Pinakabangis ug pinakangisli nga krimen
Grabe ka brutal kining krimen nga nahitabo sa barangay Villahermosa, lungsud sa Tabuelan, nga dunay uyu-an nga mi-unay og patay sa iyang pag-umangkong babaye pinaagi sa paghiwa-hiwa sa parte sa lawas ug mika-on sa mga hinabwa nga internal organs.
Wa kaha matakdi pagka-unglo (ungo) ang responsable’ng uyu-an nga si Efren Matidios? Basig naliso ang utok ni’ng kanahan mugna sa pagka-adik o ba kaha sakop siya sa kulto?
Sa panultihon sa mga katiguwangan ang unglo o ungo di gyud mangunay ug silingan. Labaw na’ng di mangunay ug kadugo.
Maayo’ng imbestigahon kini ug tarong sa kapolisan kay basig bag-o na ang unglo o ungo niining atong henerasyon karon nga mangunay na ug kadugo.
In fairness sa uyu-an nga nadunggan nako kagahapon sa buntag sa interview ni Kapusong Jun Veliganio sa “Balitang Bisdak” nga na-live sa among sibyaanan sa dySS Super Radyo, nanghimakak sa mga pasangil nga siya maoy mipatay sa iyang pag-umangkon nga si Lara May Concoles.
Wa sab niya angkona ang pasangil nga iyang gika-on ang atay sa biktima. Ug namahayag ang kanahan nga basig dunay laing tawo nga aliwas ang responsable.
Apan sa resulta sa imbestigasyon sa team leader nga si SPO1 Amelito Alcala ug segun sa mga nakasaksi, si Efren gyud ang mihimo sa linoog kaayong krimen ug nakit-an pa kini nga may gika-on sa plato nga atua didto nakita ug nakuha ang parte sa internal organ nga inasinan.
Bisan sa autopsy ni Dr. Nestor Satur naglibog usab kon nganong dunay asin ang inablihan nga tiyan sa 6 anyos nga biktima.
Pagka-kulba kun mao kini. Basig nagtoo si Efren nga karneng baboy ang patay’ng lawas sa iyang pag-umangkon.
Nakuyawan lang ko nga malibre ni siya sa kaso ilabina kun modepensa siya nga usa siya ka buang nga tawo. Bisan unsa-on, abnormal man gyud ang tawo kon moka-on siya’g tawo.
* * *
Gidakop na sab kagahapon ang kontrobersiyal nga sinagop ni Talisay City Mayor Socrates Fernandez nga si Joavan.
Si Joavan nalutsan ug warrant of arrest sa husgado niadtong iyang kasong kalapasan sa Republic Act 9165 tungod sa paghupot og shabu.
Matud pa ni Chief Insp. George Ylanan nga didto nila dakpa si Joavan sa ilang Balay Alampu-an sa Vista Grande Talisay.
Way report nga misukol si Joavan sa kapolisan dihang gi-serve ug gipakita kaniya ang warrant of arrest.
Sa pagsuwat ning maong lindog gihikay ni Joavan ang iyang piyansa.
* * *
Nasugdan na kagahapon ang pag-ihap og balik (revision) sa mga ballot boxes sa election protest ni Lakambini Reluya batok sa incumbent mayor nga si Antonio Canoy.
Maayo kay nagkasabot ang duha ka partido nga buksan nalang bisag way PCOS machine.
Sa kamanduan ni Judge Ramon Daomilas, napulo ka mga precinct number ang ipa-ubos sa revision.
Ug kini gilangkuban sa precinct numbers 30, 31, 32, 33, 1, 2, 5, 43, 27 ug 28.
Ang revision committee gihatagan sa korte ug hangtud karong Biyernes paghuman sa recount.
* * *
Pipila ka mga residente sa barangay Kalunasan, Beverly Hills, Lahug, ug ingon man ang taga Girls Scout of the Philippines midangop sa akong programa sa radyo sa dySS Super Radyo niadtong miaging simana ug ilang gipadayag ang ilang pagsupak nga himong sementeryo ang Osmeña Park/Shrine nga anaa nahimutang ibabaw sa tunghaan sa CFI (Lyceum) Kalunasan.
Ang lote gipanag-iya sa kagamhanan sa dakbayan sa Sugbu apan gi-donate na ngadto sa Evangelical Christian Coalition Inc. ug matud pa ang naulahi nagtinguha nga hinganlan ug Don Sergio Osmeña Memorial Park.
Ang grupo nga pinanguluhan ni Mr. Edmund Vinzon mipadayag nga di gyud sila mosugot nga himoong sam-ang ang maong lugar kay makahugaw sa ilang tinubdan sa tubig.
Gawas niini ang Kalunasan usa ka residential area og gawas pa usik kaayo ang mga dagkung kakahuyan kun ma-convert na kini ngadto sa sementeyo ug makamugnag problema sa trapiko.
Karong Biyernes dunay public consultation nga ipahigayon diha sa barangay gym sa Kalunasan ug hinaut nga makapadayag usab niini ang mga opisyales sa Evangelical Christian Coalition Inc. aron pagpasabot.
* * *
Pagkadali ra gyud sa panahon. Mag-walo na ka tuig ang akong guwapa ug bright nga anak karong adlawa. Karen, happy birthday, nak!Pinakabangis ug pinakangisli nga krimen
