efren Matedios.
Ang huwes mipasabot nga di pa siya makahimo ug lakang nga mapaubos sa mental examination si Efren kay wa pa siya makakita sa tinuod nga kahimtang niini.
Gawas pa magpaabot siya kun dunay mosyon nga maduso gikan sa mga intresado sa kaso.
Ang district head sa Public Attorney’s Office sa dakbayan sa Toledo nga si lawyer Joel Balacuit miingon posible nga mohimo sila ug mosyon alang niini.
Apan makigtigom siya kang PAO lawyer Gay Capangpangan nga maoy tig-depensa nga abogado sa sala ni Judge Altubar aron hikayon ang mosyon.
Miingon si lawyer Balacuit nga ipa-defer nila ang arraignment sa korte ug ipa-una ang psychiatric examinations kang Efren.
Ang kabanay ni Efren gimanduan sa PAO lawyer nga mobisita sa ilang buhatan ug magdala sa tanang papeles aron pormal sila’ng makasulod sa kaso.
* * *
Kumusta si Cebu Assistant City Prosecutor Mary Ann Castro? Unsa ka tinuod nga nagkasakit siya ug throat cancer? Stage 1 na kuno.
Manguno ko kay wa siya mopakita diha sa iyang buhatan sukad gipahamtang ang three months suspension.
Sa akong nakuha nga estorya si Piskal Castro maoy nanabi ug nangangkon nga siya nagkasakit ug cancer.
Apan misuway ang iyang mga kauban pag-contact kaniya apan dili na kini motubag.
Bisan si retired Assistant City Prosecutor Jesus Feliciano nga usa sa iyang suod mitug-an sa akoa kagahapon nga di gyud motubag si Piskal Castro sa iyang mga tawag.
Ambot lang kun wa ba matakdi si Castro sa mga dramatorgo sa radyo?
Basig usa kini sa iyang defense mechanism sa iyang wa pagdawat sa suspension order nga una niya’ng gipasabot kanako nga nag-sick leave siya human nga iyang gi-contest ang iyang suspension order.
Ang ako lang ngadto ni Piskal Castro, kun di tinuud iyang sakit, dili siya magtungo sa iyang kaugalingon kay makagaba baya kini. Simbako madayunan ka?
Karon pa sab ko nakadungog ug tawo nga mo-anunsiyo sa tibuuk kalibutan sa iyang sakit.
Gani sa nahitabo kaniadto ni anhing Vice Gov. Greg Sanchez, wa man gani dayon angkona sa pamilya ang sakit nga cancer hangtud nga naglisud na nga anaa na sa stage 4.
* * *
Unsa ka tinuod nga duha sa tulo ka mga sakop sa three-man panel investigating team ang uyon nga i-file sa korte human nakonbinse nga dunay probable cause ang kasong kidnapping with homicide batok kang Bella Ruby Santos ug sa uyab nga si Ian Charles Griffiths sa pagdagit ug pagpatay sa bata nga si Ellah Joy Pique?
Hinoon anaa ra gyud ni Acting Provincial Prosecutor England Joseph Berciles ang tanan bisan unsa pa’y makab-ot nga resolosyon nila Piskal Annabelle Robles, Piskal Jose Edwin Renegado ug Piskal Ma. Luisa Ong.
Kagahapon mitug-an si Piskal Robles nga nangayo sila ug usa ka buwan nga lugway sa pagresolbar kay nag-sige pa sila ug debate kun i-file ba ang kaso o ba kaha i-dismiss.