Na-shock na lang ko sa balita niadtong Sabado sa udto dihang nakadawat ko og text gikan sa akong iyaan sa Dalaguete nga napusilan si Dodong Belandres didto tungod sa ilang pinuy-anan sa barangay Cawayan.
Nakaila ko sa biktima kay siya maoy suspect kaniadto apan giabsuwelto sa pagpusil-patay sa among kauban sa buhat nga photographer sa The Freeman nga si Allan Dizon diha duol sa SM City Cebu.
Segun sa estorya, pasado alas-8 sa buntag niadtong Sabado nahitabo ang krimen.
Ang mga responsable nga nag-angkasay og motor mituyok ug mibalik sa agi ug ang nag-angkas maoy mibira kang Dodong Belandres ug dayong sibat ang duha paingon dinhi sa dakbayan sa Sugbo.
Ambot kun unsay motibo sa mga suspetsado sa pagpusil ni Belandres?
Dili kaha pundok ra gihapon sa mga sindikato nga naglagot kaniya? O ba kaha hinuon mga vigilantes?
* * *
Di na ko matinga sa gibutyag sa dinakpan nga si Sawaib Sultan nga nagkanayon nga ang supply sa shabu nga iyang nabaligya ngadto sa mga pulis gikan ra diha sa New Cebu City Jail sa barangay Kalunasan.
Dugay na ko nakadungog niining estoryaha ug matud pa kakonsabo na ang mga gwardya sa palusot diha sa mga kontrabando.
Kun di kini tinud-on possible pang moabot ang panahon nga magbutang ang mga sindikato diha og gam-anan sa shabu.
* * *
Kinahanglang imbestigahon ni Cebu Archbishop Jose Palma ang alegasyon batok sa usa ka pari diha sa lungsod sa Minglanilla nga giingong mihimo og law-ay nga binuhatan uban sa usa ka babaye sa luyo sa simbahan.
Unsa may gihimo didto sa luyo? Nag-rosaryo? Nag-abat-abat? O nagtatay-tatay nanay-nanay?
Kun tinuod man, laing isyu kini batok sa simbahan nga makapatay-og kaayo sa imahen.
Ang sakristan nga amo lang gipugngan ang pangan midetalye sa iyang nasaksihan og naglaum nga mapakgang gyud kining maong salawayon nga binuhatan.
Pwerteng paita gyud kun tinuod man kining estoryaha. Nganong di na lang gyud mobiya kun di gyud makapugong.
* * *
Salamat nga gipasaligan kita sa mga nahingtungdang mga opisina nga luwas kita’ng mga konsumidor nga moka-on sa mga karne ni’ng panahon sa Pasko.
Niadtong Sabado atol sa among programang “Dialogue on the Air” sa dySS Super Radyo miingon ang akong mga bisita nga hugot gyud kaayo karon ang ilang monitoring sa mga karne nga mabaligya diha kamerkadohan.
Sila si Director Romeo Capa ug Dr. Alvin Leal sa National Meat Inspection Service miingon nga limpyo na gyud kaayo ang mga karne bisan kadtong mga imported meat.
Bisan sila si Dr. Maria Daisy Penetrante City Veterinarian sa dakbayan sa Mandaue ug Cebu City Market Administrator Raquel Bohol Arce ug ang mga meat inspectors sa dakbayan sa Talisay nga sila si Benjamin Agustin ug Jonas Degamo miingon nga doble kayod gyud sila karon nga nagbantay batok sa mga hot meat ug mga double dead nga mga karne.
Samtang gipasalig usab sa tulo ka mga meat vendors sa Carbon Market nga sila si Rosana Rosito Velloria, Manuel Remus ug Rosario Bellones nga ila gyung gilikayan ang paglapas sa mga lagda kay sila maoy unang maapektohan.
* * *
Capable na kaayo si kanhi presidente Gloria Macapagal-Arroyo nga mo-atubang sa bista sa iyang kasong electoral sabotage ug sa ubang mga kaso nga iyang atubangon.
Ang exclusive interview sa among kauban sa GMA nga si Arnold Clavio maoy nakahatag sa insaktong tubag sa tinuod nga kahimtang sa panglawas sa kanhi presidente.
Sa tinuud lang nagduda na gyud hinoon ko nga nagpasakit-sakit lang si Arroyo tungod kay hapsay na kaayo ang dagway ni GMA ug nakahimo na kini og iyang libro nga mi-abot na ug 40 pages.
Duna bay masakiton nga daghang giinom ug tambal nga makapinsar og tarong sa iyang huna-huna sa pagsuwat sa libro?
Nagtuo ko nga kadtong pagdali-dali nilang Arroyo nga makabiyahe paingon sa Singapore apil na kadto sa paagi aron siya mosibat sa laing nasud.