Mga negosyante ray nagrisgo sa kaugalingon
Subo kaayong palandungon ang gi-tribukar ni Supt. Rex Derilo nga maoy nangulo karon sa Fessags kon Firearms and Explosives, Security and Guards Section Supervision atol sa among programang “Dialogue on the Air” niadtong Sabado sa dySS Super Radyo kay sagad sa mga gwardya gikalimtan ug gidaug-daug sa ilang gipang-erbisyohan nga mga security agency ug sa mga kompanya nga gipanggwardyahan.
Kanyahay ra diay nga malutsan sa mga tulisan ang mga gwardya o ba kaha makig-alyado sa mga tulisan gumikan kay way klarong sweldo ug benepisyo unya gutom ang pamilya.
Matud ni Supt. Derilo nga dunay mga gwardya nga uwahi kaayong makadawat ug sweldo unya kun mo-cash advance duna pay interest nga ipatuman sa opisina sa ilang agency.
Gawas niini, wa pay SSS nga risgo kaayo ang trabaho sa mga gwardya.
Sila si Eric Mendoza presidente sa Mandaue Chamber of Commerce and Industry ug Teodoro Locson Jr. nga maoy Vice-President External sa Cebu Chamber of Commerce and Industry miingon nga wa maabot nila kining maong isyu ug nanawagan sila sa ilang mga kaubanang negosyante nga motan-aw na ning maong problema.
Samtang sila si Chito Cabaero, immediate past president sa Cebu Bankers Club ug si Expedito Bollozos presidente sa Cebu Federation of Rural Banks Inc. mipadayag nga silang taga-bangko ila gyung gihatagan og pagtagad ang kaayohan sa mga gwardya kay giisip nila nga importante gyud ang ilang seguridad.
* * *
Gi-andam na ang kasong robbery with multiple homicide and serious physical injuries batok nila ni Junjun Cabando ug mga kaubanan sa pagtulis sa armored van nga maoy gisakyan sa 1.2 milyones ka pesos gikan sa ChinaBank paingon sa Money Changer diha sa Robinsons Place diin mipatay sa tulo nila ka mga kaubanang tulisan ug sa duha ka gwardya sa Puritan Security Agency ug miangol sa duha ka mga pulis.
Sila si Chief Insp. Romeo Santander, hepe sa Criminal Investigation and Intelligence Branch ug Chief Insp. Bonifacio Garciano, hepe sa Intelligence and Detective Management Branch sa Cebu City nagkanayon nga upat ilang pasakaan og kaso.
Gisubay usab nila karon kun maapil og kiha ang mga Sugbuanon nga mga local contacts nilang Cabando.
Matud sa kapulisan, posibleng dunay mga lookout nga nagpahimutang sa habig sa may Fuente Police Station ug maoy nag-monitor sa kalihukan sa mga pulis.
Bisan ako nagtuo nga well-planned kaayo sa grupo nila ni Cabando ug tan-aw nila nga medyo relax kaayo ang taga-Fuente Police mao nga ilang gi-execute ang pagtulis.
Wa pa sab i-discount ang mga posibilidad nga dunay “inside job” sa maong pagpanulis. Subject pa kini sa ongoing investigation ang tanan.
Samtang si Derilo mitug-an nga hapit na siya mahuman sa pagpahigayon og administrative investigation sa duha ka mga security agency nga mao ang Puritan Security Agency ug ang Lanting Security Agency.
Gisubay niya kun wa bay mga kalapasan ilabina ang Lanting Security Agency sanglit ilang mga security personnel ang nadestino diha sa Robinsons Place.
Ang subo lang sab kaayong tan-awon kay matud pa ni Derilo nga silang mga pulis nga magdalag armas di gyud makasulod sa mall kun dili ipabilin ang armas og mo-log book.
Apan ang mga tulisan yano kaayong nakasulod nga nagdalag armas samtang nagpaabot sa teller sa ChinaBank.
Samtang ang atong kapolisan sa probensiya, matud pa ni Supt. Rodolfo Albotra Jr. wa sab mangatug sa pag-monitor sa mga dautan kay nagsige sila’g conduct ug checkpoint.
Wa sab magpaalkanse sa pagpangandam ang mga pulis sa mga dakbayan sa Mandaue, Lapu-lapu ug Talisay sumaa pa nila ni Supt. Jason Capoy, Insp. William Homoc ug Insp. Hugo Ipong.
Miingon sila nga bisag dunay mga pagkuwang apan maningkamot sila batok sa mga tulisan.
* * *
Makapadasig kaayo sa trabaho ngadto sa kapulisan ug sa mga gwardya ang paghatag og commendation ug cash reward nga pasiugdahan sa Bankers Club ug sa pundok sa mga magpapatigayon ngadto sa mga kabanay sa duha ka mga gwardya nga nangamatay ug sa duha ka mga pulis nga nangaangol sa pakigpinusilay sa grupo sa mga tulisan nga gipanguluhan ni Cabando niadtong Lunes sumad karon.
Si Chito Cabaero sa Cebu Bankers Club, Expedito Bollozos sa Cebu Federation of Rural Banks Inc., Eric Mendoza sa Mandaue Chamber of Commerce and Industry ug Teodoro Locson Jr. sa Cebu Chamber of Commerce and Industry pulos mipadayag nga magtigom sila alang niini kay nakadayeg kaayo sila sa pagkamadaugon sa kapulisan.
Gani, apil na dinhi ang pagrekomendar og spot promotion niadtong mga pulis nga angayng hatagan.
Again, kudos sa atong kapulisan for the job well done!
