Sunday, December 17, 2017
Close  
newsinfo / CDN - Opinion
  • 0
    share this
Super Hirit

Nagpakiluoy na ang kanahang gwardiya

/ 07:09 AM January 08, 2014

Pwerte nang  luhod-luhod sa pagpakiluoy aron  pasayloon  si  Berly  Tudtud sa mga kabanay sa iyang  gipangpatay ug sa iyang  pagtulis sa  FAIR Bank  sa Daanbantayan niadtong pagsugat sa bag-ong tuig.

Mao gyud  ning tawo, basta madakpan na paluoy-luoy taman sa  ginhawa sanglit wa siyay kaluoy ug  konsensya sa pagpatay sa iyang  kaubang gwardya nga si Dean Desierto, sa ka-live-in nga  si Cecelia Torres ug sa accounting clerk sa bangko nga si Jennelyn Migabon.

Karon na lan nagmahay ang  kanahan sa iyang gihimong krimen kay madugta man gyud siya sa prisohan sa kasong robbery with multiple homicide.

ADVERTISEMENT

Alang  nako,  angay na gyung estriktohon  sa Philippine National Police (PNP) ang  pagpang-recruit og  mga guwardiya kay  nagduda ko ni Tudtud nga wa  kini  moagi  sa  insaktong training.

* * *

Ahente gyud sa harassment among kaubang reporter sa  dySS Super Radyo nga si Guam Logronio.

Human gihagit siya og duwelo ni Philippine Drug Enforcement Agency in Central Visayas Asst. Regional Director Esperidion Javier  Jr niadtong  nangaging  mga buwan, niadtong Lunes sa gabii, gihagit na sab siya  ni PO3 Gregorio Eramis  nga magkita dayon dihang nagkainitay sila sa telepono  kay wa magtarong  og tubag ang pulis.

Porbida  gyud ning  ubang  mga pulis mopakita  gyud  sa  pagkaarogante ug  maghawod-hawod  gyud.

Makaako  gani   pagpangharass  sa  mga sakop sa  media, unsa na kaha  ang ordinaryong tawo nga moduol sa ilang police station.

Maglaum ko nga disiplinahon ning pulisa nga nadestino diha  sa Mambaling Police Station ni Cebu City Police Director Noli Romana.

Ang  mga kadagkoan sa PNP muna-muna og papogi points sa publiko  pinaagi sa  ilang pagpalig-on sa community relations unya karon  anaa  ning  mga sagbot  sa  ilang  puwersa.

ADVERTISEMENT

* * *

Unsa may gilangayan ni  Chief Supt. Danilo Constantino sa Police Regional Office in Central Visayas pagsulbad sa kamatayon sa negosyante  og hardware sa Balamban  nga  si  Jerome Bendebel?

Nganong  hangtud karon wa man gihapon itribukar ang  pangan sa  pulis   nga  nalambigit  sa pagkulata  kang  Bendebel gawas  sa  mga personnel sa rehabilitation center?

Unsa man sab  ka impluwensiyado  ning private drug  rehabilitation center nga makapaubos og rehabilation program sa usa ka drug dependent nga way court  order?

Maglaum ko nga sulod ning semanaha, duna  nay mapasakaan og  kaso ang  taga-Criminal Investigation and Detection Group in Central Visayas (CIDG-7).

* * *

Nakasabot ko ni  Gov. Hilario Davide III nga iyang  gitangtang  si manlalaban Ramil Abing isip iyang chief of staff ug gipapulihan ni manlalaban Orvi Ortega.

Kay sa tinuod lang, daghan kaayong yang-ngo akong  nadawat  dihang  miasumir si Abing isip chief of staff  nga daw nabaghoan ug wa makasabot sa katungdanan nga iyang gihuptan.

Usa siya sa giisip sa Kapitolyo nga “little governor.”

In fairness ni Abing nga bisag wa ko makaila kaniya, nahibawo ko nga  makamao siya sa  trabaho  kay  abogado gud.

Apan  tingali  nasobrahan mao  nga  na-misinterpret.

Pero unsa katinuod  nga  gi-andam  si Orvi  alang  sa tuig 2016 sa maong  katungdanan aron mahumot siya sa  mga mayor?

Maglaum ko  nga usa ra  gyud ang atong  governor.

Ang Junjun Davide III nga akong  nailhan sa Ombudsman kaniadto  mao gihapon karon. Simple ug  humble kaayo.

Dili ganahan  nga dunay pulis  nga  magbantay  kaniya.

Dunay  usa  ka higayon nga  nahimuot  ko ni Gov  kay ang iyang bodyguard  mas  mubo pa kay sa 10 anyos nga bata nga akong  tagoon sa  pangan  nga “Rickyboy.”

* * *

Tarong ba  gyud  si  Panfilo Lacson? Dili ko ka-imagine  ba  nga  duna pay  mga  contractor ug  mga politiko  nga magkonsabo pagpangomisyon niining pag-construct sa mga bunkhouses  alang  sa  mga biktima sa  bagyong  “Yolanda” nga tipik ug kabahin sa  rehabilitation effort sa gobyerno inabagan sa lain-laing  kanasuran.

Kun  tinuod  man  kini, haskang uwawa na gyud  nato  karon  kay  wa gyud  maglikay sa  kontrobersiya  pun-an pa niining reklamo   sa  ubang mga  biktima sa bagyo  nga wa  gyud sila  makatilaw sa  lamiang  pagkaon nga  de lata  nga gikan sa ubang  kanasuran.

Si  Public Works  Secretary Rogelio Singson kinsa  misaad nga  mo-resign sa puwesto kun dunay naka-commission gikan sa 30 porsiento hangtud sa 35 porsiento miklaro nga  way overpricing  ug dili substandard  ang mga  materyales.

Nagtuo si Singson nga pamolitika lang  ang  alegasyon nga gikan matud pa sa usa  ka  lungsod sa  Samar.

Ambot  lang sab kun mosaler  ba ang  gimando  nga  imbestigasyon ni Disaster Rehabilitation Chief  Panfilo Lacson ngadto sa CIDG kay with all due respect niining Lacson ug CIDG  duna say  mga misteryo sa mga imbestigasyon kaniadto.

Ambot  lang kun itaral ba sa Aquino administration kun ang  politiko  ug  mga  contractor  ila rang mga kaalyado.

Mao na kini  ang resulta sa kalaki ni Presidente  Noynoy  Aquino  nga wa mangunay niining rehabilitation effort.

Subscribe to INQUIRER PLUS to get access to The Philippine Daily Inquirer & other 70+ titles, share up to 5 gadgets, listen to the news, download as early as 4am & share articles on social media. Call 896 6000.

TAGS:
For feedback, complaints, or inquiries, contact us.




© Copyright 1997-2016 INQUIRER.net | All Rights Reserved