‘Nibahag ang ikog ni Mayor Mike Rama?’

Nakasaway kaayo ko nila’ng  Cebu City Mayor Michael Rama ug iyang mga hinanib diha sa Cebu City Hall kay wa gyu’y  bisan usa kanila ang mitunga atul sa among programang “Dialogue On The Air”  sa DYSS Super Radyo niadtong Sabado diha sa Mahiga Creek duol sa ihawan diin didto ang among venue sa among broadcast.

Nahadlok sila nga pasakitan sa mga tawo nga ilang gidaug-daug ug giilad? Wa gyu’y rason nga sila mahadlok kay dunay mga pulis sa Mabolo Police Station ang naka-standby.

Naay Noel Artes sa SPEED patuga ug confirm sa among staff sa iyang attendance unya wa gyud mopakita didto. Otro sab si Alvin Santillana sa  Cebu City Risk  Reduction Management Council nga maayo pa namo’ng teksanay nga magpatawag lang siya sa iyang cellular phone apan iyang gi-off atul sa duration sa maong programa.

Di man seguro sila masikwate sa subjudice rule kay makamao man ta’ng molikay paghisgot sa merito sa kaso. Hadlok si Rama sa iyang unpopular decision? Patuga man mo uy!

Si Carlo Duga-duga nga maoy tigpamaba ni Mayor Rama maoy nangayo’g despensa ug iyang subling gipasabot nga dunay mga prior commitments ang mayor. Pero grabe sab kun wa gyu’y gipadala nga representante.

Akong subli-on anaa ang akong suporta nga limpiyohan ug palapdan ang agi-anan sa tubig diha sa Mahiga Creek aron paglikay sa disgrasya.

Apan di sab maayo nga pasagdan nalang ang mga apektadong residente  nga di kahatagan ug insaktong kabalhinan.

Ang gikinahanglan nga relocation mao kadtong dunay linya sa koryente, dunay tubig ug dunay kapanginabuhi-an sa mga nagpuyo.

Magpasalamat ko nga mitunga sa maong programa bisan sa short notice si Francisco Bimbo Fernandez sa Pagtambayayong Inc. kinsa maoy nagdala sa tingog sa mga apektado.

Sanglit si Bimbo Fernandez usa sa mga consultant sa Mandaue City Government iyang gitug-an sa maong programa nga ang mga nagpuyo sa Mahiga Creek habig sa Mandaue dili gyud panggub-on hangtud nga maklaro na ang 6.5 ektarya nga lote nga paliton diha sa Paknaan isip relocation nga maka-accommodate ug 1,200 ka mga panimay.

Mitunga usab sila si Jaime Paglinawan chairman sa Bagong Alyansang Makabayan Central Visayas, Ramie Inopiquez sa Panaghugpong Kabus (KADAMAY), Celsa Santillan sa SANLAKAS ug Heide Amicable sa KPML kon Kongreso Ng Pagkakaisa Ng Maralitang Lungsod.

Sila mipasabot ug nanawagan sa mga nagpuyo nga magkahi-usa ug magtinabangay aron ka-protektahan ang ilang mga katungod batok sa dili maki-angayong lakang ni Mayor Rama nga  mopadayon sa pagpangguba nga wa motuman sa insaktong lagda.

* * *

Salamat sa Kahitas-an ug ni Santa Theresa De Avila ang mahal  nga patron sa Poblacion dakbayan sa Talisay nga gilikay kami sa disgrasya sa among duwang  basketball niadtong Sabado sa gabii batok sa taga DepEd Talisay nga maoy among gikasangka sa kampiyonato.

Puwera buyag among team sa DYSS Super Radyo GMA maoy  ni-  champion sa Executive Division ug gikan pa’s sa elimination round wa gyu’y pilde nga mikompleto  sa 8-0.

Ang mga team nga among gikabangga  mao ang taga Bureau of Fire, Poblacion Talisay, Sacred Heart Hospital sa SWU,  Bureau of  Jail

Management and Penlogy, ug PNP Talisay.

Magpasalamat ko sa init nga suporta sa taga Poblacion ilabina kadtong pundok sa mga bata  nga maoy among cheering squad nga mibuntog  sa gi-andam nga mga balloon sa taga DepEd. Gani diha’y among mga tigpaminaw gikan sa ubang mga lungsud sama sa Naga ug   Minglanilla  nga mituyo gyud pagsaksi sa among duwa.

Magpasalamat sab ko sa akong mga kaubang mga players nga nagpabilin ang teamwork hangtud sa katapusan  nga mikulit sa final score nga 101-99.

Physical ug  init gyud kaayo ang among duwa ngan nga championship gyud. Grabe ka crucial kay bawos-bawos lang ug labaw ug daghan sab ang higayon nga  magka-parehas ang score.

Daryot magubot sa hinapos nga mga oras kay usa sa mga players namo nga si Charlie Mongaya maayong pagkasawom sa korte kay giblakingan sa tiil ni teacher Anthony Abapo. Pero ok ra kay sports lagi.

Again congrats sa akong mga ka teammates nila ni Sir Alain, Super Charlie, Super Gabby , Tawing, July, Vender, pare’ng Nelson, Franklin, Boter, Aquiles, ug John.

May rason nga mag-selebrar ang Super Radyo sa laing kadaugan uban nila ni Ma’am Susan Perez Aliño ug  ni Sir Bobby Nalzaro nga supportive kaayo sa Basketball Team.

* * *

Misamot ka lagom ang mga panit sa akong mga kids sila Karl ug Karen kay naka-apil sab mi sa Summer Outing sa GMA-7 Cebu niadtong Sabado diha sa Costabella Tropical Beach Resort sa Marigondon Lapu-Lapu City.

Napun-an ang ilang kaitom kay niadtong duha  ka simana nga nakalabay naka-uban sab sila ug pangaligo sa among Summer Outing sa DYSS Super Radyo diha sa EGI Beach Resort.

Salamat sa among kompaniya sa GMA-7 ug Super Radyo nga nakagahin pa gyud ug budget ug panahon alang namo’ng  mga  kawani taliwa sa ka busy.

Maayo nalang nga sa matag tuig magka-ilhanay ug magkita-kita ang  among mga pamilya sa mga kalihukan nga ingon ani ug mao say gipaabot sa mga chikitting nga alang kanila di makompleto ang bakasyon kun way summer outing.