Pipila ka huwes uyon sa impeachment ni Corona?
Alang nako, makatarunganon lang sa mga huwes dinhi sa Sugbo ug sa ubang mga mahistrado nga mosuporta pagpalagpot kang Supreme Court Chief Justice Renato Corona.
Unfair kaayo sa mga tarong sa judicial branch ang pagpagawong ni Corona ngadto kang kanhi presidente Gloria Macapagal-Arroyo.
Kun di ma-impeach si Corona, makadaut og samot sa integridad sa hudikatura unya makapaduhig kini sa mga relihiyoso kaayo nga mga kawani sa ilang institution.
Siyarog magpabaga pa gihapon sa iyang nawong si Corona human pormal na nga nahatud kagahapon sa Senado ang articles of impeachment batok kaniya. Wa siya mauwaw sa international community?
Kun may kaikog pa si Corona sa katawhan, mas maayong mo-resign na lang siya sa labing daling panahon.
Di malimpyo ang hudikatura kun di tinud-on ang kawsa ni Presidente Noynoy Aquino.
Way tinguha si Aquino pagpalagpot sa ubang mga mahistrado sa Korte Suprema nga otro sang tinudlo ni Arroyo nga wa magtamod sa ilang tinarong nga gimbuhaton?
* * *
Kumusta na man tuod ang pundok sa mga married priests dinhi sa Sugbo? Sukad namatay si Fr. Joe Estella, wa na koy update sa ilang pundok.
Niadtong piskay pa to si Fr. Joe, prangka gyud kaayo to siya nga motug-an sa mga negatibong isyu sa simbahan.
Sa unahan, wa kaayo ko makonbinse sa iyang prinsipyo sa kinabuhi nga migawas siya sa pagka-pari tungod kay nakigminyo.
Apan hinay-hinay nakong gisabot ang iyang paggawas sa simbahan dihang nanggawas na ang mga isyu bahin sa mga pari nga nagtago-tago pakig-relasyon.
Prangka to si Fr. Joe nga moingon nga alkanse sila’ng mga pari nga tinuod nga lalaki kay inig ka buntis sa babaye nga ilang gihigugma, di sila makapamakak sa ilang mga kadagkuan kaniadto ilabina kun duna nay mga hinayhay sa luyo sa kumbento nga mga underwear sa babaye ug mga lampin sa bata.
Ang subo nga istorya ni Fr. Joe mao kadtong mga pari nga bayot nga iyang kauban nga di gyud mangabuntis unya nagpabilin sa serbisyo.
Tinuod nga mga tawo ra sab ning mga pari nga puwedeng magpakasala, apan lahi sila kanato kay pagka-salikwaot ba sab paminawon nga nag-ayo lang sa wali unya wa sa binuhatan.
Nganong di na man lang manggawas aron pagtagbaw sa ilang mga binuhatan nga makadaut sa simbahang Katoliko?
* * *
Dunay daghang mga impormasyon nga akong nadawat bahin sa nahitabong pagpusil kang Dodong Belandres kinsa nahimong suspetsado kaniadto sa pagpusil-patay sa among kauban sa media nga photographer sa The Freeman nga si Alan Dizon.
Sigun sa pipila ka mga kasaligang tinubdan nga ang nag-bira ni Belandres didto sa ilang bay sa barangay Cawayan, Dalaguete, mao ang mga sakop sa sindikato sa drugas.
Matud sa tinubdan nga di gyud vigilantes ang mibira ni Belandres kay wa siya ig-a sa ulo ug wa monaug sa motor og wa moduol ang nagpusil kang Belandres.
Gani, tungod sa kabalaka sa pamilya, gipakatap dayon ang istorya nga patay na si Dodong aron dili na masundan samtang paingon sa tambalanan dinhi sa dakbayan sa Sugbo.
Kun tinuod man nga sindikato sa drugas ang hinungdan sa krimen, mas nasayod si Dodong Belandres kun kinsa ang mga responsable.
* * *
Congratulations sa among kauban dinhi sa Cebu Daily News nga si Ador Vincent Mayol kay siya maoy na-first sa pinakaunang “Justice Award” sa hard news category.
Kabahin kini sa published report ni Ador niadtong June 2, 2011, sa mga bata sa Corodova nga na-rescue human gipang-biktima sa on-line pornography.
Congrats usab kang Bernadette Parco sa Sun.Star nga maoy naka-angkon sa unang ganti sa feature story category niadtong iyang article nga “Betrayal of Trust.”
Congrats usab sa uban nakong mga kauban sila si Davinci Maru, Jerome Dalipe ug Karlon Rama sa Sun.Star nga gihatagan usab ug pasidungog sa samang giving-award body nga gilangkuban sa International Justice Mission, Peace and Conflict Journalism Network Philippines ug inabagan sa Unicef Philippines.
Maayo na lang kay dunay pundok nga nagpakabana ug mirekognisar sa responsibilidad namong anaa sa prensa pagtabang sa pakigbatok sa isyu sa human trafficking nga nakapa-alarma sa tibuok kalibutan.
