Business news bores

Ang labi tingaling malaktawan nga bahin sa pamantalaan mao ang section sa pamatigayon. Tingali mas daghan ang mobasa parte sa relihiyon ug pagtuo kaysa mobasa partis negosyo.

Daghan ang hinungdan niani. Gauna niani ang “jargon” o mga termino nga ang mga suhito sa ekonomiya ray na sinati. Ug ang naka kumplikar pa gyud kay kining maong mga jargon i-shortcut pa pagsuwat pinaagi sa initials sama sa GNP, GDP, ROI.

Pun-an pa kini sa mga slang ug idioms nga exclusive ra sa maong mga pundok sama sa “in the red,” “getting bullish,” “bubble burst.”

Gawas pa dakung bahin sa balita may kalabutan sa numero ug dakung bahin sa mga mamasa dili malingawo og numero.

Ang kakuwang sa drama makapaminus usab sa interest sa mga mamasa. Ma exciting lang ang business news kon dunay bankrun sa mga dagkong bangko o dunay eskandalo sa mga opisyal sa dagkong negusyo.

Usa sa maka palingi sa reader mao ang mga balita kabahin sa brands o sa mga inila nga kompaniya. Sama pananglitan ning maong mga headers: “Na down ang sales sa Toyota,” “Na minus ang stock sa Nikon tungod sa baha sa Thailand,” “Gikiha sa Apple ang Samsung.”

Isip usa ka consumerist culture daw duna kitay attachment sa brands. Ug dili lang kini sa pang status symbol nga panan-aw. Kon duna kay butang nga napalit ug nahimuot ug nalipay ka niani, buot kang masayud sa kaagi ug kaugmaon sa naghimu niani.

Sama pananglit ning financial scandal sa Olympus nga naka-patingkag sa akong dunggan bisan pa man og Canon na karon ang camera nga akong gigamit. Ang una gud nakong duha ka digital cameras puros man Olympus.

Niadtong miaging tuig nakahimo og history ang Olympus dihang mi-hire silag usa ka Westerner isip CEO. Mao pa kadtoy unang higayon sa kaagi sa photo industry sa Japan diin usa ka dili Hapon maoy nahimong pangulo sa usa ka kompaniya.

Apan niadtong mga tulo ka buwan nga miagi gipalagput ra usab sa Olympus ang ilang CEO nga Briton nga si Michael Woodford sa katarungan nga wa kini mohaum sa Hinapon nga pamaagi sa pagpadagan sa kompaniya. Pero pag-uli ni Woodford sa England, iyang gibutyag sa tibuok kalibutan nga gipalagput siya dihang iyang gipaimbistigar ang gipadulngan sa $1.3 bilyones nga nawagtang sa kompaniya. Matud pa niya minilyon ang gibayad ngadto sa mga consultant nga duduso nga mitambag sa Olympus pag invest sa mga kompaniya nga takilid na.

Human niya kini mabulgar, gipaimbistigar sa gobyerno sa Japan ang Olympus, ug tuod man, napamatud-an ang gipanulti ni Woodford. Ug daghan opisyal ug board members sa Olympus ang nang resign. Lakip na sa nang resign ang mipalagput ni Woodford.

Tingali ang laing rason nganong wa kaayoy interest ang ordinaryong mamamasa sa mga balita sa patigayon kay usa ra may padagan niani—ang lain-laing paagi sa pagtago ug pag diskubre sa tikas.