Di makasulbad sa makauuwaw nga kasong rape nga giatubang karon sa korte ni Dr. Epifanio Tac-an nga maoy assistant city health officer diha sa dakbayan sa Lapu-Lapu kun magsige siya og tago-tago.
Kun tinuod nga inosente siya ug igo ra siyang gipangwartahan sa 15 anyos nga batang babaye nga usa ka commercial sex worker, kinahanglang iya kining atubangon.
Sa habig sa kihante kinsa giabagan sa taga Children’s Legal Bureau, mi-insister gyud sa iyang pasangil batok kang Dr. Tac-an.
Kumusta man tuod ang kawsa sa kihante sukad sa tuig 2009? Nakaduso ba og kasong administratiba sa board of medicine sa Professional Regulation Commission (PRC) batok ni Dr. Tac-an aron pagpatang-tang sa lisensya sa doktor?
Di ba maigo nga miabuso si Dr. Tac-an sa iyang gahom pinaagi sa pagpugos sa pakighilawas sa giingong biktima bugti sa pag-release sa gipangayong hygiene card?
In fairness ni Dr. Tac-an, nanghimakak siya niining mga alegasyon sa giduso niyang counter-affidavit.
Kun tinuod man, leksyon gyud kini sa mga tawo nga magpasagad lang og hasmag.
* * *
Nakasulod na gyud ko kagahapon sa psychiatric ward sa Center for Behavioral Sciences diha sa Vicente Sotto Memorial Medical Center kay usa ko sa nakaresponde sa sunog nga miigo sa sikbit nilang mga panimay kagahapon diin 11 ka ba’y ang totally damaged samtang tulo ang partially burned diha sa barangay Sambag 2.
Magpasalamat ko ni Dr. Renato “Rene” Obra nga maoy head diha kay gipasulod ug gipaagi ko mismo sa sentro nga atua nagpundok ang atong mga kaigsoonan nga deperensyado sa pangisip.
Makaluluoy kaayo ang mga pasyente nga akong nasaksihan kay apike ra gyud kaayo ang ilang lugar.
Insakto gyud si Dr. Obra sa iyang giingon nga sobra ra kaayo sa kapasidad ang population sa mga pasyente diha sa ilang sentro.
Alang lagi nako, kinahanglang hatagan kini og prayoridad sa atong mga local chief executives sa Metro Cebu ilabina ni Cebu City Mayor Michael Rama nga magbutang gyud ug psychiatric ward sa ilang mga lugar aron di saligan kining pasilidad nga iya sa national government.
* * *
Si Cebu City Asst. Prosecutor Rogelio del Prado Jr. maoy mopahigayon og preliminary investigation sa kasong gipasaka sa management sa Visayan Electric Co. (Veco) batok sa Waterfront Cebu City Hotel and Casino Inc. ug sa mga kadagkuan sa maong hotel.
Ang piskal mo-isyu pa og subpoena aron patubagon ang taga-Waterfront Hotel sulod sa 10 ka adlaw sa kasong kalapasan sa R.A. 7832 otherwise known as the “Anti-Electricity and Electric Transmission Lines/Materials Pilferage Act of 1994″ nga gipasaka sa Veco.
Pero in fairness sa management sa Waterfront Hotel, nanghimakak sila sa pasangil nga nakakawat sila og 27 million kapin ka kilowatt hours nga koryente sa Veco nga mobalor ug sobra sa P168 milyones.
Gani, matud pa sa tagdumala sa hotel nga nihatag kanila og pabor ang Energy Regulatory Commission kon ERC pinaagi sa pag-isyu og cease-and-desist order aron dili makaputol ang taga-Veco sa linya sa koryente.
Gipaabot usab sa taga Waterfront nga hatagan sila og pabor nga resolusyon sa ilang reklamo batok sa taga Veco nga giingong nangolekta og dakung kantidad kanila nga way igong sukaranan.
With all due respect, paingon ra gihapon kining tanan sa sabot-sabot.
Sagad sa mga konsumidor sa Veco mipadayag og mga kabalaka nga tingalig adto kini ihapak sa gitawag sa systems loss unya mopatuman og power rate increase.
Nakatawa lang ko sa lain-laing komentaryo sa akong mga kaubang sakop sa media nga nagpaabot sab sa taga-Veco pag-file niadtong unes kay matud pa nag-ayo lang ang taga-Veco nga moputol dayon sa linya sa mga konsumidor nga mapakyas pagbayad sud sa duha ka buwan.
Pero naay taga Waterfront Hotel nga ilang gituhoan nga nanikas, wa sila makaako sa pagputol sa koryente.
Natural lang gyud nga lahi ra ang treatment sa Veco basta dagku nang kompaniya ang gikabangga.